Accessibility links

шимбә, 3 декабрь 2016, Казан вакыты 03:26

Paqstan Al Qaida suğışçıların qulğa alıp terror höcümnären buldırmıy qaluın belderä


Räsmi İslamabad, Al Qaida belän bäyläneştä buluı şiklänelgän 10 keşeneñ qulğa alınuı arqasında – Paqstanda berniçä terror höcüme bulmadı, yözlägän keşe isän qaldı, dip belderde. Prezident Pärwäz Möşärräf, Paqstan xökümäte häm AQŞ ilçelege urnaşqan binalarğa plannaştırılğan intixar höcümnäre buldırılmağan. Şulay uq räsmi xäbärlärgä qarağanda, Äfğanstan belän çiktäş töbäklärdä barğan xärbi çaralar anda terror çeltären taratırğa yardäm itkän. Näq şular turında söyläşülär uzdırır öçen İslamabadqa Äfğan prezidentı Hamid Qarzai kilgän könnärdä, Könyaq Aziädäge ber terror belgeçe, Paqstan räsmiläreneñ bu belderülären şik astına quya.

Paqstan eçke eşlär ministrı Faisal Salh Hayyat süzlärenä qarağanda, bu ayda qulğa alınğan Al Qaida äğzaläre buluda şiklänelgän 10 keşe – il buylap ğısyan oyıştırırğa, prezident Pärwaz Möşärräf xökümätenä qarşı çığıp ilne totrıqsızlandırırğa cıyınğan bulğan. Mäğlümat ministrı Şeix Räşid Äxmäd, räsmilär – 14nçe avgust, Bäysezlek Köneneñ tınıç ütüe öçen aldan uq çaralar kürde, dide: (audio) "Bu keşelär Rawalpindi häm İslamabad şähärendä terror höcümnäre plannaştırğan. Alar Bäysezlek könendä yözlägän keşeneñ ğömeren özep qan ağızırğa cıyınğan." dide Paqstannıñ mäğlümat ministrı.

Xädäflär arasında Quşma Ştatlar ilçelege, prezident Pärwäz Möşärräf rezidensiäse, xärbi köçlär başlığı utırğan bina häm "Lal Haveli" dip atalğan Rawalpindi''dağı tarixi ber urın bar ide, dide ministr. Anda ğadättä Bäysezlek Könendä feyerverk qarar öçen küp keşe cıyıla.

Paqstan mäğlümat ministrı Äxmäd süzlärenä qarağanda, iminlek köçläre bik küp qoral tapqan, alar arasında – bomba, şartlatqıçlar, granata, raketa atqıçlar häm bolar belän çittän torıp idarä itü cihazları. Şulay uq intixarçılar tağa torğan şartlatqıçlar quyılğan qayeşlar da tabılğan. Bolarğa qatnaşı bulğan tağın 4 keşene ezläw däwam itä, alarnıñ berse – höcümnär öçen qoralnı Äfğanstannan kitergän buluda şiklänelä, dide Äxmäd: (audio) "Bez qoral taptıq, xäzer tağın berniçä keşene ezlibez." dide Paqstan mäğlümat ministrı.

Prezident Möşärräfkä qarşı yanawlarnıñ bu berençese genä tügel inde. 2001neñ 11nçe sintäberendä AQŞ Äfğanstandağı Taliban rejimına qarşı suğış iğlan itkäç tä Paqstan Quşma Ştatlar yağına bastı. Uzğan dikabr ayında Möşärräfkä qarşı 10 kön eçendä oyıştırılğan 2 höcümdä 17 keşe hälak bulğan ide. Şunnan birle Möşärräf terrorğa qarşı çaralar başlattı häm soñğı 5 atna eçendä genä dä Al Qaida äğzaläre buluda şiklänelgän 60tan artıq keşe qulğa alınğan, alarnıñ berniçäse – terror çeltäreneñ yuğarı äğzaläre dip xäbär itelä. Paqstan mäğlümat ministrı süzlärenä qarağanda, äle dä däwam itkän xärbi çaralar – Al Qaida wäkilläreneñ şähärlärä kitüenä dä säbäp bulğan. Misal öçen, alarnıñ kübese moña qadär qaçıp yatqan Könyaq Waziristan vilayätennän kitep ölgergän.

Ämma Dählidäge terror mäs''äläre belgeçe, Rahul Bedi, Paqstan xärbi çaralarınıñ monıñ qadär uñışlı bulğanın şik astına quya: (audio) "Çınbarlıqta Paqstannıñ xärbi köçläre soñğı aylarda zur yuğaltularğa duçar buldı. Cirle ğısyançılarğa qarşı köräştä zur artqa kiteş sizelä. Minemçä, ğaskär başlıqları şuşı uñışsızlıqlarnı – ğısyançılarnıñ şähärlärgä qaçuı belän bäylärgä tırışa. Ämma bu citdi säbäp tügel," dide terror belgeçe Rahul Bedi. Bedi Londonda urnaşqan Janes isemle terror häm iminlek mäs''äläleren küzätep baruçı agentlıq öçen eşli. Anıñ fikerençä, mondıy belderüläre belän räsmilär alğa taba ixtimal höcümnärdän häm alarğa qarata bulaçaq täñqittän üzlären aldan uq saqlap qalırğa teli: (audio) "Şundıy tä''sir tudıru – Paqstan faydasına bula ala. Xärbi çaralarda alğa kiteş yuq. Bu Paqstan öçen genä tügel – ä böten Könyaq Aziä töbäge öçen dä qulay – qotqığa birelmäs öçen şundıy belderülär yasaw. Berär närsä bula qalsa – alar "bez sezne aldan kisättek" dip äytä alaçaq. Ber ni dä bulmasa – alar "ber ni dä bulmasın öçen bez aldan çaralar kürdek" dip äytäçäk. Niçek kenä bulsa da – räsmi xakimiätlär öçen bolar barısı da faydağa ğına," dide terror belgeçe Bedi.

Äfğan prezidentı Hamid Qarzai bügen ike könlek säfärgä İslamadqa kilde. Söyläşülär – ike ilneñ urtaq çik buyında xärbi xezmättäşlek yulları tiräsendä bara. Äfğan räsmiläre Paqstannı , yözlägän Al Qaida häm Taliban suğışçılarına sıyınu birüdä ğayeplägän ide. Paqstan isä – ildä terrorçılarğa qarşı uzdırğan çaraları belän monı kire qağırğa tırışa.

Alsu Qormaş
XS
SM
MD
LG