Accessibility links

җомга, 9 декабрь 2016, Казан вакыты 18:43

İran tışqı eşlär ministrı: İzrail İranğa qarşı höcüm yasasa, moña tieşle cawap qaytarılaçaq


Bügenge köndälek küzätülärne bez ğädättägeçä Ğiraqtan tügel, ä yıraq Yaña Zelandiädän kilgän xäbär belän başlıybız. Läkin ul barıber Yaqın Könçığıştağı xällärgä qarıy. Räsmi säfär belän Yaña Zelandiägä kilgän İran tışqı eşlär ministrı Kamal Xarazi, ägär dä İzrail İrannıñ atom qorılmalarına kisätü höcümnäre yasıy ikän, Tähran moña şunda uq tieşle cawap qaytaraçaq dip kisätte.

İrannıñ atom programması tiräsendäge ığı-zığı yaña çorğa kerep kilä - şuşı könnärdä genä Quşma Ştatlarnıñ yuğarı däräcäle qoral inspektorlarınnan berse, däwlät sekretare urınbasarı John Bolton, xalıqara küzätü astına alınmağan oçraqta İran üz atom bombasın inde 3 yıl eçendä citeşterä ala dip kisätkän ide. Ul, bu ölkädä Washingtonnıñ fäqät diplomatik mömkinleklärne genä qullanaçağın qabatlasa da, Kamal Xarazineñ Yaña Zelandiädä sişämbe könne yasağan qırıs belderüe, Quşma Ştatlar häm anıñ berektäşe İzrailne aldan uq kisätep quyu bulıp tora. Kisken süzlär belän almaşu İran häm İzrail arasında soñğı atnalarda bigräk tä köçäep kitte. İzrail citäkçelege, Tährannıñ üzendäge tınıç atom programması qısalarında şıpırt qına atom qoralına iä bulırğa tırışuına şiklänmi diärlek, häm şul säbäple, ägär dä İrannıñ bu omtılışlarına kirtäne diplomatik çaralar yardämendä quyıp bulmasa, anıñ atom qorılmaların höcüm yasap yuq itü ixtimalın da kire qaqmawına işarä itä. Şuşı ay başında ğına İrandağı İnqilap änsarlarınıñ säyäsi idaräse başlığı, "İrannıñ zamança raketaları xäzer bar sionist cirlärenä, şul isäptän anıñ atom qorılmalarına da citä ala" dip beldergän ide. Älege süzlär İzraildä tirän borçu uyattı häm qayber belgeçlär, mondıy şartlarda İzrail citäkçelege, üzenä qarşı andıy höcümnärne buldırmas öçen İrannıñ atom qorılmalarına kisätü höcümnäre yasıy ala digän farazlar bäyän itte. İzrailneñ andıy täcribäse inde bar - 1981-nçe yılda ul hawa höcüme yasap Ğiraqnıñ Osirak atom reaktorın yuq itkän ide. İlneñ qorallı köçläre idaräseneñ başlığı general Moshe Ya''alon bu atnada "Yediot Ahront" basmasına, "İran üz atom mömkinleklären arttıra bara häm min İzrailneñ bu ölkädä başqalarğa ışanıp yatmawın täqdim itär idem" dip belderde. Tährannıñ monı, anıñ belän dä 1981-nçe yılğı Ğiraq oçrağı qabatlana ala dip qabul itüe ixtimal. Kamal Xarazi Yaña Zelandiädä, "ägär dä alar monı eşläsä, bez tieşle cawap qaytaraçaqbız" dip kisätte. Berük waqıtta ul, İranıñ üz atom qoralın buldıru teläge yuq dip tä äytte.

Audio, Kamal Xarazi

"Bezdä atom qoralın buldıru programması yuq, häm bez bu, yäğni andıy qoral buldıru, iminlegebez öçen faydalı närsä dip uylamıybız" di İrannıñ tışqı eşlär ministrı. Şunda uq ul Amerika Quşma Ştatların, İranğa qarşı doşmanlıq xislärennän çığıp xalıqara mäydanda anıñ atom programmasın yamanlaw eşen alıp baruda ğäyepläde.

Audio, Kamal Xarazi

"Quşma Ştatlarnıñ qaraşı mäs''äläse ayırım ber qissa, di Xarazi, yıllar däwamında İran belän Quşma Ştatlar arasında doşmanlıq östenlek itep kilde, şuña kürä alar xäzer İranğa basım yasaw öçen törle mömkinleklärne ezli." Bu İrannıñ tışqı eşlär ministrı Kamal Xarazi ide, şuşı süzlären ul Yaña Zelandiägä yasağan säfäre barışında äytte.

Kärim Kamal
XS
SM
MD
LG