Accessibility links

җомга, 9 декабрь 2016, Казан вакыты 20:32

Yevropa Berlegeneñ yaña komissionerı Rocco Buttiglione qanunsız möhacirlekkä qarşı yaña çaralar täqdim itte


Çirattağı küzätüebez möhacirlek turında. Yevropa Berlegeneñ yaña Yustisiä häm Eçke Säyäsät komissionerı Rocco Buttiglione, immigrasiäne – "säğatle bomba" dip atadı. Möhacirlär ağımın kontrol itü eşendä Berlek äğzaläre xezmättäşlek itergä tieş. İmmigrantlarnıñ sanın şulay uq – fäqir illärgä yardäm itü aşa da kimetep bula.

Yevropa Berlegeneñ Yustisiä häm Eçke Säyäsät komitetı qaramağında şulay uq immigrasiä mäs''äläläre dä tora, xörmätle tıñlawçılar. Häm 3 yıl İtaliäneñ tışqı eşlär ministrı bulğan, xäzer şuşı komitetnı citäklärgä äzerlängän Rocco Buttiglione şuşı möhacirlek mäs''äläse belän bälki iñ yaqınnan tanış bulğan ministrlarnıñ berseder. İtaliä yarlarına atna sayın qaçaqlar kilä. Äle bu – isän qalğannarı, alarnıñ niçäse – diñgezdä batıp yäisä hawası da bulmağan qarañğı konteynerlarda tonçığıp ülä. Reuters mäğlümat agentlığı aşa yasağan belderüendä Buttiglione Yevropa Berlegeneñ 25 äğza ilen immigrasiä mäs''äläsendä berdäm eş alıp barırğa çaqırdı. Anıñ täqdimnäre arasında –Yevropa Berlegeneñ berdäm çik buyın buldıru, Berlekneñ tışında möhacirlär üzäkläre oyıştıru, qanunlı migrasiä öçen yullar buldıru, iqtisadi möhacirlekne kimetü öçen yarlı däwlätlärgä yardäm itü. Bu täqdimnärneñ berse dä yañalıq tügel. Brusseldä Yevropa Säyäsäten Öyränü Üzäge belgeçe Sergio Carrera süzlärenä qarağanda, Yevropa Berlege illäre bu täqdimnärdän üzläre baş tartqan: NC082440 "Yevropa Komissiäseneñ immigrasiä mäs''äläsendäge role – minemçä bik yaxşı. Ämma bu çaralarnıñ kübese Ministrlar Şurası tarafınnan qabul itelmäde. Döresräge Şura täqdimnärneñ küpçelegen kire qaqtı," Carrera.

Monıñ säbäbe, belgeçlär fikerençä, här ilneñ säyäsi wağziätendä... Häm şulay uq iqtisadi tikşerenülär – Yevropağa eşçelär kiräk bulğanın kürsätä, ämma sotsial yaqtan boların idarä itü awır. Carrera däwam itä: NC082441 "Älbättä, bu mäs''älälär här il öçen çeterekle. Äğza däwlätlär, Yevropa Berlege ilgä kilüçe migrantlar sanın çiklär dip qurqa. Ämma bu da – iñ awır mäs''älä tügel", di Yevropa säyäsäte belgeçe.

11 sintäber terror höcümennän soñ mäs''älä tağın da qatlawlandı. NC082442 "11 sintäbr höcümennän soñ Yevropa Berlegeneñ töp säyäsäte – iminlek mäs''älälärenä, qanunsız möhacirlekne häm keşelär belän säwdä itüne tuqtatuğa yünältelgän ide. Bu da kiräk, kileşäm. Ämma bezgä qanunsız immigrasiäne beterü säyäsäten genä tüegel, ä migrantlarğa kilergä röxsät birgän programmalar buldıru säyäsäten alıp barırğa kiräk. Qanunsız möhacirlek problemasın bälki şuşı yul belän çişep bulır?," dide Yevropadağı säyäsi analitik Sergio Carrera.

Komissiäneñ yaña başlığı bulaçaq Buttiglione, Yevropa Berlege, säyäsi möhacirlärgä qarağanda kübräk iqtisadi qaçaqlar belän eş itkänen añlarğa, häm moña qarap kiräkle çaralar kürergä tieş, dip sanıy. Genevada urnaşqan Xalıqara Migrasiä Oyışması matbuğat wäkile Niurka Piniero, mondıy legal programmalar inde eşläp kilä, dip belderde. NC082443 "Bezneñ eşçe möhacirlär öçen programmalarıbız bar. Misal öçen, Ekuador belän İspaniä arasındağısı – iñ uñışlılardan sanala. Älege keşelär Xalıqara Migrasiä Oyışmasınıñ Ekuadordağı wäkilçelegendä terkälä. Xäzerge waqıtta bezneñ programmağa 25 meñ keşe kertelgän. İspaniädä eşçelär kiräk bulğanda alarnı şuşı isemlektän saylap alalar. Bu yul belän İspaniägä inde 2 meñnän artıq keşe kitte. Alarnıñ xäzer daimi eşe, sosial taşlamaları bar. Alarnı eş birüçelär dä, cinäyätçel törkemnär dä ezärlekli almıy. Bu – eşläp bula torğan äyber, möhacirlekne näq şulay idarä itergä kiräk, " dip fikerläre belän büleşte Migrasiä oyışması wäkile.

Yaña Komissionernıñ tağın ber täqdime – Yevropa Berlege tışında möhacirlärne tuplaw öçen oyıştırılaçaq üzäklär yäisä "lagerlarğa" tuqtalıyq. Buttaglione äytkännärenä qarasañ – älege cıyılu üzäklärendä immigrantlarğa humanitar yardämtäqdim itäçäklär häm Yevropada urnaşu yulları turında mäğlümat biräçäklär.

Näq şunda – qaçaqlarnıñ qaysısınıñ Yevropağa säfären däwam itä aluı, ä qaysısınıñ kire öyenä cibäreläçäge dä xäl iteläçäk. Mondıy üzäklärne elek ük "kons-lagerlarğa" oxşatıp, keşe xoquqların bozu bulaçaq, dip täñqitlägännär ide. Ämma Piniero süzlärenä qarağanda, bu täqdim iğtibarğa layıq: NC082444 "Qayber qaçaqlar öylärenä dä qayta almıy, başqa cirgä dä kitä almıy, çönki alarnıñ aqçaları – üzlären qanunsız räweştä qaçırıp alıp kilgän cinäyätçelärgä betkän bula. Şulay itep alarnıñ barır cirläre, aşarğa rizıqları qalmıy, " dide Xalıqara Migrasiä Oyışması wäkile.

Ämma bu oçraqta lager eşenä böten taraflar da qatnaşırğa tieş. Migrantlar taşlap kitkän illär xökümätläre, alarnı üzläre aşa ütkärgän däwlätlär häm Yevropa Berlege.
XS
SM
MD
LG