Accessibility links

шимбә, 10 декабрь 2016, Казан вакыты 04:08

Atışlarnı tuqtatu kileşüenä qaramastan Könyaq Osetiädä yänä ut açıldı


Gruziä belän Könyaq Osetiä köçläre arasında atışlarnı tuqtatu kileşüe köçenä kerergä dä ölgermäde, şunda uq bozıldı da - çärşämbegä qarşı töndä ike yaq arasında yañadan ut açılıp, gruzin yağında 3 ğäskärineñ hälak buluına kiterde. Gruziä dä, Könyaq Osetiä dä monıñ öçen cawaplılıqnı qarşı yaqqa tağa. Ä Tbilisidä küplär nizaqnı çişü yulındağı töp kirtä itep kürgän Rusiä, wäzğiatneñ yaña suğışqa kiterä aluı bar dip kisätä.

Urtaq küzätü komissiäsendä ireşelgän atışlarnı tuqtatu kileşüe bu yulı da qısqa ğömerle buldı, Könyaq Osetiädä atışlar ul ğämälgä kerep 40 minut ütü belän başlandı. Bu kileşü, uzğan atnada ireşelgän häm şulay uq şunda uq bozılğan elekkesen almaştırırğa tieş ide. Anda 1992-nçe yılğı Dagomıs kileşüendä qaralğança, Könyaq Osetiädän bar qorallı törkemnärne, şul isäptän Gruziä eçke eşlär ministrlığınıñ ğäskärlären dä çığaru xaqında kileşende. Räsmi Tbilisineñ yün ayında töbäkkä näq menä şul köçlärne cibärüe kierenkelekneñ kinät artuına kiterde. Gruziä xökümäte monı, Rusiä çige aşa barğan yäşeren säwdäne häm Könyaq Osetiädäge grizun xalqın cäberläwne tuqtatu öçen eşläwen belderde, osetin yağı isä Tbilisi qararın, töbäkkä höcüm äzerläwneñ berençe adımı dip qabul itte. Çärşämbegä qarşı töndä başlanğan atışlar, gruzinnar arasındağı yuğaltular sanın 9-ğa citkerde, bu yulı anda 3 keşe hälak buldı dip xäbär itelde. Osetin yağı älegä üzendä andıy ülem-citemneñ bulmawı xaqında belderä. Soñğı atışlar tağın şunıñ belän dä iğtibarnı cälep itä - ut bu yulı Rusiäneñ şul töbäktäge tınıçlıq saqlaw köçlärenä dä açılğan. Alarnıñ matbuğat wäkile Nikolay Baranov, utqa Rusiä köçläreneñ ike nığıtması totıldı, läkin yuğaltular yuq dip belderde. Tbilisidä küplär Rusiäne Könyaq Osetiä eşlärenä tıqşınuda häm anda Gruziägä qarşı käyeflärne küpertüdä ğäyepli. Mäskäw zamanında Könyaq Osetiä xalqınıñ şaqtıy öleşenä Rusiä watandaşlığın birgän ide. Xäzer ul beryaqtan, alarnıñ iminlegen qayğırtırğa da tieş, ämma ikençe yaqtan, Çeçnä belän barğan suğış häm üz bötenlegen saqlaw tırışlıqları sürätendä, Kavkazda yaña kierenkelek çığanağın da telämi. Sişämbe könne Rusiäneñ saqlanu ministrı Sergey İvanov bu xaqta bolay dip belderde.

Audio, Sergey İvanov

Rusiä, şulay itep, Könyaq Osetiädäge kierenkelek älegä küzallamaslıq näticälärgä kiterä ala dip kisätä häm anıñ Könyaq Osetiädäge tırışlıqları Quşma Ştatlar tarafınnan da yaqlana dip belderä. Däwlät departamentı wäkile Adam Ereli dä sişämbedä, Washington häm Mäskäw, yaqlarnı nizaqnı üzara aralaşıp xäl itügä künderü eşen bergäläşep alıp bara dide. Läkin Tbilisi Rusiäneñ Könyaq Osetiä eşlärendä qatnaşuına torğan sayın tiskäre möğämälä kürsätüen däwam itä. Çärşämbe könne Gruziäneñ eçke eşlär ministrı İrakli Okruaşvili "Kavkaz Press" xäbärlär agentlığına, soñğı märtäbä utnı ğomumän Rusiäneñ tınıçlıq saqlaw köçläre açtı dip belderde häm kilep tuğan wäzğiatne isäpkä alıp gruzin yağı, üzeneñ töbäktäge ğäskärlären älegä anda qaldırıp toraçağın äytte. Könyaq Osetiäneñ saqlanu ministrı Anatoli Barankeviç isä Rusiä televideniäsenä, hälak bulğan gruzinnar üz xärbiläre açqan uttan ülde dip belderde. Ber-bersen ğäyepläwdän tış yaqlar Könyaq Osetiädä, ber tarafqa da buysınmağan "öçençe köç" buluı, atışlarnı ul başlaw ixtimalı xaqında da söyli.

Kärim Kamal
XS
SM
MD
LG