Accessibility links

дүшәмбе, 5 декабрь 2016, Казан вакыты 17:40

Dönyada bulğan iñ ere oçqıç hälaqätläre


Hawa hälaqätläre bertuğan Ritelar üzläreneñ berençe oçu caylanmasın hawağa kütärgän könnän birle bulıp tora.

2001 yılnıñ 11 sentäbrendä oçqıçlar qullanıp iñ däxşätle faciğa buldı. New Yorkta terrorçılar tarixta berençe tapqır üz plannarın tormışqa aşıru öçen oçqıçlar qullandı. İke oçqıç Bötendönya säwdä üzägenä barıp kerde, ä ber oçqıç Amerika Quşma Ştatlarınıñ saqlanu ministrlığı binasına töşte. Annan qala terrorçılar qulğa töşergän tağın ber oçqıç bar ide. Hälaq buluçılarnıñ sanı berniçä meñ keşegä citte.

1986 yılda Liviä finanslağan terrorçılar Şotlandiäneñ Lockerbi östendä Boeing 747 oçqıçın şartlattı. 270 keşe hälaq buldı. Liviä bu terrornı oyıştıruçılarnı üzendä yäşergän öçen dönyaküläm iqtisadıy çikläwgä duçar buldı. Küptän tügel genä Liviä başlığı Muammar Qadafıy hälaqättä wafat buluçılarnıñ tuğannarına aqça tülärgä rizalıq birde.

1983 yılda Sovetlar berlegeneñ xärbi oçqıçı Könyaq Koreä hawa şirkäteneñ Boeing 747 oçqıçın atıp töşerde. Sovetlar üzläreneñ bu ğämälen oçqıç hawa çiklären bozdı häm cirdän birelgän kürsätmälärgä buysınmadı dip añlattı. Bu waqiğadan soñ Quşma Ştatlarnıñ märhüm prezidentı Ronald Reagan SSSRnı “zolım imperiäse” dip atadı.

Bolar terror häm säyäsi ğämällär arqasında bulğan iñ ere hälaqätlär ide. Keşelek dönyası texnik yäki oçuçılar yalğışlığı belän bulğan hälaqätlärne dä onıtmıy. 1977 yılda KLM häm Pan American hawa şirkätläreneñ ike oçqıçı Kanar utrawları östendä bärelep 583 keşe häläk buldı. 1985 yılda Yaponiä hawa şirkäteneñ Boeing 747 oçqıçı tawğa bärelde häm 520 keşe hälaq buldı.

Nail Alan
XS
SM
MD
LG