Accessibility links

шимбә, 10 декабрь 2016, Казан вакыты 17:44

Tatarstan hawa şirkätläre 20 awgustta satılmayaçaq


Avgustnıñ 20senä bilgelängän tarixi waqiğa, bulmıy qaldı. Bu xaqta 18 avgust kiçendä bilgele buldı. İnde xäbär itkänebezçä, «Qazan» hawa alanı häm «Tatarstan» avia şirkätläreneñ 100% aksiäläre satuğa çığarılğan ide. Alış-bireş näq menä avgustnıñ 20sendä bilgelände, ämma 2 kön qala auksionnıñ ütkärelmäwe xaqında iğlan itelde. Tatarstan küge ber kemgä dä kiräk tügelme? 19nçı avgust gazetaları şundıy baş isemnär belän çıqtı? Hawa alannarın satıp aluçılar bulmağanmı, ällä moña başqa säbäplär qomaçaw itkänme? Küzätüçelär törle-törle qaraşlar belderä. Küçemsez milek mäsälläre belän şöğellänüçe ministrlıq xäbär itüençä, auksionğa qatnaşırğa teläweçlär bulsa da, alar dokumentlarnı tieşle itep äzerläp betermägän bulğan. Ministrlıq xezmätkärläre töp säbäpne, 531 meñlek şirkätlärne satıp alu turındağı qarar xaqında uylanırğa häm anıñ öçen dokumentlılarnı äzerläwgä waqıt citmäwdä kürä. Şul uq çığanaqlar, soñraq, yaña auksionnı ütkärü turında iğlan yañğırawın farazlıy. Bu xaqta İntertat.ru agentlığı xäbär itte. Ä menä «Kommersant» gäziteneñ Tatarstan quşımtası, alış-bireşenneñ bulmıy qaluında başqa faktorlarnıñ ğäyeben kürä. Gäzit, cirle belgeçlärgä sıltaw yasap, idän astı köräşenä iğtibarnı yünältä. Bu basmanıñ çığanaqları xäbär itkänçä, «Qazan» hawa alanın häm «Tatarstan» avia şirkäten «Russkiy standart» digän bank satıp alırğa telägän. Anıñ belän söyläşülär, bik küptännän barğan ikän. Yäğni auksion iğlan itelgänçe. Millek häm cir eşläre ministrı da, matbuğat oçraşularınıñ bersendä, ber zur investornıñ buluı xaqında beldergän bulğan.

Ämma, şul uq ministr, 20nçe avgustqa 2 kön qala, Qazan aeroportın satudan alu turında boyırıq çığara. Soñınnan, satıp aluçılar bulmadı, dip «Tatarstan» hawa şirkäte öçen bäygeneñ bulmawı açıqlana. Ministrlıq wäkilläre xäbär itkänçä, investorlar bulsa da, eş söyläşülärdän arı barmağan. «Kommersant» gäzite xäbär itkänçä, respublika xakimiätläre avia şirkätlären alırğa telägän «Russkiy standart» bankı belän urtaq fikergä kilä almağan. Satuçı häm satıp aluçı arasındağı qarşılıq ta, bäyä mäs’äläsendä bulmağan. «Tatarstan» hawa şirkäte ustav kapitalınnan 5 tapqırğa artığraq bäyägä satıla başlarğa tieş ide. Monda süz 460 million sum turında bara. Ä «Qazan» hawa alanıñ bäyäse ustav kapitalına täñgäl 74 million tiräse sumğa çığarılğan ide. «Kommersant» farazlağança, «Ruskiy standart» bankı üze auksionda qatnaşudan baş tartqan, çönki anıñ citäkçelege alışınğan.

«Azatlıq» radiosınıñ räsmi bulmağan çığanaqları xäbär itkänçä, auksionnı ütkärmäw - Tatarstan xakimiätlärenä yaqın cirle eşmäkärlär teläge bulğan. Kemneñ boyırığı belän bäyge ütkärelmi qalğan, räsmi bulmağan çınraqlarıbız xäbär itmi.

«Qazan» hawa alanı da, «Tatarstan» hawa şirkäte dä, investitsiälärgä moxtac bulsa da, inde xäzer uq, tabışlı eşli ala. Räsmi sannar kürsätkänçä, ütkän yılda «Tatarstan» avia şirkäte 17,8 million sum tabış alğan. 2004 yılğa şirkät keremneñ tağı da arttırırğa digän plan qora. «Qazan» hawa alanın finans xäle isä şäptän tügel. Ütkän yılda ul 127 million sum kerem alsa, 20 millionın zıyanğa eşlägän. 2004 yılda «Qazan» hawa şirkäte keremne arttırıp, tabış alırğa isäpläp tora.

Cirle belgeçlär äytkänçä, şuşı ike avia şirkättä, investitsiälärne cälep itü belän bergä, bulğan xucalıq belän näticäle idärä itü mäs’äläse dä tora.

Bikä Timerova.

XS
SM
MD
LG