Accessibility links

пәнҗешәмбе, 8 декабрь 2016, Казан вакыты 17:08

Nacafta amerikan xärbiläre belän şiği ğisyançılar arasında bäreleşlär däwam itä


Düşämbedä amerikan oçqıçları Nacafta şiği ğisyançılarnıñ nığıtmaların utqa tottı. Kilgän xäbärlärgä qarağanda amerikan tankları şiğilarnıñ izge urını sanalğan imam Ali törbäsenä yaqınaya. Moqtada Äs-Sadr suğışçıları anı sıyınu urını itep qullanğan ide. Törbäne ruxanilarğa tapşıru söyläşüläre körçekkä terälgän dip xäbär itelä. Äs-Sadrnıñ üzeneñ qayda ikäne bilgesez.

Nacaftan kilgän xäbärlärgä qarağanda ğisyançılarğa qarşı suğışqan amerikan xärbiläre düşämbedä imam Ali törbäsenä yaqınayğan. Şiğilär öçen izge sanalğan bu urınnı Moqtada Äs-Sadrnıñ Mähdi armiäse sıyınu urını itep qullana. Äs-Sadrnıñ yärdämçese Äxmät Äl-Şäybani süzlärençä, berniçä yädrä mäçet yanına töşep anıñ tışqı diwarın tişkän. Distälägän keşe hälaq bulğan, yaralanğan. Ämmä bu xäbär älegä bäysez çığanaqlardan raslanmadı. Amerikannarğa qarşı ğisyan başında torğan şiği ruxani Moqtada Äs-Sadrnıñ xäzerge waqıtta qayada ikäne bilgesez. Anıñ Bagdadtağı süzçese Şäix Salax Cäsim Äl-Ğöbäydi Azatlıq radiosına, Äs-Sadr äle dä Nacafta dip belderde:

Audio (Salax Cäsim Äl-Ğöbäydi)

"Ul äle dä Nacafta. Min anı yaxşı beläm. Işanığız, ul isän kileş annan kitmiäçäk."

Uzğan anta axırında Äs-Sadr suğışçıları imam Ali mäçeten şiğilärneñ yuğırı ruxanilarına, atap äytkändä Ayatolla Ali Äs-Sistani keşelärenä tapşıru niäten beldergän ide. Ölkän yäştäge Sistani xäzerge waqıtta Londonda operatsiädän soñ däwalanıp yata. Söyläşülär anıñ wäkilläre belän bardı. Şäyx Äxmät Äl-Şäybani süzlärençä, suğışçılar mäçetne tapşırırğa äzer, tik bu eş qanuni räweştä başqarılırğa tieş, dide ul:

Audio (Äxmät Äl-Şäybani)

"Bez bar dönya aldında bu izge törbäne ruxanilarğa tapşırırğa äzer. Monda ber genä närsä bar, monıñ öçen Sistani yä anıñ keşeläre tarafınnan maxsus ber komissiä tözelergä tieş."

Ul arada ğisyanıçlar totıq itep alınğan amerikan jurnalistı Micah Garennı irekkä çığarğan digän xäbär kilde. Mica üzeneñ tärcemäçese belän awgustnıñ 13ndä könyaqtağı Nassiriä şähärendä totıq itep alınğan ide. Äs-Sadrnıñ Nassiriädäge wäkile Şäyx Aws Äl-Xafaci Äl-Cäzirä televideniesenä äytüençä, totıq aluçılar bu jurnalıstnıñ Ğiraqtağı çınbarlıq turında yazğanın açıqlağaç aña möräcäğät itkän:

Audio (Aws Äl-Xafaci)

"Bezneñ tuğanıbız Micah Garennıñ totıq itep alınğanın işetkäç, bez anı ezli başladıq. Totıq aluçı törkem amerikannarnıñ Nacaftan kitüen taläp itep quyğan häm bu bezneñ dä taläp, di Xafaci."

Garen üze Äl-Sadrnıñ Nassiriä bülegendä azat itelgäne öçen räxmäten belderde:

Audio (Micah Garen)

"Äl-Sadr bülegenä mine azat itkän öçen räxmätemne belderäm. Min Ğiraqta eşemne, mondağı xalıqqa yärdäm itüemne däwam itermen dip ömetlänäm, di amerikan jurnalistı."

Ul arada Ğiraqta totıq itep alınğan başqa il jurnalistları, 2 fransuz, ber italiannıñ qayda ikäne älegä bilgesez bulıp qala.

Ali Gilmi, Praga
XS
SM
MD
LG