Accessibility links

сишәмбе, 6 декабрь 2016, Казан вакыты 15:12

Könyaq Osetiädä yaña atışular, qorbannar – Gruziä räsmiläre xalıqara konferensiä cıyarğa çaqıra


Üzbilgelängän Könyak Osetiä töbägendä wazğiät qıza bara. Ut tuqtatu turındağı kileşülärgä qaramastan, uzğan töndä anda yaña atışular bulğan, ber gruzin xärbie hälaq bulğan, dürtese yaralanğan dip xäbär itelä. Töbäktäge wazğiätne tikşerü öçen gruzin räsmiläre xalıqara konferensiä cıyarğa çaqırdı.

Sişämbe irtäsendä Tbilisinıñ Rustavi-2 televideniese Könyaq Osetiä xärbiläre gruzinnar yäşägän Eredvi awılına ut açqan, näticädä ber gruzin xärbie hälaq bulğan, öçese yaralanğan, dip xäbär itte. Räsmi Sxinvali kiresençä, berençe utnı Gruziäneñ eçke eşlär ministrlığı xärbiläre açtı, osetinnarnıñ Prisi awılın utqa tottı dip belderä. Atışular berniçä säğät däwam itkän, Könyaq Osetiä yağında yuğaltular turında xäbär itelmi. Bu atışular uzğan comğa ireşelgän ut tuqtatu turındağı kileşüne inde 3nçe tapqır bozu buldı. Tbilsi belderüençä, comğa könnän birle alar yağında barlığı 6 keşe hälaq bulğan. Älege wazğiät 90nçı yıllar başındağı bäreleşlärneñ qabatlanuına kiterergä mömkin digän borçular bar. Düşämbedä Gruziäneñ Saqlanu ministrı Georgi Baramidze Könyaq Osetiä räsmilärenä qırıs kisätü yasadı:

Audio (Georgi Baramidze)

"Bez suğışnı buldırmas öçen barısın da eşlibez. Gruziä xökümäte suğışırğa telämi. Läkin, ägär başqa çara qalmıy ikän, bez separatislarğa cawap biräçäkbez. Çönki bu bezneñ ilebez, häm bu bezneñ xalıq."

Şul uq könne Baramidze telefon aşa Könyaq Osetiä saqlanu ministrı Anatoli Barankeviç belän söyläşte, taraflar ut tuqtatu kileşüen ütärgä kileşkän. Läkin inde äytkänemçä, kileşü şul uq töndä bozılğan. Sişämbe irtäsendä ike saqlanu ministrı Könyaq Osetiäneñ ber awılında oçraşıp, töñge utnı alarnıñ xärbiläre tügel, ä nindider öçençe taraf açqan digän näticägä kilgän. Könyaq Osetiä xökümäte wäkile İrina Gagloeva Azatlıq radiosına bolay dide:

Audio (İrina Gagloeva)

"Baramidze belän Barakeviçğa buysınğan köçlär ut açmağan, alar kileşüne saqlıy. Atular Gruziäneñ Eçke eçlär ministrı İrakli Okruaşvili xärbiläre torğan yaqtan kilgän."

İke ministr töbäktäge qanunsız törkemnären çığarırğa kileşte. Gruziäneñ eçke eşlär ministrlığı xärbiläre bu sanğa keräme-yuqmı äytüe qıyın. Alar anda cinäyätçelek belän köräşü öçen dip kertelgän ide. Sxinvali bu adımnı töbäkne köç belän basıp alu niäte dip atadı. Tbilisi üz näübätendä Könyaq Osetiä räsmilären töbäkne gruzinnardan çistartu tırışlığında ğäyepli. Yağni taraflar ber-bersenä ışanmıy. Xäyer, 1992 yılda ireşelgän Dagomıs kileşüen küzätü öçen 4 yaqlı urtaq komissiä tözelgän ide. Aña Gruziä, Rusiä, Könyaq häm Tönyaq Osetiä wäkilläre kerä. Bu komissiä inde berniçä tapqır oçraştı, tik ber näticägä dä ireşä almadı. Şuşı wazğiättä Gruziä räsmiläre mäsäläne xalıqara säxnägä çığaru tırışlığın kürä başladı. Düşämbedä premier-ministr Zurab Jvania, töbäktäge wağziätne tikşerü öçen tiz arada xalıqara konferensiä cıyarğa çaqırdı:

Audio (Zurab Jvania)

"Gruziä prezidentı qıyu başlanğıç belän çıqtı. Ul könbatış citäkçelären Sxinvali töbägendä tınıçlıq urnaştıru yulların tikşerü öçen xalıqara konfeernsiä cıyarğa çaqıraçaq. Bezneñçä bu çarada Rusiä häm dä Yevropada iminlek häm xezmättäşlek oyışması äğzaları qatnaşırğa tieş."

Jvania şulay uq Könyaq Osetiä citäkçese Eduard Kokoity belän oçraşu täqdimen qabatladı. Kokoity bu täqdimgä älegä ber cawap ta qaytarmadı. Sişämbedä Rusiä tışqı eşlär ministrı Sergei Lavrov bu mäsälädä telefon aşa Quşma Ştatlar däwlät sekretare Colin Powell belän söyläşte. Däwlät departamentı süzçese Tom Casey ike tarafnı da ut tuqtatu turındağı kileşüne ütärgä çaqırdı.

Ali Gilmi, Praga
XS
SM
MD
LG