Accessibility links

якшәмбе, 11 декабрь 2016, Казан вакыты 03:22

Qazan bäyrämgä äzerlänä


Qazan 30 avgust – Respublika häm Şähär könenä äzerlänä. Bıyıl 30 düşämbe köngä turı kilä. Şunlıqtan bäyräm waqıtında tatarstanlılar 3 kön yal itäçäk. Bolay bulğaç, yal itärgä dä, bäyräm çaralarında qatnaşırğa da waqıt citär. Xäyer, ayıruça sabırsız keşelär bäyräm itügä inde bügen ük kereşä ala, çönki Şähär köne uñayınnan çaralar başlanıp ta kitte. Comğa könne Qazan milli-mädäni üzäge qarşında veterannar belän oçraşu, Qazan turında istälekle suvenirlar bäygese uzdı, başqalanıñ törle bistälärendä Yaratqan şähärem digän mädäni tamaşalar ütte. Şimbädä bäyräm şähärneñ Ciñü parkında görliäçäk. Şul könne ük bilgele tatar şağire Ğäbderäxim Utız İmänineñ tuuına 250 yıl tulu uñayınnan Şärif Kamal muzeyında ädäbi-muzıkal’ kiçä ütäçäk. Törle tamaşalar, bäygeläre yal könnärendä dä oyıştırılsa da, alarnıñ iñ qızıqlıları, iñ qupşıları 30 avgust könne uzaçaq älbättä. Bäyräm könne oyıştırılaçaq çaralar arasında Qazan yılğası yarlarında hawa şarların oçıru, Biektawdağı avtouzışlar, ippodromdağı atlar çabışları kebek sport bäygeläre dä, Kamal teatrı yanındağı mäydançıqta Uyna, garmun, İrek mäydanındağı klassik, etnografik, zamança muzıka konsertı, Qazan milli-mädäni üzäge tiräsendä Qazan yoldızları dip isemlängän tamaşa kebek mädäni çaralar da bar. 30 avgustnıñ kiçendä iñ zur bäyräm Qazannıñ Üzäk stadionında ütäçäk. Anda Bäyräm belän, respublika. Tuğan köneñ belän, Qazan digän mädäni-sport tamaşası täqdim iteläçäk. Älege bäyräm köne ğädättägeçä kiçke säğät undağı salyut belän tämamlanaçaq.

30 avgust könne ütäçäk bar çaralar turında söyläp beteräse qıyın, xäyer alar barısı istä qalmasqa mömkin. Ägär dä sez qayda närsä ütü xaqında onıtqansız ikän yäisä qayda barıym, dip baş watasız ikän – 900850 telefonına şaltıratırğa mömkin. Anda sezgä bäyräm çaraları xaqında tulı mäğlümät biräçäklär. Älege telefonda utıruçı operatorlarnıñ tatar telläre bik ük kamil bulmasa da, alar telägän keşe belän tatar telendä söyläşälär, kiräk mäğlümätne añlayışlı itep birergä tırışalar. Şähär xakimiäte häm MTS şirkäte oyıştırğan bu liniä xaqında bez operator qızlarnıñ berse - Gölnaz İslamova Azatlıq radiosına menä närsälär söyläde.

Bez älege telefonda ikäw utırabız – min häm tağın ber operator Rezidä. Şaltıratuçılar kübräk bulsa, operatorlarnıñ sanın da arttıraçaqlar. Bez inde berniçä kön däwamında eşlibez, läkin keşelär äle bügen genä şaltırata başladılar. Bez ike teldä - rus häm tatar tellärendä xezmät kürsätäbez

Şulay itep, Rezidä belän Gölnaz köne häm xätta töne buyı da sezgä 30 avgustta Qazanda uza torğan bäyräm çaraları xaqında söylärgä äzer toralar.

Gölnaz İlgizär

XS
SM
MD
LG