27 avgustta Tatarstanda Germaniä könnäre başlanıp kitte. Bu çara Rusiädä 2004 yılda uza torğan Germaniä yılı qısalarında oyıştırılğan. Comğa könne şuşı könnär uñayınnan Qazanğa kilgän Germaniä respublikasınıñ Rusiädäge ilçese studentlar belän oçraştı, alman muzıkası konsertında buldı. Şuşı uq könne başqalada MetroCash&Carry kompaniäseneñ kibete dä açıldı. Monnan tış Tatarstanda Germaniä könnäre qısalarında ike respublika belgeçläre qatnaşlığında fänni-ğämäli cıyılışlar, klassik häm zamança alman muzıkası konsertları, Germaniä respublikası wäkilläre belän oçraşu häm başqa çaralar qaralğan. Alar 22 sentäbergä qädär däwam itäçäk.
Respublikada korrupsiä belän köräş däwam itä. Bu eşkä inde Mäskäw belgeçläre dä quşıldı. Respublikanıñ Ministrlar Kabinetında uzğan korrupsiägä qarşı säyäsät strategiäsen buldıru komissiäseneñ çirattağı utırışında İNDEM ictimaği waqıfınıñ räise Georgiy Sattarov ta qatnaştı. Utırışta komissiäneñ berençe adımnarı xaqında süz bardı. Xäzerge köndä tatarstanlılar arasında respublikada korrupsiäneñ nindi däräcädä taraluı turında fikerlären belü öçen soraşu ütkärelä ikän.
Gölnaz İlgizär
