Accessibility links

чәршәмбе, 7 декабрь 2016, Казан вакыты 01:02

«Mäskäw-Pekin ekspressı» yulı Qazan aşa ütä


Ekstrim, qıyınlıqlar belän köräşergä telägändä, Yevropa keşeläre Rusiägä kilä. Belgiä televidenie şirkäte, çit telne belmägän kileş, ber tien aqçasız, dönya buylap säyäxät itü kebek uyın uylap tapqan. UL «Mäskäw-Pekin ekspressı» dip atala. Ul real şou räweşendä Almaniä televideniesendä kürsäteläçäk. «Mäskäw-Pekin ekspressı» digän uyın marşrutı Seber timer yulı nigezendä tözelgän. Mäskäwdän başlanğan bu yulda tuqtalışnıñ berse Qazan şähärenä turı kilä. Mäskäwdän barlığı 8 par yulğa çıqqan, här bersen kamerağa töşerüçe törkem ozatıp yöri. Yulda töşerep alğan materialdan tapşırular yasalaçaq. 16 avgust kiçendä, Mäskäwdän Qazanğa qädär yulçı maşinalar belän kilgän berençe parnı qarşı aldılar. Ä aña qädär, Tatarstan başqalasına uyınnı oyıştıruçılar kilep, matbuğat oçraşuın uzdırdı. Uyınçı parlar olı yulğa çığıp, urıs telen belmägän häm bik äz genä aqçaları bula torıp, bilgele ber şähärgä barıp citärgä tieş bula. Maşinanı tuqtatu da, qayda barırğa añlatu da, aşarğa tabu da, qunıp çığarğa urın yünätü problemaların da uyınçı xäl itärgä tieş. Berençe par, düşämbe kiçendä Qazanğa kilep ireşte. Bu yılnı uyınnı Alman televideniese satıp alğanğa kürä, uyınçılar da Almaniädän saylap alınğan. Anda 19 yäştän 50 yäşkä qädär, tuğannar, ir-belän xatın, yäki duslar qatnaşa alğan. Berençe Qazanğa kilep citkän yäşlär parı, Anna belän Mark Köln şähärennän bulıp çıqtı. Jurnalistlar belän söyläşkändä, alar, Rusiädä kriminal, qanunsızlıq, tärtipsezlek dip işetep, yulğa çığarğa qurıqqannarın iskä töşerdelär. Ämma uyın başlanğaç, xällärneñ alay uq naçar tügel ikän añlağan.

Uyınçılar äytkänçä, yulğa oçrağan keşelär bik qunaqçıl häm kiñ küñelle bulıp çıqqan. Şunıñ belän bergä, üz yaqların Yevropa televideniesendä kürsätergä telägän gubernatorlar, respublikalar citäkçeläre dä älege uyınğa teläktäşlek kürsätä. Tatarstanda da RTL Alman televideniese törkemen häm uyınçılarnı qädärle qunaqlar itep qabul ittelär. Bu uyın inde 2nçe tapqır ütkärelä häm ikençe yıl rättän, uyınçılar Qazanda tuqtalış yasıy. Berniçä könnän qalğan uyınçılar da Tatarstanğa kilep citärgä tieş. Uyın axırında 8 parnıñ 2-se genä qalaçaq häm alar Pekinğa barıp citep, anda üz ara yarışırğa tieş bula. Yulda maşina tuqtatıp torğan alman keşelären oçratsağız, alarnıñ, «Mäskäw- Pekin ekspressı» uyınçılarınıñ bulu ixtimallığı zur.

Bikä Timerova.

XS
SM
MD
LG