Accessibility links

җомга, 9 декабрь 2016, Казан вакыты 18:31

1 sentäber könne Nurulla mäçete yanında möselmannar piketqa çıqtı


Tatarstannan çittä yäşägän millättäşlär dä “Peçän bazarı mäçete” digän töşençäne belälär. Ul xäzer Nurulla mäçete dip atala. 1сентябрь könne balalar uqıtuçılar, ata-analar mäktäpkä yul totqanda mäçet qarşında piket cıyıldı. Alar Qazanda yäşägän möselmannar bulıp çıqtı. Anda törle mäçetlärdän imamnar - möselman xatın-qızları oyışmasınnan, qayber ictimaği oyışma wäkilläre cıyılğannar ide. Plakatlar totıp basqan piketçılarnıñ maqsatları nidän ğibärät ikän dip alardan soraştıq. Milli Mäcles räise häm Nurulla mäçeteneñ imam xätibe Ğabdulla xäzrät äytüençä, Nurulla mäçeteneñ revolyutsiägä qädär yätimnär yortı häm mädräsäse bulğan. Şunı saqlap qalu maqsatınnan Kirov uramındağı Nurulla mäçetenä terälep torğan 76 yort- xäräbä binanı mäçet qaramağına qaldırunı taläp itälär. Ä ul xäräbä bina bügenge köndä “Fon” dip atalğan tözeleş oyışmasınıñ şäxsi mölkäte ikän. Bu binanıñ mäçet qaramağında buluı bik zarur , çönki ul mäçetkä terälep torğan bina möselman xalqınıñ kitapxanäse bulırğa tieş ide. Mäçetkä başqa cirdän urın alıp bulmıy -, dip fiker yörtä mäçet imam xätibe Ğabdulla xäzrät.“ Bu revolyutsiägä qädär bulğan traditsiälärne saqlaw niätennän bez Tatarstan prezidentı Mintimer Şäymievkä häm Tatarstan premyer ministrı Röstäm Minixanovqa xatlar yazğan idek. Anıñ näticäse bulıp, bu bina Nurulla mäçetenä tapşırılırğa tieş diep yazılğan respublikanıñ cir häm mölkäti milek ministrlığınıñ qararı çıqtı ”.Ämma bu qararnı ni öçender Nurulla mäçete waqıtında tormışqa aşıra almağan.Xäzer bu milek başqa oyışma qulında. Piketqa çığuçılar arasında Qaban artı mäçeteneñ imam xätibe İsxaq xäzrät tä bar ide. Şähärebezgä İslam mädäni yortı kiräk. Bu urınnı yortnı mäçetkä birergä häm xakimiät belän bergä mäçet tiräsendä xalqıbıznı araqıdan narkotiktan ayırılıştıru maqsatınnan tärbiäwi ber mädäni bina yasaw”-dide ul. Möselman xatın –qızlar oyışması citäkçese häm “Möslimä” gäzite baş redaktorı Älmira Hädiä xanım söyli:“Nurulla mäçeteneñ kitapxanäse dä , yätim balaların tärbiäli torğan ber uçağı da bulırğa tieş. Bez basıp torğan cirlär Qazannıñ üzäge , monda teläsä kemneñ kerep kitapxanädän törle mäğlümat alırğa mömkinçelege bulırğa tieş.” Bez ädäp häm äxläq sağında torabız”,- dide ul. Räşidä İsxaqi abıstay fikerençä: “Bezneñ maqsatıbız şuşı nigezne alıp, xalqıbızğa balalarıbızğa İslam tärbiäse birü”-dide. Mäçet yanına cıyıluçılarğa, jurnalistlarğa mäçetneñ dini ähelläre , xezmätkärläre törle dokumentlarnıñ, qararlarnıñ küçermälären taratıp tordılar. Älege bäxäsneñ milek tiräsendä buluı şunı añlata , mäçet yanında cimerek bina häm anıñ urını “Fon” tözeleş oyışmasınıqı. Bu urınnı ul ber mädäni waqiftän satıp alğan. Mäçetkä terälep torğan iske bina urını nindi maqsattan qullanılası bilgele tügel. Nurulla mäçete xezmätkärläre anda berär küñel açu oyışması bulmasmı dip şiklänsälär dä, xäzergä bu turıda mäğlümat yuq. Bu bäxäs 2004 yılnıñ 11 uktäbrenä Arbitraj mäxkämäsendä qaralaçaq ikän. Mäs'älä piketta tügel, änä şul Arbitraj mäxkämädä xäl itelergä tieş. “Azatlıq” radiosı qağidäläre buyınça piketçılarnıñ däğwäların işettergän waqıtta, qarşı tarafnıñ da fikeren işetterergä teläsäk tä , yäki “Fon” tözeleş oyışmasınıñ fikerlären işetterä almıybız. Ämma bez xäzergä biredä respublikanıñ cir häm mölkäti milek ministrlığınıñ ,Qazan şähäre xakimiät wäkilläre fikerlären dä belä almadıq. Bälki kiläçäktä bu urında dini milli-mädäniätkä faydalı urın qorılır, bälki kiresençä bulır. Bu bäxäs tiz genä tınmas kebek. Açıqlıq zamanı qağidäläre buyınça bu piket turında respublika şähär televidenie kanalları köndezge häm kiçke tapşırularda kürsättelär.

Mälikä Basıyr .

XS
SM
MD
LG