Accessibility links

якшәмбе, 4 декабрь 2016, Казан вакыты 13:14

Şärıq belgeçläre Tatarstanda näşer itelgän kitaplar belän tanışa


Düşämbe könne Mäskäwdä XXXVII Şärıqnı öyränüçelärneñ xalıqara kongressı açıldı. Anda distälägän illärdän ğalimnär, cämäğät eşlekleläre, jurnalistlar qatnaşa. Şunısın da äytergä kiräk, bu märtäbäle cıyılış Rusiädä ikençe märtäbä ütä. Berençe yulı Şärıq belgeçläre Mäskäwdä 1954 yılda cıyılğan bulğannar. Cıyılışta iñ berençe dokladnı Rusiä Fännär akademiäseneñ Şärıqnı öyränü institutı direktorı R.B.Rıbakov yasağan. Kongress delegatlarına Rusiä prezidentı Vladimir Putinnıñ möräcäğäte, şulay uq Başqortstan, Adıgeya respublika prezidentlarınıñ täbrik xatları uqılğan. XXXVII kongress üz eşen atna buyı däwam itäçäk.

Kongressta qatnaşuçılar fänni oçraşular, söyläşülärdän tış, zur qızıqsınu belän forum ütkän binada — Däwlät xezmäte akademiäsendä oyıştırılğan kürgäzmälär belän dä tanıştı. Mäskäw oyışmalarınnan başqa bu kürgäzmälärne Qazaqstan, Tatarstan häm Qalmıqiä respublikaları äzerlägän. Alar arasında Tatmedia agentlığı oyıştırğan kürgäzmä üzeneñ baylığı häm tematik kiñlege belän uñay tä'sir yasağan. Anda Tatarstan, Qazanğa bağışlanğan, Şärıqnı öyränü fänen kiñ yaqtırtqan Tatarstan näşriätlärendä basılğan 200 dän artıq fänni xezmät urın alğan. Şulay uq Mäskäwdä älege kongressqa bağışlanğan tağın ber qızıqlı kürgäzmä uza. Ul İslam qulyazma kitapları dip atala. Mäskäwneñ Qızıl mäydanında, döresräge, şuşı mäydanda urnaşqan Tarix institutında bara torğan älege kürgäzmädä borınğı quldan yazılğan kitaplar urın alğan.

Gölnaz İlgizär

XS
SM
MD
LG