Accessibility links

сишәмбе, 6 декабрь 2016, Казан вакыты 08:50

Bağdadnıñ Sadr Şähäre rayonında şığıy törkemnär citäkçeläre Ğiraq politsiäse häm AQŞ armiäse räsmiläre belän oçraştı


Anda küp keşelärneñ ülemenä häm yaralanuına kitergän, kön sayın diärlek bulıp toruçı bäreleşlärne niçek beterü turında süz bardı. Bağdadnıñ bu yarlı, häm küpçelek xalıqnı şiğilar täşkil itüçe öleşendä 2 millionlap keşe yäşi. Alar suğışçan şiği din ähele Moqtada äs-Sadrnıñ Mähdi armiäseneñ tayanıçına äwerelde. Näcäftä Şiğilarnıñ ölkän ruxaniı Ayatulla Ali äs-Sistani aradaşlığında comğa könne ireşelgän kileşügä qaramastan Sadr şähärendä ğisyançılar belän AQŞ xärbiläre arasında bäreleşlär däwam itte. Ğiraq sälamätlek saqlaw ministrlığı äytüençä, Sadr şähärendä kiçäge häm bügenge bäreleşlär näticäsendä kimendä 10 keşe hälak bulğan, küp keşe yaralanğan. Näcäf şähärendä AQŞ köçläre belän äs-Sadrnıñ Mähdi armiäse arasında 3 atna buyı däwam itkän bäreleşlär näticäsendä şähärgä zur zıyan kilde. Uzğan töndä Näcäftä berniçä atış bulsa da comğadan birle anda çağıştırmaça tınıçlıq urnaştı. Comğa könne äs-Sistani aradaşlığındağı kileşü nigezendä äs-Sadr köçläre izge İmam Ali törbäsennän çigende.

Sadr Şähärendäge şiği citäkçese Kärim äl-Bixassi äs-Sadr mine Ğiraq xökümäte räsmiläre häm AQŞ armiäse belän söyläşülärdä qatnaşırğa çaqırdı dide.

AUDİO: Bez AQŞ tarafınnan wäğdä itelgän tınıçlıq, iminlek häm demokratiäne teläwçe räncetelgän xalıqnı wäkillek itäbez. Bez Sadr idaräse belän kileştek häm Amerikannar belän söyläşülär ütkärep mondıy qararlarğa kildek. Berençese – taraflar arasında atışlarnı tuqtatu. İkençese barlıq Amerikan kizülären yäki Amerikan köçläreneñ Sadr şähärenä kerüen tıyu.

AQŞ armiäse wäkile Leytenant Dave Swanson söyläşülärneñ maqsatı Sadr şähärendä tınıçlıq urnaştıru dide.

AUDİO: Minemçä, AQŞ armiäseneñ yuğarı wäkile şäixlär belän şähärdä tınıçlıq urnaştıru turında häm tınıçlıq urnaştırğannan soñ şähär xalqına xezmät kürsätüne yañartu turında söyläşä.

Şimbä könne Ğiraq premyer ministrı İyad Älläwi comğa könge kileşü nigezendä qoralların taşlawdan baş tartuçı Mähdi armiäse suğışçıların bastıraçağın belderde. Älläwi Näjäf yanında Mähdi armiäseneñ qayber kisäkläre äle dä AQŞ citäkçelgendäge koalitsiä köçlärenä höcümnären däwam itä dide. Yäkşämbe könne Basra şähäre yanında şartlaw näticäsendä neft''ütkärgeçkä zıyan kilde. Ğiraqnıñ könyaq Neft'' şirkäte wäkile bu şartlaw höcüm näticäsendä bulmağan, ä elekke şartlawlardan soñ cıyılğan neft'' yäki gaznıñ yanıp kitüe näticäsendä bulğan axrı dide.

Naif Aqmal, Praga.
XS
SM
MD
LG