Accessibility links

Кайнар хәбәр

Otışlı uyınnar, Olimpiä yarışları häm... islam dinenä küçülär - şuşı törle temalarnı "Awlaq öy" berläşterä


"Azatlıq" radiosınıñ yäkşämbe "Awlaq öy"enä räxim itegez, qäderle duslar! Sezne biredä qunaq itü çiratı bügen min, Kärim Kamalda. Läkin "küp süz - yuq süz" digändäy, elekke utırmalardan ayırmalı bularaq, min küp söyläp tormamın inde. Bügenge "Awlaq öy"dä ike temağa öç yazma yañğırar. Başta - keşelärneñ näfeskä birelüe, annarı - yuğarılıqqa, ruxi bieklekkä omtıluı xaqında. Bu xaqta täfsille mäğlümat - aldağı minutlarda.

Küptän tügel genä Qazanda bulğanda, andağı ber tanış çex futbolçısı miña şaqqatıp ber, anıñ öçen säyer närsä turında söylägän ide. "Uramnarğa ällä nindi avtomatlar quyıp çıqtılar, di, xäzer bar xalıq şular yanında böterelä, bar aqçasın şunda äräm itä" digän ide tämam aptırap, Rusiädä inde şaqtıy ğömeren ütkärgän şul futbolçı. Yäğni anı "sovok" ğädätläre, "sovok" küreneşläre belän ğäcäpländerü bik awır ide inde, ul Rusiä, häm ni qızğanıç, Tatarstannıñ da xalqı arasında kiñ taralğan, ämma Yevropa keşeläre hiç añlamağan aqılsızlığın küptän belgän keşe. Şuña da qaramastan, çex futbolçısı bik aptırağan ide. Döresen genä äytkändä, min anıñ söyläwennän süzneñ ni xaqta baruın cünläp añlamadım da. Qazannıñ här poçmağında torğan "romaşka"larnı kürgäç kenä eşneñ töbenä töşenä başladım - ul otışlı uyın avtomatları turında söylägän ikän. Mädäniatlı dönyada andıy närsälärne uramğa çığarmıylar, avtomatlar maxsus yabıq urınnarğa, binalarğa ğına quyıla, alarğa balalarnı yaqın da kitermilär. Tik Qazanda monıñ berse dä yuq - aqçañ ğına bulsın, kem sin, niçä yäş, berkem dä qızıqsındırmıy. Şuşı xälgä beraz açıqlıq kertü, "Awlaq öy" tıñlawçıların da tanıştırıp kitü üteneçe belän min Qazannan Gölnaz İlgizärgä möräcäğät ittem. Xäzer anı tıñlıyq.

Gölnaz İlgizär

Qazannıñ üzençä Las Vegas bulu tırışlıqların "Awlaq öy" tıñlawçılarına Gölnaz İlgizär sürätläde. Keşe azartqa, hireslekkä ber qomarlı uyınnarda ğına birelmi bit äle, qäderle duslar. Uñay häwäslekneñ misalı itep sportnı kiterergä mömkin. Matur ğına cayı da çığıp tora - comğa könne Gretsiäneñ Afina şähärendä çirattağı Olimpiä uyınnarı başlandı. Andıy xalıqara cıyınnar härwaqıt häm härkemdä diärlek zur iğtibar uyata, şuña kürä "Awlaq öy" dä moñardan çittä qala almıy. Bigräk tä Alsu Qormaş, Olimpiä uyınnarına sezne näq menä ul alıp barır häm xäzer sezne andağı qayber qızıqlı küreneşlär belän tanıştırır.

