Accessibility links

шимбә, 10 декабрь 2016, Казан вакыты 17:40

Qazanda cälilçelärne iskä aldılar


Qazanda 25 avgust könne Kreml’ qapqası qarşında Musa Cälil häykäle yanında xäter cıyını uzdı. Här yılda näq şuşı könne monda Musa Cälil häm anıñ belän bergä faşist gil’otinasında cäzalap üterelgän tağın 11 tatar keşeseneñ ğömere özelgän minutlarda şağirlär, cämäğät häm däwlät eşlekleläre cıyıla. Bıyıl faşist totqınlığında cäzalap üterelgän soñ 60 el ütkän. Cıyınnı Tatarstan yazuçılar berlege räise Foat Ğälimullin açıp cibärde.

Musa Cälilneñ totqınlıqta yazğan şiğerlären 100 meñnärçä keşe belä. Ämma häykäl yanında barel’yefları quyılğan tağın 10 tatar qaharmanı moña qädär iğtibar üzägendä bulmadı. Sovet zamanı propagandası yärdämendä qaharmanlıq simvolı bulıp Musa Cälil genä kürsätelgän ide. Bıyılğı cıyında isä törkemneñ citäkçese Ğaynan Qormaş ikänlege äytelde. Yazuçı Rafail Mostafinnıñ çığışında da Ğaynan Qormaşqa häm başqa fidaqär tatarlarğa zur iğtibar birelde. Tatarstan prezidentı Mintimer Şäymiev üzeneñ çığışında här xalıqnıñ yözen bilgeläwçe şäxeslär, simvollar barlığı turında äytte.

Cıyında Kamal teatrı artistları, cırçılar Zilä Sönğätullina, Vladimir Vasil’ev, Tatarstannıñ xalıq şağire Rinat Xaris, Orenbur ölkäse, Mari respublikasınıñ Bäräñge rayonı wäkilläre häm başqalar çığış yasadı. Tirän mäğnäle, teträndergeç şuşı cıyınğa kilgän keşelär arasında zıyalılar, milli ruxlı, bilgele keşelär bar ide. Ämma ğadi qazanlılar bäyrämgä kilmäde, disäñ dä bula. Cıyıluçılarnıñ sanı başqa yıldağıdan kübräk bulmaw 400 meñ tatarları Qazan cämäğätçelegeneñ, bigräk tä icadi häm milli oyışmalarnıñ milli üzañınıñ tübänäyä baruın kürsätte. Cälilçelärne çärşämbe könne Çallıda da iskä aldılar.

Gölnaz İlgizär

XS
SM
MD
LG