Accessibility links

Кайнар хәбәр

Rusiädä beryulı ike oçqıç qazağa oçradı: 90 keşe hälaq buldı


Çärşämbegä qarşı töndä Mäskäwneñ Domodedovo hawa alanınnan kütärelgän ike oçqıç ber-ber artlı qazağa oçradı. Andağı 90-lap keşeneñ barısı da hälaq bulğan. Prezident Putin Federal iminlek xezmätlärenä qazanıñ säbäplären tikşerergä färman birde. Tikşerüçelär berniçä faraz tikşerä, şul isäptän, ixtimal pilot xatasın. Berük waqıtta terror ğämäle dä kire qağılmıy.

Bu ike oçqıç Mäskäwneñ Domodedovo hawa alanınnan yartı säğät çaması ayırma belän kütärelgän. Başta, kiçke 10nnarda, Seber hawa şirkäteneñ Soçiğa baruçı Tu-154 oçqıçı, annarı Volga-Aviaexpress digän keçekenä ber şirkätneñ Volgogradqa baruçı Tu-134 oçqıçı. Bu ikençese, 10 säğät 54 minutta radardan yuğala, Tula ölkäseneñ Buçalki awılı tiräsendä qazağa oçrıy. Monı kürgän şahitlär başta nindier şartlaw işetelüe turında äytä. Hawa dispetçerları äytüençä, radardan yuğalğançığa qädär bu oçqıçtan ber şikle xäbär dä kilmägän. Oçqıçnı Volga-Aviaexpress çirkäte citäkçese Yuri Baiçkin yörtkän dielä. Şirkät wäkilläre äytüençä, ekipaj täcribäle, oçqıç yaxşı xäldä bulğan, yağni pilotlarğa häm texnikağa däğwa belderep bulmıy. Oçqıçta 8 keşelek ekipajdan tış 34 yulçı bulğan. Çärşämbedä Rusiäneñ Ğädättän tış xällär ministrı Sergei Şoigu bolay dide:

Audio (Sergei Şoigu)

"Qara tartmanıñ berse tabıldı, ul yaxşı xäldä, ikençesen ezlibez, mäyetlär barısı diärlek tabılğan, dip belderde."

Näq şul waqıtta radarlardan Soçiğa barğan Tu-154 oçqıçı da yuğala. Anıñ qaldıqları ikençe köngä anıñ Rostov ölkäseneñ Gluboky awılı yanında tabıla. Bu oçqıçta ekipaj belän bergä 46 keşe bulğan. Qaldıqlar 40-50 çaqırım aralıqqa çäçelgän, yağni belgeçlär äytüençä, bu oçraqta da şartlaw ixtimalı bar. Rusiäneñ İnterfax agentlığı belderüençä, yuqqa çığır adlınnan oçqıçta urlawçılar bulu turında xäwef xäbäre kilgän bulğan. Soñnan bu xäbär ğömüm kisätü bulğan dip üzgärtelde. Bu ike qazanıñ säbäpläre älegä bilgesez. Federal iminlek xezmäte süzçese Sergei İgnatçenko, töp versiä - pilotlar yä texnika xatası, läkin terror ğämäle dip kire qağılmıy dide:

Audio (Sergei İgnatçenko)

"Berniçä versiä qarala, töp versiä – oçu qağidälären bozu. Terror ğämäle dä tikşerelä, ämmä älegä moña ber raslaw da tabılmadı."

Volgograd hawa alanı citäkçese Yuri Dmitriev pilotlarnıñ yalğışu ixtimalın kire qaqtı:

Audio (Yuri Dmitriev)

"Pilotlar xatası ixtimalın min kire qağam. Çönki mondıy oçqıçlarda berär närsä bula qalsa, ekipajnıñ cirgä xäbär itü öçen härwaqıt waqıtı bula."

İke oçqıçnıñ näq ber waqıtta qazağa oçrawı terror ğämäle turında farazlarğa nigez birä. Bu yäkşämbedä Çeçnyada ütäse saylawlar uñayınnan, monı çeçen suğışçıları belän bäyläwçelär dä bar. Çärşämbedä separatistlar citäkçese Aslan Masxadovnıñ wäkile Äxmät Zakaev, Exo Moskvı radiosına, Masxadov häm anıñ keşeläreneñ bu qazalarğa ber qatışları da yuq dip belderde. Anıñ ikençe wäkile Faruk Tubulat, Äl-Cäzirä televideniesenä şulay uq, bu bezneñ eş tügel, bez xärbilärgä qarşı ğına xöcüm itäbez dide. Masxadov üze, küptän tügel Azatlıq radiosına birgän äñgämäsendä, terror ğämälläre Çeçen suğışçılarına barı tik zyıan ğına kiterä, min bu mäsälädä çeçen komandirı Şamil Basaev belän kileşügä ireştem digän ide.

Ali Gilmi, Praga
XS
SM
MD
LG