Accessibility links

якшәмбе, 11 декабрь 2016, Казан вакыты 09:09

Milli Media Holding wäkilläre Asbest tatarları belän oçraştı


Küptän tügel Milli Media-Holding citäkçeläre Sverdlov ölkäse Asbest şähärendä yäşäwçe tatarlar belän oçraşuğa bardılar. Oçraşunıñ töp säbäbe biredäge mäçet binasında urnaştırılğan TNV tapşıruların qararğa yaraqlaştırılğan sputnik antennanı täqdir itü bulsa da, äñgämä waqıtında süz bik citdi temalarğa borılıp kitte. Asbest şähärendä altı meñnän artıq tatar xalqı yäşi. Kübräge suğıştan soñ, illençe yıllarda Tatarstan, Başqortstan cirlärennän bäxet ezläp çığıp kitkän xalıq. Tatarstannıñ Balıq bistäse rayonınnan kilep urnaşqan Borhan ağa Näbiev, mäsälän, inde ille ike yıl biredä yäşi ikän. Tuğan yaq belän inde küptän anı yaratqan radiosı – “Azatlıq” dulqınnarı yaqınayta. -“Azatlıq bezneñ öçen berdänber tatar radiosı inde ul, - di Borhan ağa, - distälägän yıllap inde tıñlıym Azatlıqnı, ämma qayçaq bik naçar işetelä, nindider qomaçawlıq bula efirda”. Borhan ağa häm ,Azatlıq”nı tıñlarğa yaratuçı başqa millättäşlärebezgä TNV kanalın qarıy alğan keşelärneñ “Azatlıq” radiosın tıñlaw mömkinçelege buluı da añlatıldı. Ämma anıñ öçen “Yaña ğasır” teleradiokompaniäse tapşıruların öydä qaraw äybäträk, bilgele. Asbest şähärendä kabel' televideniese üseş alsa, andıy mömkinçelek bulır digän ömet tä bar. Ä bügengä Azatlıq radiosın küplär qısqa dulqınnar arqılı tota. “Azatlıq”nıñ daimi tıñlawçısı, anıñ arqılı tuğan Tatarstanınıñ, dönyadağı tatarlarnıñ tormışınnan xäbärdar bulıp toruçı Miñneäxät ağa Fäsäxov tumışı belän Aqsubay yağınnan ikän. Yartı ğasırğa yaqın biredä ğömer kiçerä. Çit cirlärdä yäşäwenä qaramastan, ike ulın da tatar canlı, itağat'le itep üsterä alğan. Ulları – abıylı-enele bertuğan Fäsäxovlar bu şähärdä eşçänlekläre, igelekläre belän tanılğan eşmäkärlär. Mäçet tözü kebek zur eşlärdä iñ berençe bulıp alar yärdäm qulın suza. Xalıqnıñ alarğa da, şundıy ullarnı tärbiäläp üsterä belgän ata-anağa da ixtiramı, räxmäte zur. Balalar tärbiäläw, itağat'le yäşlär üsterü teması oçraşu waqıtında töp temağa äwerelde. Asbestta yäşäwçe tatarlarnıñ milli tormışı da, dini tormışı da mäçet itep alınğan şuşı bäläkäy genä fatirda alıp barıla. Milli-mädäni eşlärne dä biredäge imam Älfärit xäzrät alıp bara. Anıñ äytüençä, yäşlärne, balalarnı tuğan telgä öyrätü öçen barlıq şartlar da tudırılğan. Xätta şähär mäktäpläreneñ bersendä tatar yäkşämbe mäktäbe açu öçen röxsät tä alınğan bulğan. Ämma balalarnı anda uqıtırğa teläwçe ata-ana ğına tabılmağan. Älfärit xäzrät balalarğa tatar telen, ğäräp grafikasın uqıtu öçen mäçet binasın täqdim itä. İnde küptän bu turıda süz alıp barılsa da, mäçetkä yörüçe qartlar mäçetne qartlar öçen genä dip uylıylar axrı. Balaların, onıqların alıp kilüçelär, qızğanıçqa qarşı, älegä yuq. TNV sputnik tälinkäsen mäçet binasına quyu yäşlärne häm balalarnı biregä tartıp kiterer digän ömet bar. Xalıq öçen bu tapşırular äle yaña närsä, ämma şuña qaramastan, “Yaña ğasır” citäkçelärenä teläk yullawçılar küp buldı. Bigräk tä dini tapşırularnı, şulay uq yäşlär temasına bağışlanğan, yäşlär öçen qızıqlı tapşırular kürergä teläwçelär küp. Oçraşu waqıtında xalıqnı borçığan başqa temalar da kütärelde. Näzilä xanım Ğiniätova Asbest şähäreneñ xalıqqa sotsial' yärdäm kürsätü üzägendä eşli. Anıñ äytüençä, pensiäse 1771 sumnan kim bulğan moxtaclarnı şähär aşxanäläreneñ bersendä buşlay aşatalar ikän. Ämma tatar äbiläre anda yörmi, xäläl rizıq bulmawdan qurqalar. Näzilä xanım söyläwençä, tıynaqlıq qannarına señgän tatar keşeläre, ğomumän, zakon buyınça birelgän başqa törle yärdämnärdän dä baş tarta ikän. “Bezneñ tatar xalqı oyala yärdäm sorawdan, - di Näzilä xanım, - qayberläre balalarım bulışa dip yuqnı söyli. Minem biş-altı yıl eşläw däweremdä nibarı öç tatar keşesenä bulışırğa turı kilde, anda da üzebez ezläp tabıp, bik awır xäldä ikänleklären keşedän işetep belgännän soñ ğına”. Cıyıluçılar yalğız qalğan tatar qartlarına, olı keşelärgä nindi yullar belän yärdäm itärgä mömkinlege turında fiker alıştılar. Milli Media-Xolding citäkçelärenä iskä alıp kilgännäre, här eştä yärdäm itärgä äzer toruları öçen olı räxmätlär belderdelär.

Fäwiä Safiullina. Yekaterinbur

XS
SM
MD
LG