Avgust axırında awıl xucalığında ğına tügel, mäğärif tarmağında da şaqtıy qızu könnär. Uqıtuçılar da, uquçılar häm ata-analar da 1 sentäber – Belem könenä, yaña uqu yılına äzerlänä. Mäskäw patriarxatı wäkile mäğlümätlärenä qarağanda, bu uñaydan bar pravoslav çirkäwlärdä maxsus moleben uzaçaq. Anda qatnaşu, qatnaşmaw här keşeneñ şäxsi eşe bulsa, sentäberneñ berençe könendä bar mäktäplärdä dä ütä torğan Belem bäyrämenä baru här uqıtuçı häm uquçığa mäcbüri. Ata-analar da älege bäyrämdä bik teläp qatnaşa häm başqa waqıtlardan ayırmalı bularaq mäktäpkä bu könne bik teläp kilä.
Respublikanıñ Mäğärif ministrlığı mäğlümätlärenä qarağanda, Tatarstanda bar mäktäplär dä uquçılarnı qabul itärgä äzer. Bıyıl respublika mäktäplärenä 474 meñ uquçı baraçaq. Bu uzğan yıl belän çağıştırğanda 29 meñ balağa azraq. Soñğı 5 yılda isä Tatarstanda uquçı balalarnıñ sanı 109 meñ keşegä kimegän. Şunlıqtan respublikada mäktäplär sanı da kimi bara, bigräk tä – awıl cirendä. Mäsälän, 2000 yıl belän çağıştırğanda bıyıl awıl mäktäpläreneñ sanı 109ğa kimegän. Xäyer, şähärlärdä, ayıruça Qazanda, mäktäplär yabılmıy, kiresençä, alar äle citmi dä. Läkin bu wazğiät şähärdä balalar sanınıñ artuı belän tügel, ä elektän ük Qazan mäktäplärendä balalarnıñ normadan artıq sanda uquı belän añlatıla. Anıñ qarawı, balalar kimü xisabına älege mäktäplärdä ikençe smenada uquçılar da kimi bara. Xäyer, Tatarstanda yaña mäktäplär, balalar baqçaları da açılıp tora. 2004 yılda respublikada 16 yaña mäktäp işeklären açtı. Şularnıñ berse – Alabuğadağı I tatar gimnaziäse. Gimnaziä balalarnıñ kanikulları waqıtında açılsa da, uquçılar da, uqıtuçılar da älege tantanağa bik teläp kildelär. Ä 1 sentäber könne balalar qatnaşlığında şuşındıy dulqınlandırğıç bäyrämnär respublikanıñ bar mäktäplärendä dä uzaçaq.
Gölnaz İlgizär
