Respublika citäkçeläre äytüençä, Avgust kiñäşmäseneñ Alabuğa şähärendä ütüe , bu şähär xalqınıñ soñğı 3-4 yılda bik uñışlı eş alıp baru näticäse. Çınlap ta bu şähärdä 2 könlek kenä bulğan säfärdä dä Alabuğanıñ maturlanuı , yämlänüe küzgä taşlana. Alabuğa pedagogika universitetınıñ sport binası açıluı, şulay uq eşçe hönärlären yañaça uqıtu buyınça uqu kombinatınıñ yaña binası açıluı ,”Boz sarayı”na nigez taşı salu , ipoteka programması buyınça yäşlärgä matur yortlar saluları da, alabuğalılarnıñ fidaqär xezmäteneñ kürsätkeçe bulıp tora. Alabuğa şähärendä sänğät mäktäbe açılu belän bergä , 1 sanlı tatar gimnaziäse açıluı da , kübräk ruslar yäşägän şähärdä tatar xalqınıñ milli mänfäğät ä’säläläreneñ nindi räweştä çişeleş tapqanın kürsätä. Bıyıl mäktäp partaları artına 474 meñ bala utıraçaq. Uquçılar sanı bıltırğığa qarağanda 29 meñ balağa kim buluğa qaramastan, respublikada bıyıl 4178 balağa 22 yaña mäktäp açu, häm 2 sänğät mäktäbe ,400 bala tärbiälänerlek mäktäpkäçä yäştäge balalar öçen balalar baqçaları tözü qaralğan. Kiñäşmädä respublika citäkçeläre belän bergä xalıq deputatları, ministrlıqlarnıñ häm zur sänäğät şirkätläreneñ citäkçeläre , şähär başlıqları da qatnaştı. Kiñäşmädä ber säğätlek tirän eçtälekle çığışınnan soñ jurnalistlarğa Tatarstan Prezidentı Mintimer Şäymiev bolay dide. : “Bıyıl avgust kiñäşmäsenä çığarılğan tema zur ähämiätkä iä. Çönki sänäğättä , iqtisadta bik zur üzgäreşlär bara.Yaña zaman taläp itkän cihazlar, yaña texnologiälär kertep eşlärgä tırışabız. Ä şul uq waqıtta bezneñ anda eşlärlek tieşle äzerlekle bulğan kadrlar citeşmi.Şunıñ öçen bezgä belem birü ölkäsendä bügenge köngä kiräk bulğan eşçe hönärlären yaña texnik cihazlar belän eş itärlek , yaña texnologiälärne üzläştergän belgeçlär äzerläwgä yünältergä kiräk. Şul waqıtta ğına bezneñ respublika konkurentsiäne ciñä ala torğan respublika bula ala”.-dide ul.Tatar tele häm ädäbiäte uqıtuçısı Tat'yana Bojedumovanıñ çığışı kiñäşmäneñ sensatsiäse buldı. Rus qızı Tat'yana Arxangel' ölkäsennän änise belän Çallığa kilep yuğarı belem alğan. Xäzer 10 sanlı Çallı mäktäbendä Tatar tele häm ädäbiäte uqıtuçısı bulıp eşli. Başta üzen uqıtqan uqıtuçılarğa räxmäten belderde. Häm tatar telen başqa millät balalarına öyrätüneñ serläre belän urtaqlaştı.Här avgust kiñäşmäsendä mäğärif xezmätkärlärenä maqtawlı isemnär tapşıralar. Alabuğada uzğan kiñäşmädä şunıñ östäwenä veteran uqıtuçı Dmitriy Tarasov belän bergä yäş muzıka uqıtuçısı öç bala atası Färit Äxmärovqa yaña tözelgän yorttan order häm fatir açqıçı tapşırdılar.Azatlıq radiosı Mälikä Basıyr, Qazan.
