Accessibility links

шимбә, 10 декабрь 2016, Казан вакыты 19:39

"Rusiädäge säyäsi wäzğıät häm milli respublikalar statusın saqlaw-üsterü problemaları" digän fänni-ğamäli konferensiä ütte


Konferensiäne äle yaña ğına oyışqan Tatarstannıñ milli oyışmalar şurası- Milli Şura oyıştırdı. Milli Şurağa Bötentatar “Mäğärif” bergälege, Bötentatar ictimaği Üzäge, Tatar xalqınıñ milli mäclese, “İdel-Ural ictimaği xäräkäte, Tatarstannıñ möselman xatın-qızları bergälekläre ixtiarlıy räweştä kerä. Yäğni ägär maqsatlar, mänfäğätlär turı kilgändä urtaq çaralar ütkäräçäklär. Ber oyışma aldında qalğannarı burıçlı, yä yöklämäle tügel. Älege konferensiä menä şundıy urtaq çaralarnıñ täwgese. Şuña kürä çığış yasawçılar arasında Milli Şurağa kergän barlıq oyışmalarnıñ da wäkilläre bar ide. Barlığı 10 keşe çığış yasadı. Tarix fännäre doktorı Damir İsxaqov- “Tatar mäs’äläse”, akademik Mirfatıx Zäkiev-“Tel, imla, däwlätçelek”, Säyäsätçe Fändäs Safiullin- “Tatarstan möstäqillegeneñ konstitutsion nigezläre”, säyäsätçe Raşat Safin-“Globalizatsiä häm tatar yazmışı”, “İdel-Ural ictimaği xäräkäte räise Ğayal Mortazin-“İdel buyı respublikaları arasında konfederativ mönäsäbätlär urnaştıru”, Rusiä Gumanitar fännär akademiäseneñ şäräfle akademigı Salix xäzrät Salixcan- “Din häm millät, din häm däwlät”, tarix fännäre kandidatı Tä'minä Biktimerova- “Azatlıq xäräkätendä möselman xatın-qızları”, filosofiä fännäre kandidatı Rafail Möxämmätdinov-“Xäzerge milli xäräkät häm tatar zıyalıları”, BTİÜ prezidiumı äğzası tatar yäşläre liderı Dinar Şäripov-“Milli xäräkättä tatar yäşläre” digän çığışlar yasadılar. Çığışlar buyınça fiker alışu buldı, rezolyutsiä qabul itelde. Çığışlar qızıqlı häm ğibrätle dip bäyälände alarnı kitap itep näşer itärgä qarar itelde. Milli Şura ütkärgän fänni –ğämäli konferensiädä tarixçı Damir İsxaqov yasağan “Tatar mäs’äläse” digän çığışta ul kereş süzendä çığışın urısça yasawınıñ säbäplären añlata. Xäzerge çorda respublikada millätneñ inqıyraz kiçerü xälendä buluın äytä. Konferensiä turında aldağı xäbärlärebezdä söyläwne däwam itärbez.

Yunıs Ätnäle.

XS
SM
MD
LG