Accessibility links

сишәмбе, 6 декабрь 2016, Казан вакыты 17:07

Rusiä räsmiläre qazağa oçrağan ike oçqıçnıñ bersendä terror ğämäle bulğanın tanıdı


Sişämbedä Mäskäw hawa alanınnan kütärelep ber-ber artlı qazağa oçrağan ike oçqıçta barlığı 89 keşe hälaq buldı. Comğa könne Rusiä räsmiläre alarnıñ kimendä bersendä teror ğämäle bulğan, digän belderü yasadı. İminlek xezmätläre äytüençä, qaza bulğan urında şartlatqıç matdälär tabılğan. Ul arada comğa könne ber islamçı törkem bu ğämällär öçen cawaplılıqnı üz östenä aluın belderde.

Sişämbe kiçendä Domodedovo hawa alanınnan kütärelep Volgograd häm Soçiğa yulğa çıqqan ike oçqıç, berse Tula, ikençese Rostov ölkäsenä citkäç berük waqıtta hälaqätkä oçrıy. Şul uq könne İnterfax agentlığı oçqıçnıñ bersendä ekipaj xöcüm bulğanda basıla torğan SOS töymäsenä basıp ölgergän digän xäbär tarata. İkençe oçqıçnıñ cirgä töşüenä şahit buluçılar şartlaw tawışları işetülären äytä.

Ämmä Rusiä räsmiläre başta terror ğämäle turında söylärgä ber dälil dä yuq, töp versiä – oçu qağidälären bozu, pilot xatası, yä texnik säbäplär dip belderä. Nixayät comğa könne iminlek xezmäte süzçese Sergei İgnatenko oçqıçlarnıñ kimendä bersendä terror ğämäle bulğan digän belderü yasadı. FSBnıñ ikençe wäkile Nikolay Zaxarov Rostov ölkäsendäge qaza urınında şartlatqıç matdälär tabıluın iğlan itte:

Audio (Nikolay Zaxarov)

"Tu-154 oçqıçı qaldıqların tikşergändä şartlatqıç matdälär tabıldı. Berençe tikşerügä kürä, ul geksogen. Ösätämä tikşerü ütkärelä. Tu-134 oçqıçın tikşerü däwam itä. Älegä yaña näticälär yuq."

Zaxarov şulay uq, bu terror ğämälenä bäyle bulırğa mömkin berniçä keşeneñ açıqlanuın äytte. Rusiäneñ mäglümät çaraları yazuınça, oçqıçlarnıñ ikesendä dä, çeçen isemle berär xatın-qız bulğan, älegä qädär alarnıñ mäyelären ezläp kilüçe bulmağan häm bu şik uyata, dielä.

Çeçnyada prezident saylawlarına berniçä kön qala bulğan bu qazalarnı küplär şunduq çeçen suğışçıları belän bäyläde. Ämmä çärşämbedä seperatislar citäkçse Aslan Masaxovnıñ beryulı ike wäkile çeçen suğışçılarınıñ bu ğämällärgä nindi dä bulsa qatışı buluın kire qaqtı.

Comğa könne moñarçı ällä ni tanılmağan "İslambuli brigadası" dip atalğan ber islamçı törkem Rusiädäge oçqıç qazaları öçen cawaplılıqnı üz östenä aldı. Üzeneñ İnternet säxifäsendä bu törkem Rusiä xakimiätlären Çeçnyada möselmannarnı üterüdä ğäyepli häm bu üterü tuqtalmıy torıp yaña terror ğämälläre belän yanıy. Törkemneñ iseme 1981 yılda Misır prezidentı Änwär Sadatnı üterüne oyıştırğan misır ofitserı Xalit İslambulidan kilä. Uzğan ayda bu törkem Paqstan premier-ministrına bulğan xöcüm öçen cawaplılıqnı da üz östenä alğan ide. Ämmä belgeçlär bu törkemneñ soñğı belderüenä älegä şiklänep qarıy.

Ali Gilmi
XS
SM
MD
LG