Accessibility links

шимбә, 10 декабрь 2016, Казан вакыты 19:33

Könbatıştağı möselmannar islam süräten yaxşırtu eşen alıp barırğa tieş


Soñğı yıllarda bulğan mäğlüm terror ğämälläre häm alarnı qılğan adämnärneñ üzlären islamçı itep tanıtuı möselman dineneñ Könbatıştağı sürätenä şaqtıy zur zian kiterde, xörmätle tıñlawçılar. Bu ber yaqtan andağı möselmannar tormışın qatlawlandırsa da, ikençe yaqtan alarnı islam dine süräten yaxşırtu ölkäsendä qızuraq eşçänlek alıp baruğa etärde. Bu atnada şuşı mäs''älä möselman ğalimnäreneñ İordaniädä uzğan maxsus ber cıyınında qaralğan ide.

Abruylı sanalğan ber britan basmasındağı kommentarda möselmannar etkä tiñlänä häm alar britannarnıñ yäşäw räweşenä yanıy digän fiker belderelä. İñ küp taralğan italyan basması, Yevropağa islam koloniäse bulu yanıy dip yazılğan kitaptan özeklär bastıra. 2001-neñ 11-nçe sintäbr höcümnärennän soñ islam turında andıy fikerlär Könbatışta şaqtıy yış kürenä başladı. Yuğarıda kiterelgän misallar şularnıñ ikese genä. Bıyıl martta Madridta bulğan şartlawlar islamğa qarşı käyeflärne tağın da arttırdı. Bu atnada törle möselman ğalimnäre qatnaşında İordaniädä uzğan xalıqara kiñäşmä näq menä şuşı mäs''älägä - islamnıñ Könbatıştağı süräten yaxşırtu yullarına bağışlanğan ide. Anda yañğırağan töp fiker - Könbatış illärendä ğömer kiçergän möselmannar islamnı artqa qalğan, yawız din itep sürätläw tırışlıqlarına nığraq qarşılıq kürsätergä, monıñ döres tügellegen isbatlarğa tieş.

Audio, Färüq Cärrar

Färüq Cärrar, Ammanda urnaşqan "Aal äl-Bäyt Waqfı" mödireneñ yardämçese, ul "Könbatış illärendä, häm bigräk tä Yevropada islam aldında torğan iñ möhim problema bulıp mäğlümat çaralarınıñ qayber möselman keşeläre ğämällären bozıp kürsätüe tora" dip belderä. Anıñ fikerençä, mäğlümat çaraları islamnı şul däräcädä ğäyeple itep kürsätä ki, Könbatıştağı qayber zialılar islamnı yawız ber din itep sürätli başlıy. Färüq Cärrar süzen däwam itep bolay di.

Audio, Färüq Cärrar

"Könbatışta, Yevropada bigräk tä möselmannar bik küp yäşi. Ämma alar yäşägän illärendäge säyäsi täräqqiattän çittä tora. Bez alarnı şul eşlärdä äwzem qatnaşuğa öndibez, islam monı hiç kenä dä tıymıy. Alarnıñ anda üz tawışı işetelergä tieş, häm şul oçraqta alar islam süräten dä yaxşırta ala" dip belderä Färüq Cärrar, Ammandağı xalıqara cıyınnı oyıştırğan "Aal äl-Bäyt Waqfı" wäkile. Läkin ikençe yaqtan, näq menä islamğa qarşı köçäygän käyeflär Yevropa möselmannarın kiresençä säyäsi tormışnıñ qırıyına etärä digän fikerlär dä bar. Şuña kürä dä alarda üzläre yäşägän illärneñ säyäsi täräqqiatenä äwzemräk qatnaşu teläge artqanğa qarağanda kimi bara. Britaniädäge Möselman Şurasınıñ matbuğat sekretare İnyaät Bunglawala, ilneñ 650 urınlı parlamentında barı tik ike möselman deputatı bar, bu isä Britaniäneñ million yarımnan artıq möselmanın wäkillek itmi diärlek di. Banglawala süzlärenä qarağanda, britan xökümäteneñ Ğiraq suğışına qarşı ütkärelgän uram cıyınnarına ise dä kitmäwe şaqtıy ğına möselmannıñ küñelen qaytarğan. Banglawala, möselmannarnıñ fikeren sanğa suqmaw axırğı çiktä qayber dairälärneñ alarnı keşe rätennän çığarıp kimsetä başlaına kiterä dip isäpli.

Audio, İnayät Banglawala

"Bez britan matbuğatında bu aralarda, möselmannarnı etlärgä tiñlägän qurqınıç mäqälälär dä kürdek, bu çın möselmannarnı belmägän oçraqta ğına bula ala" di Britaniäneñ Möselman Şurası wäkile.

Kärim Kamal
XS
SM
MD
LG