Accessibility links

якшәмбе, 4 декабрь 2016, Казан вакыты 11:17

Respublika mäktäpläre yaña uqu yılına äzerme?


17 avgust könne respublikanıñ Ministrlar Kabinetında jurnalistlarnı yaña uqu yılına äzerlek belän tanıştırdılar. Sişämbe könne uzğan bu brifingta jurnalistlarnı aldan mäktäplärne tözekländerü, respublika mäğärif oyışmalarınıñ yaña 2004-2005 uqu yılına äzerlek belän tanıştırdılar. Şuña da, berençe märtäbä şunıñ qädär massaküläm mäğlümät çaraları wäkilläre qarşında çığış yasağan yaña Mäğärif ministrı Räis Şäyxlislamovtan tış, oçraşuda Tatarstannıñ tözeleş häm toraq-kommunal’ xucalığı ministrlığı wäkilläre dä bar ide.

Berençe bulıp süzne Räis Şäyxlislamov aldı. Anıñ çığışınnan kürengänçä, tözekländerelergä tieş mäğärif oyışmalarınıñ 65 protsentı ğına eşlängän. Tözekländerü eşlärenä bülep birelgän aqçalar da äle bar külämdä üzläşterelmägän. Läkin bu inde 1 avgustqa birelgän sannar ikän. Şuña kürä, uqu yılı başına mäktäplär häm balalar baqçası äzer bulır, dip ışana ministr. Tözeleş ministrlığı wäkilläre süzlärenä qarağanda, bıyıl respublikada 22 yaña mäğärif oyışması açılaçaq. Alar arasında Şämärdan, Ägerce, Arça mäktäpläre, Çistay häm Alabuğada tatar gimnaziäläre, Saba, Norlattağı urta belem birü uçilisçıları, balalar baqçaları bar.

Läkin mäktäplär şaqtıy açılsa da, alarnıñ küpçelege awıl cirendä tözelä. Ä balalar küp, uqu binaları citmägän zur şähärlärdä mäktäplär tözelmi, uquçılar ikeşär smenada uqırğa mäcbür. Andıylar bar mäktäplärneñ sanınnan 17 protsentnı täşkil itä. Älege problemanı xäl itü öçen Qazan, Çallı kebek şähärlärgä üzläreneñ maxsus programmaların buldırırğa kiräk, dide Räis Şäyxlislamov. Ä bıyıl Qazanda nibarı ber genä yaña mäktäp açıla häm tağın berse kapital remonttan soñ eşli başlıy. Şähärneñ Yaña Savin, Sovet rayonnarı mäktäpläre uquçılarnı sıydıra almıy. Läkin şähär xakimiäte älege wazğiätne ciñeläytü öçen çaralar kürmi. Alar uquçılarnıñ kimegänen kötep tora, buğay. Ä uquçılar sanı çınlap ta yıldan-yıl kimi bara. Bıyıl, mäsälän, respublika mäktäplärenä 474 meñ bala baraçaq. Bu bıltırğı uquçılar sanınnan 29 meñgä azraq. Başqa yıllar belän çağıştırğanda respublikadağı demografik xälneñ awırlığı tağın da açığraq kürenä. 1998-99 uqu yılları belän çağıştırğanda mäktäptä uquçılarnıñ sanı 109 meñ keşegä kimegän.

Brifingta süz şulay uq avgust kiñäşmäsenä äzerlek turında da bardı. Şaqtıy ğına ozaq kiñäşläşkännän soñ anı elekkeçä uzdırırğa bulğannar. Dimäk, Tatarstan mäğärif xezmätkärläreneñ kiñäşmäse 19-20 avgust könnärendä ütäçäk. Berençe könne anda qatnaşuçılar, ä alar 460 keşe bulaçaq, seksiälärdä eş alıp barıp, 20 könne plenar utırışta eşlärenä näticä yasayaçaqlar. Räis Şäyxlislamov süzlärenä qarağanda, kiñäşmädä tikşereläçäk töp mäs’älälär bulıp mäğärif belän idäräne kamilläşterü, professional’ belem birüne cämğiät maqsatlarına turı kiterep alıp baru, kadrlarnı üsterü kebek problemalar toraçaq.

Jurnalistlar ministrdan mäktäplärdä ata-analardan cıyıla torğan aqçalar turında da soradılar. Räis Şäyxlislamovnıñ bu xaqta işetep kenä belmägänlege açıqlandı. Misal itep ul onığın balalar baqçasına urnaştırğanda ulınıñ baqçanı tözekländerü öçen aqça birgänen söyläde. Şulay itep, yaña ministr mäğärif ölkäsendäge problemalarnı eçtän belä. Ä menä alarnıñ çişeleş yulların şulay uq äybät küz allıymı-yuqmı – monısın yaqın kiläçäktä kürerbez.

Gölnaz İlgizär

XS
SM
MD
LG