Accessibility links

Ğiraqnıñ waqıtlı kiñäş şurası saylanıp tügel, bilgelänep quyıldı


Bagdadta 4 kön barğan ilküläm konferensiä çärşämbedä, nixayät eşen tämamladı. Meñnän artıq delegatnıñ wazifası ilneñ waqıtlı şurasın saylaw ide. Bu şura xökümätneñ eşen küzätep barırğa tieş. Kön axırında şura tözelde, dip iğlan itelde. Tik anıñ tözelü räweşe küplärdä rizasızlıq uyattı. Çönki ul saylanıp tügel, bilgelänep quyıldı. Tänqitçelär fikerençä, bu şura xökümätneñ külägäse bulaçaq.

3 köngä başqalağa cıyılğan Ğiraqnıñ törle säyäsi häm dini törkemnären wäkillek itkän 1300läp delegat ilneñ waqıtlı şurasın saylarğa tieş ide. 100 keşelek bu şura kiläse saylawlarğa xätle xökümätneñ eşen küzätergä tieş. Şuranıñ 19 äğzası aldan bilgele ide – ul Quşma Ştatlar tarafınnan bilgelängän elekke İdarä şurası äzğzları. Qalğan 81en delegatlar saylası ide. Şuşı nazmätlär tiräsendä qaynar bäxäslär quptı, delegatlarğa 3 kön citmäde, cıyın 4 köngä suzıldı. Qayber bäysez delegatlar zur partiälär basımına protest belderep cıyınnı taşlap çığıp kitte. Cäwdät Äl-Ğöbäydi şularnıñ berse:

Audio (Cäwdät Äl-Ğäbäydi)

"Bez Äl-Moltaqa demokratik partiäne wäkillek itäbez. Bez cıyınnı taşlap kitergä qarar ittek, çönki monda xakimiättäge partiälär östenlek itä. Cıyınnı äzerläw komitetı bu mäsäläne xäl itä almadı. Bez bu protsessnı taşlap kitäbez, çönki ul Ğiraq cämğiäten döres çağıldırmıy."

Başta delegatlar saylaw protsedurası turında bäxäsläşte, här namzätne ayırım saylarğamı, ällä isemlek belänme? İsemlek digäç, bäxäslär törle isemleklär tiräsendä başlandı. Alar yä xatın-qızlar az dip, yä ul bareber ütmiäçäk, dip ber-ber artlı kire qağıldı. Axır çiktä, çärşämbe kiçendä oyıştıruçılar, nigezdä xakimiättäge partiä wäkillärennän torğan yaña isemlek tözede. Läkin ul da tawışqa quyılıp tormadı, näticä dip iğlan itelde. Yaña Ğiraqnıñ berençe saylaw protsedurası dip kötelgän bu tamaşa küplärdä rizasızlıq uyattı. "Yaña Sabah" gäzite möxärrire İsmail Zäyer delegatlarnıñ berse ide:

Audio (İsmail Zäyer)

"Bez üzebezneñ namzätlärne isemlekkä kertä almadıq. Bezneñ ike mömkinlek bar ide: yä zur partiälär isemlegenä kerü, yä alar belän tawış birüdä köräşü."

Xäyer, citeşsezleklär bulsa da, qayberäwlär bu admıda uñay täräqqiät kürä. Ğiraq İdarä şurasınıñ elekke äğzası, bäysez körd aktivistı Mäxmüt Otman bolay di:

Audio (Mäxmüt Otman)

"Älbättä monı çın demokratik ğämäl, härkem qänäğät, dip äytep bulmıy, şulay da bu ber adım alğa atlaw."

Şulay itep, Ğiraqnıñ waqıtlı kiñäş şurası saylanıp bulmasa da, bilgelänep quyıldı. Tänqitçelär äytüençä, ul nigezdä xakimiättäge partiä wäkillärennän tözelgän, yağni mäsälän, xökümätne küzätergä tieş bulsa da, çınbarlıqta anıñ közgese, şäwläse bulıp tora. Şuranıñ wazifaları çiklängän: xäkümätneñ eşçänlegen küzätü, kiräk bulsa 3-tän-2 tawış belän anıñ qararlarına veto salu, kiläse yılnıñ büdjetın raslaw. Waqıtlı xökümät şikelle ük, waqıtlı şura da kiläse yılnıñ ğinwarında ütäçäk saylawlarğa qädär ğämäldä bulaçaq.

Ali Gilmi, Praga
XS
SM
MD
LG