Accessibility links

шимбә, 10 декабрь 2016, Казан вакыты 16:00

Fäwziädän kemgä zıyan?


Bötendönya Törki Xatın-qızlar berlege räise Şonel xanım Balnıñ Tatarstanğa vizitı däwam itä. Universitet professorı, bilgele cämäğät eşleklese Törki dönyada xatın-qızlar totqan urını, mädäniät, mäğrifät taratu turında söyläşülär alıp bara. Ul törle cämäğätçelek oyışmaları wäkilläre belän genä tügel, däwlät eşlekleläre belän dä oçraşa. Şulay uq Şonel xanım qayber gumanitar oyışmaları, sotsial' yaqlaw ministrlığı wäkilläre belän tanışa.
Qayber dairälär çit ilgä, başqa mädäniätkä çiklänep qarıy. Mäs'älän, Şonel Balnıñ Qazanğa vizitı turındağı xäbärne rus telendä eşli torğan televidenie kanalı bik üzençälekle kürsätte. Reportajda Şonel Balnıñ kem ikänlege, qaydan, nigä kilgänlege äytelmäde. Häm Bötendönya Törki xatın-qızlar oyışmasınıñ eşçänlege turında şöbhä tudıra torğan süzlär äytelde. Monıñ säbäbe älege berläşmäneñ idäräsendä kürenekle yazuçı häm cämäğät eşleklese Fäwziä Bäyrämovanıñ äğza buluı ikän.
Reportaj Fäwziä xanımnı, advokat Roza Färdievanı Şonel Bal citäklägän Bötendönya Törki Xatın-qızlar oyışmasınıñ Tatarstan bülekçäsen oyıştıruda ğayıpläde. Reportajda şundıy fikerlär yañğıradı – elekke yıllarda oppozitsioner, cäncallar çığaruçı bulğan Fäwziä Bäyrämova, xäzer mäğrifät, din, tınıçlıq urnaştıruçığa äylängän. Çınlap ta xalıq deputatı bulğan çağında ul Rusiäneñ milli säyäsäten tänqitlägän. Jurnalist İgor Şevelev äytüençä, bik küp televizor qarawçıları Fäwziä Bäyrämovanıñ gumanitar cämäğät eşe belän şöğellänüenä tiskäre mönäsäbät beldergän ikän. Dini, milli tolerantlıq citmägän qayber televizor qarawçılarnıñ mondıy mönäsäbätlärenä şähär televidenieseneñ reportajı säbäp bulğan. Ä çınlıqta Fäwziä Bäyrämovanıñ törle töbäklärgä barıp, tatarlar turında mäqälälär yazuı, Mixail Xudyakov, Hadi Taqtaş turındağı fänni häm ğämäli icatı turında bilgele.
Älege reportaj belän qazanlılar rizalaşamı digän sorawnı bez şähär üzägendäge berniçä keşegä birdek. Küpçelek Fäwziä Bäyrämovanıñ kem ikänen belä ikän. Ğomumän, tatarlar aña uñay qarıy, ä ber tıñlawçı näq televizor äytkänçä qabatladı. Ul keşe tatar tarixı, mädäniäte belän qızıqsınmıy häm anıñ milli tereleş turında bernindi dä mäğlumatı yuq.
Bu tapşıru äzerlängän waqıtta bez Fäwziä Bäyrämovanıñ älege reportajğa mönäsäbäten belä almadıq. Millätara duslıqqa zıyan kiterüçe älege tapşıru qayber ekspertlar fikerençä Bäyrämovağa fayda da kiterä ikän. Çönki bu aña zur reklama buldı, säyäsätkä qaytu mömkinlekläre açtı dide ber sotsiologiä belgeçe. Şulay da mondıy reklamadan keşe küñelendä yuşqın qala. Bezneñ belän söyläşüçelärneñ kübese şulay dip sanıy.
Al'bina Zäynulla, Qazan.

XS
SM
MD
LG