Olimpiä uyınnarı digäç – küz aldığızğa närsä kilä, xörmätle tıñlawçılar? İmanım kamil, bu atnada açılğan uyınnarnıñ berençe könnärendä sez iğtibar belän, ä bälki artıq iğtibar birmiçä genä berençe sport yarışların, ciñü häm ciñelüne küzätep barğansızdır. Ämma sport yarışlarınnan tış – Olimpiä uyınnarı şulay uq – matur, yarım şärä, mökämmäl figuralı häm şul uq waqıtta ..... här çirdän awırıp kitergä äzer bulğan sportçılar cıyılğan ber urın ikäne turında uylamadığızmı? Maturlıq digännän – şärä tänneñ maturlığı tatarlarnıñ ählak qanunnarına bik sıyıp betmi, şulay da sportçılarnıñ yaxşı formada, matur tänle buluların kire qağıp bulmıy. Olimpiä uyınnarın yaqtırtırğa kilgän jurnalistlar häm Afinda sport mäydannarında wä televideniä aşa yarışlarnı qarağan tamaşaçılar da – monı onıtmıy. Atletlar üzläre dä monı bik yaxşı añlıy, häm qayber xäbärlärgä qarağanda – Olimpiä awılında yäşäw – matur küñelle keşelär cıyılğan awlaq öyne xäterlätä. Şulay da – Olimpiä uyınnarınıñ berençe çiratta – sport yarışları bulğanın onıtmıyq. Yuqsa tışqı maturlığın sport tormışınnan östen quyğan Anna Kurnikovalar tağın da kübäyer... Şulay itep çirattağı sport yarışın başqa küzlektän qarağız äle, xörmätle tıñlawçılar.. Olimpiä uyınnarında qatnaşqan sportçılarnıñ küñel açırğa waqıtı küp dip uylamıyq, meñlägän atlet, alarnıñ trenerları häm jurnalistlar tuplanğan qızu Olimpiä awılında şulay uq törle çir- infeksiä dä küp cıyıla. Küz aldığızğa kiteregez, xörmätle tıñlawçılar: şul olimpiä yarışlarında ber genä kön qatnaşıp yaxşı näticägä ireşü öçen künegülär ütkärep yäş ğömereneñ zur öleşen sarıf itkän berär sportçınıñ – mäydanğa çığu könendä borını ağa başlıy yä eçe kitä. Bette, niçä yıllıq xezmät buşqa kitkän bula. Şunıñ öçen sportçılar mondıy tör xällärdän bik qurqa ikän. 1998nçe yılda Naganoda uzğan Olimpiadada, Britaniä sportçılarınıñ tabibı Riçard Badgett, ul çaqta törkemneñ yartısı salqın tiderde, dip iskä ala. Sulış yulları häm aş qazanı kizüe bik tiz tarala. Şuña da ber fatirda 4 sportçıdan artığın yäşätmilär. Çirläp kitüçelärne şulay uq başqalardan ayırıp – izolyatorğa yabalar. Här ildän kilgän sport törkemeneñ üz izolyatorı bar. Sport dönyasında soñğı yıllarda kiem häm sport küzlekläre, sport ayaq kieme dizaynı ğına tügel, - atletlarnıñ sälämätlegen saqlaw, qaysıber çirlärne aldan kürep alarnı buldırmaw turında da küp uylana başladılar. Häm bu ölkädä tikşerülärne şulay uq här il ayırım alıp bara. Älegä – Afindağı tabiplarnıñ kiñäşläre bik ğadi – yışraq qul yuarğa, tırnaq kimermäskä, başqalarnıñ tabaq sawıtların qullanmasqa, küp su eçergä, çi balıq aşamasqa... Ämma belgeçlär fikerençä – nindi genä çaralar kürelmäsen – sportçılar barıber çirliäçäk... Olimpiä uyınnarı äle başlandı ğına, xörmätle tıñlawçılar! Alda äle bezne bik küp mawıqtırğıç tamaşalar kötä... bezneñ belän bulığız!

Alsu, räxmät. Olimpia uyınnarı äle şaqtıy baraçaq, häm "Azatlıq" tapşırularında bez Gretsiägä yış qına barıp qaytqalarbız. Ä "Awlaq öy" däwam itä. Qäderle duslar, bez äle haman da hireslek, häwäslek, azarttan yıraq kitä almadıq, otışlı uyınnar, aqça tuzdıru, sport... läkin xäzer inde hiçşiksez wäğdä itelgän, ruxiatkä omtılu xaqında. Bu xaqta bezgä Mäskäwdän Näzifä Kärimova söylär. Mäçet yulında yörep ul qızıqlı tanışlarğa tap bulğan.

Näzifä Kärimova

Tatarlarnıñ kötüe belän urıslaşıp baruı sürätendä, möselman dinenä küçkän urıslar turında işetüe ğäcäbräk, älbättä, läkin andıy oçraqlar da bula ikän. Qäderle duslar, şunıñ belän bügenge "Awlaq öy" utırması inde yabılır da, anda sezneñ küñelne kürgän Gölnaz İlgizär, Alsu Qormaş häm Näzifä Kärimovağa räxmätlär belderep, min Kärim Kamal sezneñ belän inde sawbullaşam. Bezgä tuğrı bulıp qunaqqa kerep çığuığız öçen sez, tıñlawçılarıbızğa da bez räzmätlebez. "Awlaq öy"gä kiläse yäkşämbedä dä kerep çığarğa onıtmağız. Ä atna eçendä "Azatlıq"nıñ İnternet säxifäsenä küz salğalap torığız. Anda radiobızda yañğırağan xäbärlärneñ yazma räweşen taba alasız. Anıñ adresı www.azatliq.ru. İsän-imin torığız, xatlar yazğalağız!
XS
SM
MD
LG