Accessibility links

җомга, 9 декабрь 2016, Казан вакыты 06:52

Mäskäw kisätüennän soñ Gruziä üz ğäskärlären Könyaq Osetiädän çığara


Atnadan artıq atışlar barğan Könyaq Osetiädä comğa kön çağıştırmaça tınıç ütte. İke yaq ta Gruziä ğäskärläreneñ elekke torğan taraflarınnan kitüen raslıy. Kierenkelek Rusiä räsmi Tbilisine, yaña qorallı nizaq başlanu ixtimalı belän kisätkännän soñ kimi başladı dip xäbär itelä. Läkin Gruziä prezidentı Mixail Saakaşvili üzeneñ Könyaq Osetiä häm Abxaziädä yañadan gruzin xakimiaten urnaştıru telägennän waz kiçmiäçägenä işarä itä, şuña kürä gruzin ğäskärlären çığaru waqıtlı ğına da bula ala.

Şuşı atnada berençe märtäbä Könyaq Osetiädän comğa könne yaña atışlar turında xäbärlär kilmäde. İke yaq ta - gruzinnar da, osetinnar da - tönneñ tınıç qına ütüen rasladı. Könyaq Osetiä başqalası Tsxinvalidäge xakimiat wäkilläre, Gruziä atnakiç köçle atışlar barğan töbäktän üz ğäskärlären çığara başladı dip belderde. Prezident Saakaşvili bu uñaydan, gruzin yağınıñ şuşı ğämäle anıñ Könyaq Osetiä belän nizaqnı tınıç yullar aşa çişärgä teläwen kürsätä dide, ämma şunda uq üz sabırlığınıñ betä baruına işarä itte.

Audio, Mixail Saakaşvili

"Gruziäneñ üz ğäskärlären çığaruı, bezneñ köndäşlärne, töbäktäge wäzğiatne kierenkelätüdä bezne ğäyepläw mömkinlegennän mäxrüm itä. Min şunı ğına äytergä telim - bu tınıçlıq öçen soñğı mömkinlek häm min provokatorlarnıñ monı yaxşı itep añlawın telär idem" dip kisätä Gruziä prezidentı. 90-nçı yıllar başında suğış kiçergän häm şunnan soñ üzendä, 1992-nçe yılğı Dagomıs kileşüe nigezendä, Rusiäneñ tınıçlıq saqlaw köçlären urnaştırğan Könyaq Osetiädä kierenkelek yün ayında, Gruziä xökümäteneñ anda üz ğäskärlären kertüe qararınnan soñ arta başlağan ide. Tbilisi monı çik aşa barğan yäşeren säwdäne tuqtatu häm töbäktäge gruzin awılların yaqlaw kiräklege belän añlattı. Saakaşvilineñ Acarstannı niçek ciñel genä üz qaramağına qaytaruın kürgän Könyaq Osetiä monı, räsmi Tbilisineñ anıñ belän dä näq şulay eşlärgä cıyınu bilgese bularaq qabul itte. Könyaq Osetiädäge xalıqnıñ şaqtıy öleşe Rusiä watandaşı da bulıp tora, Sovetlar berlege tarqalğannan birle töbäk yä bäysez bulunı, yä Rusiägä quşılunı taläp itep kilde. Şuña kürä dä gruzin citäkçelege Könyaq Osetiädäge xällärne, eçke gruzin-osetin tügel, ä Grusiä-Rusiä nizağı itep sürätlärgä häm xalıqara cämäğätçelekkä dä şulay itep kürsätergä tırışa. Ul oçraqta Tbilisi, Rusiäneñ kolonial'' ımsınularına işarä itep, dönyada kiñräk yaqlaw qazana aluına, aradaşçı itep Quşma Ştatlarnı, Yevropa Berlegen cälep itügä ömetlänä. Läkin çärşämbedä Rusiä prezidentı Vladimir Putin Saakaşvilineñ şuşı omtılışlarına kisken cawap qaytardı, Könyaq Osetiä nizağı ul Tbilisi belän Tsxinvali arasında xäl itelergä tieş mäs''älä bulıp tora, Rusiä moña yardäm genä itä, aradaşçı ğına bula ala dip belderde häm berük waqıtta Grusiä xökümäten kisätep, Kavkazda yaña qorallı nizaq çığaru tırışlıqlarınnan waz kiçärgä öndäde. Gruzin yağınıñ atnakiç yawlap alğan biekleklärdän üz ğäskärlären çığaruı şunnan soñ başlandı. Alar xäzer Tsxinvalidän 25 çaqrımda yatqan Gori şähärendä tuplanaçaq. Gruziä eçke eşlär ministrı İrakli Okruaşvili, ägär kiräk bula qalsa alar Könyaq Osetiägä 15 minut eçendä kilä alaçaq dip belderä.

Kärim Kamal
XS
SM
MD
LG