Accessibility links

пәнҗешәмбе, 8 декабрь 2016, Казан вакыты 11:08

Yaña ğasır radiosına – 2 yäş!


Yaña ğasır radiosınıñ berençe märtäbä efirğa çığuına 26 avgustta ike yıl tuldı. Yaña ğasır radiosı äle üzeneñ ikençe tuğan könen genä bäyräm itsä dä, ul respublikada inde şaqtıy bilgele häm yaratqan radio. Şuña da älege radioda bügen qotlawlar häm matur teläklär bik küp yañğıradı. Alarnı teläwçelär arasında bilgele, tanılğan keşelär dä, ğadi tıñlawçılar da bar ide. Yaña ğasır radiosınıñ Qazanda eşläp kilüçe başqa radiolardan ayırması da bar - ul rus telendä dä, tatar telendä dä söyli. Tuğan köne uñayınnan bäyräm çaraları da ike teldä bardı. 26 avgust könne tıñlawçılar üzläreneñ yaratqan alıp baruçıları, jurnalistlar belän yaqınraq tanışa aldılar, radionıñ eşçänlege, kiläçäkkä plannar xaqında beldelär, üzläreneñ başqa sorawlarına da cawap ala aldılar. Monda şunısı iğtibarnı cälep itte. Tatar telendä barğan 3 säğätlek kisäklärdä tıñlawçılar aktivraq buldılar – alar qotlawların, teläklären dä kübräk citkerde, radionıñ eş räweşe belän dä nığraq qızıqsındı. Alardan ayırmalı bularaq, mäsälän, irtänge 9dan soñ rus telendä radionıñ möxärrirläre belän bulğan turıdan-turı oçraşuğa ber genä dä tıñlawçı şaltıratmadı.

Radionıñ tuğan köne ul bäyräm genä tügel, ä qılğan eşkä näticä yasap, kiläçäkkä plannar xaqında uylana, yaña tapşırular, programmalar efirğa çığara torğan kön. Şuña da bez Yaña ğasır radiosınıñ baş möxärrire Şämsiä Cihangirovağa möräcäğät itep, añardan radio xaqında, yaqın arada bezne yaña ğasır dulqınnarında nindi üzgäreşlär kötü turında soraştıq.

Yaña ğasır ul zamança taläplärgä turı kilä torğan qısqa dulqında eşläwçe radiolarnıñ berse. Bez Qazan xaqında, tatar tarixı, millät yazmışı, tatar xalqınıñ bilgele, tanılğan şäxesläre turında rus häm tatar tellärendä söyläwçe radio. İkeyıllıqnı bez qayber tapşırularıbıznı qısqartıp qarşılıybız. Mäsälän, yal könnärendä efirğa çığa torğan spektakl’lär beterelä. Çönki televideniedän alar bik yış kürsätelep tora. Älege tapşıru urınına tañlawçılarğa başqa qızıqlı programmalar täqdim itäbez. Şimbä, yäkşämbe könnärendä Aladan qolağa häm Yaña ğasırda Xuca belän xatını digän tapşırular efirğa çığaçaq. Bizäleş tä üzgäräçäk, başqa yañalıqlar da bulaçaq. Ğomumän, zamança radio ul härkönne üzgärep torırğa tieş.

Şunısın da äytergä kiräk, Yaña ğasır Azatlıq radiosınıñ yaqın dustı da äle. Belgänegezçä, älege radiodan bezneñ programmalarnıñ retranslyatsiäsen dä tıñlap bula. 1 yül könne Azatlıq radiosınıñ Yaña ğasırda yañğırıy başlawına 1 yıl tuluğa bağışlanğan zur ğına bäyräm dä uzdı. Anı äle bez genä tügel, ä tıñlawçılarıbız da, Yaña ğasırdağı kollegalarıbız da istä tota ikän.

Bez dä Yaña ğasır radiosın, anıñ bar xezmätkärlären tuğan könnäre belän qotlıybız häm kiläçäktä dä küpsanlı tıñlawçılarnıñ yaratqan radiosı bulıp qaluın telibez.

Gölnaz İlgizär

XS
SM
MD
LG