Accessibility links

җомга, 9 декабрь 2016, Казан вакыты 02:57

Mäskäwneñ Çeçnä saylawlarındağı nämzäte anda irekle iqtisadi zona buldırunı täqdim itä


Çeçnädä yaña prezident saylawları köne yaqınlaşqan sayın, Mäskäwneñ dä anda üz nämzäten, Alu Alxanovnı yaqlaw tırışlıqları arta bara. Cämäğätçelektäge här eşe Rusiä mäğlümat çaralarında kiñ yaqtırtılğan şuşı ähel, Mäskäwdäge çäçännär belän oçraştı häm şunda üzeneñ Çeçnä kiläçägen niçek itep kürüenä bağışlap matbuğat oçraşuı ütkärde.

Mäskäw Kremle çäçän prezidentlığına üz keşesen quyu eşendä ällä ni oyalçanlıq kürsätmi häm Alu Alxanovnıñ şuşı ay azağında uzaçaq saylawlarda ciñep çığuı öçen xälennän kilgäneneñ barın da eşli. Çeçnäneñ eçke eşlär ministrı bulıp torğan Alxanov mäğlümat çaralarında, berençe çiratta televideniädä şundıy yış kürenä ki, qalğan altı nämzät bu xaqta xätta xiallana da almıy. Çärşämbedä ul Mäskäwgä kilep andağı çäçännär belän oçraşu ütkärde. Beroçtan Alxanov matbuğat oçraşuı da oyıştırıp, cıyılğan xalıqnı üzeneñ säyäsi maqsatları belän dä tanıştırdı. Prezident itep saylanğan oçraqta ul töp östenlekne iqtisadi ölkägä, Çeçnädäge xucalıqnı torğızuğa biräçägen belderä häm şul maqsatqa ireşü, töbäkkä yaña investitsiälär cälep itü öçen anda irekle iqtisadi zona buldırırğa tırışaçağın äytä.

Audio, Alu Alxanov

Kremlneñ Çeçnä saylawlarındağı töp nämzäte üz çığışında kiläse biş yılda töbäktäge eşsezlekne dä kisken räweştä kimetäçägen wäğdä itte. Bügenge köndä bu san 70 protsent tiräsendä, Alxanov kiläçäktä 150 meñ eş urını buldırıp eşsezlek däräcäsen 15 protsentqa töşeräçägen äytä. Şuşı eşlärendä ul çittäge çäçännär yardämenä dä ömetlänä häm alarnı, Çeçnäne torğızu eşendä qatnaşu öçen watannarına qaytuğa öndi.

Audio, Alu Alxanov

Çın saylawaldı cıyını ruxın birep Alxanov Mäskäw çäçännären, respublikada alarnı nindi säyäsi qaraşlarda torularına iğtibar itmi kötäçägen, çittän qaytqannarğa da eş tabu mäs''äläsendä bertigez şartlar tudırılaçağın wäğdä itä.

Audio, Alu Alxanov

Çeçnädä däwam itkän totrıqsızlıq säbäple Alxanovnıñ şuşı täqdimen qabul itüçelär älegä küp bulmasqa oşap tora. Läkin berük waqıtta ul andağı nizaqqa säyäsi çişeleş tabarğa tırışuın da kürsätä. Misal öçen ul, bäysezlek tarafdarları citäkçese Aslan Masxadovqa solıx qulın suzarğa äzer buluın belderä. Monıñ şartı itep Alxanov, Masxadovnıñ elekke xataların tanuın quya. Mäskäw Kremle nämzäteneñ 29-nçı awgust uzaçaq tawış birüdä ciñäçäge küplär öçen inde xäl itelgän närsä bulıp tora. Läkin anıñ çärşämbedä bäyän itkän säyäsi maqsatların ğämälgä quyuı, birgän wäğdälären ütäwe, monısı inde başqa mäs''älä. Radiobıznıñ Tönyaq Kavkaz bülegendä eşläwçe xezmätkäre Xasin Raduyev, Alu Alxanovnıñ kiläçäktä uñışqa ireşü-ireşmäwe, keçe Qadırovqa buysınğan meñlägän qorallı särdarnıñ yaña prezidentqa tuğrı bulıp qaluına bäyle dip isäpli.

Audio, Xasin Raduyev

Raduyev fikerençä, Kavkazdağı, bigräk tä Çeçnä häm Dağstandağı wäzğiat şundıy ki, keşe anda citäkçe itep, üze tiräsendä küpmeder qorallı särdar bulğanda ğına tanıla ala. Sez anı prezidentnıñ iminlek xezmäte dipme, ällä inde başqaça atıysızmı, anısı möhim tügel. Andıy köçsez, andıy yaqlawsız Alu Alxanovqa Çeçnäneñ çın citäkçesenä äylänü bik awır bulaçaq, di Xasin Raduyev. Üzen Mäskäw kiläçäktä dä yaqlağan oçraqta Alxanovnıñ şundıy qorallı yädräse wazifaların Çeçnädäge federal'' köçlär üti ala.

Kärim Kamal
XS
SM
MD
LG