Accessibility links

якшәмбе, 11 декабрь 2016, Казан вакыты 07:07

Sadr suğışçıları imam Ali törbäsennän kitsä dä, qoral taşlarğa cıyınmıy


Şiği citäkçe Moqtada Äl-Sadr Ğiraq xökümäteneñ qoral taşlaw taläben kire qaqqannan soñ, uzğan töndä amerikan oçqıçları ğisyançılarnıñ Nacaftağı nığıtmaların utqa tottı. Sönnilärneñ Falluca qalasında häm Bagdadnıñ şiği bistäsendä atışular comğa könne dä däwam itte. Comğa kişçendä ğisyançılar Nacaftağı İmam Ali törbäsen qaldırıp kitte, anda Ğiraqnıñ politsiä köçläre kerde.

Nacaf qalasında atışu tawışları comğa irtäsendä dä işetelde. Bäreleşlär şiği möselmannar öçen isze sanalğan İmam Ali törbäsennän yıraq bulmağan urında bardı. Bu törbäne ğisyançılar ike atna buyı sıyınu urını itep tottı. Kilgän xäbärlärgä qarağanda bügen Moqtada Äl-Sadr törbäneñ açqıçın Ayatolla Ali Äl-Sistani keşelärenä tapşırırğan. Bu xaqta anıñ süzçese Äxmät Äl-Şäybani xäbär itte. Ämmä anıñ süzlärençä, törbädän kitü qoral taşlawnı añlatmıy. Atnakiç könne Äl-Sadr Ğiraq xökümäteneñ qoral taşlaw taläben kire qaqtı. Bu belderüdän soñ amerikan oçqıçları ğisyançılarnıñ Nacaftağı nıgıtmaların utqa tota başladı. Nacafta hawa xöcüme tañ atuğa tındı. Ä menä Bagdadtan 65 çaqırım yıraqlıqta, sönnilär nığıtması sanalğan Fallucada xöcümnär comğa irtäsendä dä däwam itte. Andağı xastaxanä tabibı äytüençä, bäreleşlär waqıtında kimendä 5 keşe hälaq bulğan, tağın 6-sı yaralanğan. Bagdadnıñ üzendä isä, Moqtadanıñ ätise xörmätenä Sadr bistäse dip atalğan şiği öleşendä atışular şulay uq comğada da bardı. Amerikan xärbie Denis Pitdorn bu xärbi operatsiä turında Reuters agentlığına bolay dide:

Audio (Denis Pitdorn)

"Xäzerge waqıtta koalitsiä köçläre Moqtada Äl-Sadrnıñ qanunsız törkemnärenä qarşı operatsiä alıp bara. Maqsat – şähärdä xökümät eşçsenlegen, normal tormış qaytaru, keşelärne qanunsız suğışçılarnıñ üç aluınnan qotqaru."

Äl-Sadr suğışçıları xökümät ultimatumın kire qaqqannan soñ waqıtlı premier-ministr Ayad Allawinıñ köç qullanudan başqa çarası qalmıy şikelle. Ämmä bu adım, bigräk tä aña amerikannar qatnaşsa, şiğilarda yaña näfrät xisläre uyataçaq. Kilgän xäbärlärgä qarağanda Nacafta da, 2 million çaması xalqı bulğan Sadr bistäsendä dä şiğilär baş iärgä cıyınmıy, kiresençä, axırına qädär suğışırğa äzerlek belderä. Sadr bistäseneñ Möxämmät Abdulla isemle ber keşese comğa könne bezgä bolarnı äytte:

Audio (Möxämmät Abdulla)

"Bez şähärebezdä amerikannar toru belän kileşä almıybız. Zamanında Baatçılarğa da qarşı idek. Ä inde çit il keşelären, basıp aluçılarnı niçek qabul itik. Amerikannarnıñ tankları çat sayın tora."

Ul arada könyaqtağı Basra qalasında Ğiraq Neft şirkäte binasına ut törtelgän, digän xäbär kilde. Şirkät wäkilläre äytüençä, bu oçraqlı yanğın bula almıy, çönki bik köçle, monı Äl-Sadr suğışçıları eşlägän bulırğa tieş, di alar. Kön urtasında Ğiraqnıñ sälämätlek ministrı uzğan täwlek eçendä Nacafta bulğan bäreleşlär näticäsendä kimendä 77 ğiraqlı hälaq bulğan, tağın 70e yaralanğan digän belderü yasadı. Amerikan xärbiläre äytüençä, soñğı ike köndä Ğiraqnıñ Äl-Anbar töbägendä ike amerikan diñgezçese hälaq bulğan. Comğa kiçendä kilgän xäbärlärgä qarağanda, Ğiraq politsiäse İmam Ali törbäsenä kergän. 400läp suğışçı totqarlanğan dielä, ämmä alar araısnda Moqtada Äl-Sadr yuq.

Ali Gilmi, Praga
XS
SM
MD
LG