Accessibility links

сишәмбе, 6 декабрь 2016, Казан вакыты 11:24

Tatarstanda da Belem könen bäyräm ittelär


1 sentäber könne respublikanıñ bar mäktäplärendä häm uqu yortlarında Belem bäyrämen, yaña uqu yılı başlanuın bäyräm ittelär. Qazan uramnarında irtän matur itep kiengän, çäçäk bäylämnäre totqan balalar bik küp ide. Mäktäplärdä Belem, Berençe qıñğıraw bäyrämnäre uzdı, cäyge kanikullar waqıtında klasstaşların sağınışqan uquçılar ber-berse, uqıtuçıları belän aralaştı. Tatarstannıñ Mäğärif ministrı Räis Şäyxleslamov mäğärif xezmätkärlären, uquçılarnı Belem köne belän qotladı. Respublikada bu könne berniçä yaña mäktäp tä açıldı. Şularnıñ berse respublikanıñ Minzälä rayonında. Anı açu tantanasında älege rayon belän tanışıp yörüçe respublikanıñ premyer-ministrı Röstäm Miñnexanov ta qatnaştı. Ä menä Çallıda 1 sentäberdän başqort mäktäbe eşli başladı.

1 sentäber – mäktäp uquçılarınıñ ğına tügel, Tatarstandağı küpsanlı studentlarnıñ da bäyräme. Respublikanıñ yuğarı uqu yortlarında da bu könnän yaña uqu yılı başlanıp kitte. Älege möhim bäyrämne citäkçelek tä iğtibarsız qaldırmadı. Mäğärif ministrlığı, xökümät wäkilläre törle uqu yortlarına uquçılarnı häm uqıtuçılarnı täbriklärgä bardılar. Başqalanıñ iñ abruylı yuğarı uqu yortlarınıñ bersen - Qazan däwlät universitetın qotlarğa premyer-ministr urınbasarı Zilä Wälieva kilde. Älege uqu yortı bıyıl inde 200 märtäbä berençe kurs studentların qabul itä. Çärşämbe könne Tatarstan prezidentı Mintimer Şäymiev tä Qazan däwlät texnologiä universitetında buldı. Ul anda universitetnıñ Ğilmi Şurasınıñ utırışında qatnaştı, älege uqu yortınıñ problemaları, kiläçäkkä plannarı belän qızıqsındı. Annan soñ Mintimer Şäymiev Basket-xoll binasında Qazan texnologiä universitetı studentları belän oçraştı.

Basket-xolda Qazan däwlät texnologiä universitetı Belem könen bäyräm itte. Studentlarnı qotlarğa kilgän Tatarstan Prezidentı Mintimer Şäymiev berençe bulıp törle fakul'tetlar oyıştırğan kürgäzmä belän tanıştı. Bu xaqta Qazan däwlät texnologiä universitetı Röstäm Xösäyenov “Azatlıq” radiosına menä närsä dide

Biredä härber kafedra keçkenä genä programma täqdim itä. Çönki härber fakul'tetta üzençälek bar. Bezneñ mexanik fakul'tetta törle model'lar buldırabız.

Kürgäzmädä ayıruça ciñel sänäğät fakul'tetınıñ üze tekkän kiemnäre, azıq-tölek fakul'tetı peşergän ikmäkläre iğtibarğa layıq ide.

Ä bäyrämneñ töp çarası cır-biyu belän başlanıp kitte. Bügenge köndä 30 meñgä yaqın student uqığan texnologiä universitetında 70 tän artıq icat kollektivı bar, ul icat kollektivlarında 800 dän artıq uquçı qatnaşa.

Bügen bäyrämdä isä alar üzläreneñ sälätlären qunaqlarğa da kürsättelär.

Äytergä kiräk, soñğı yıllarda texnologiä universitetı şaqtıy üseş aldı. İñ zur konkurs ta bıyıl älege yuğarı uqu yortına buldı. Respublikabız byudjetına zur keremnär kitergän sänäğät, neft', neft' texnologiäse tarmağındağı belgeçlär dä älege uqu yortında äzerlänä. Bu xaqta bügen bäyrämdä qatnaşqan küp kenä oyışma citäkçeläre dä bilgeläp uzdı. Kompressorlar zavodı, suıtqıçlar çığaruçı “Pozis” oyışması, Tatspirtprom häm tağın şunıñ işe küp kenä berläşmälärneñ general' direktorları Qazan däwlät texnologiä universitetın tämamlağan ikän.

Xäzer universitet üz öçenä 13 institutnı berläşterä. Biredä uquçı studentlarnıñ öçese Rusiä Federatsiäse stepindiatı.

Oçraşuda qatnaşqan Tatarstan Prezidentı Mintimer Şäymiev başta barısın da bäyräm belän qotladı

Ata-analarğa, uqıtuçılarğa, ğalimnärgä räxmät äytäse kilä. Böten uquçı balalarğa, studentlarğa tırışıp uqırğa, ata-analarnıñ, uqıtuçılarnıñ ömetlären aqlarğa kiräk. Balalarnıñ bu töp burıçı.

Şulay uq Mintimer Şäymiev: "Bügenge bazar iqtisatı şartlarında härkemgä köndäşlekkä sälätle bulırğa öyränergä kiräk. Bu berençe şart. Sez iñ märtäbäle uqu yortlarınıñ bersendä uqisız. Xäzer belemlelär arasında köräş bara. Zamana taläbenä turı kilerlek belem alırğa kiräk”, - dide ul studentlarğa.

KDTUnıñ berençe kurs studentlarına isä bügen ikelätä bäyräm buldı. Belem köne uñayınnan Respublika başlığı alarğa säxnädän simvolik student dokumentın tapşırdı.

Landış Xarrasova

XS
SM
MD
LG