Accessibility links

Кайнар хәбәр

Tönyaq Osetiädä yözlärçä keşe qorallı törkem tarafınnan totıq itep totıla


Könneñ töp teması - Rusiä buylap ütkän terror dulqını, xörmätle tıñlawçılar. Keşelär anda uzğan atnada ike yulçı oçqıçın şartlatu dähşätennän arınıp ta ölgermäde, düşämbe kiçen Mäskäwdäge "Rijskaya" metro stansiäse yanında yaña bomba şartladı. Ämma düşämbe irtän bu höcüm dä niçekter artqa çigende - qorallı törkem Tönyaq Osetiäneñ Beslan şähärendä berençe qıñğıraw bäyrämenä cıyılğan uquçılarnı häm alarnıñ yaqınnarın totıq itep aldı.

Ser tügel, Rusiä xalqı soñğı yıllarda awgust ayın ayıruça zur şomlanu belän kötä, xörmätle tıñlawçılar. GKÇP fetnäse, default, ikençe çäçän suğışınıñ başlanuı, "Kurski" su astı köymäse qazası - bu şomnıñ nigezendä menä şuşı dähşätle waqiğälär yata. Bıyıl da çığarma bulmadı, uzğan atnada ğına Rusiädä beryulı ike yulçı oçqıçı şartlatıldı. Alay ğına da tügel, bıyılğı awgust ayı, bu yaqtan qarağanda, ozaqqaraq ta suzıldı - 1-nçe sintäbrdä Tönyaq Osetiäneñ Beslan şähärendä ber törkem qorallı keşe, yaña uqu yılı başlanuğa bağışlanğan "berençe qıñğıraw" tantanasında qatnaşqan yözlägän uquçı häm alarnıñ yaqınnarın totıq itep aldı. Andıy ğädättän tış waqiğälärgä xas bulğança, höcüm itüçelärneñ, totıq itep alınğannarnıñ sanı, xakimiat häm qorallı törkem arasında barğan söyläşülär turında qarşılıqlı xäbärlär kilä. Beslandağı mäktäpkä 20-läp qorallı keşe höcüm itkän dip belderelä, alar totıq itep alğan keşelär sanı berniçä yöz tiräse, şularnıñ kimendä 200-e mäktäp uquçısı dielä. Höcüm başlanu belän qaçıp qotılğan balalarnıñ berse Zaurbek Tsumartov, çärşämbe irtän mäktäptä bulğan xällärne bolay sürätli:

Audio, Zaurbek Tsumartov

"Bez uquçılar safında tügel, ä qapqa töbendä tora idek, cır uynağanda min avtomat kütärgän berniçä keşeneñ yögerep kerüen kürdem, başta monı ber şayaru dip uylağan idem, läkin alar hawağa atarğa totındı häm bez çaba başladıq" dip taswirlıy kürgännären Beslan mäktäbeneñ höcümçelärdän qaçıp qotılğan ber uquçısı. Totıqlarnı alğannan soñ mäktäp yanında bulğan atışta kimendä ike, qayber mäğlümatqa qarağanda öç keşe üterelgän, 11-e törle cäräxätlär alğan, şularnıñ kimendä ikese uqıtuçı häm öç militsiä xezmätkäre dip xäbär itelä. Yalın özep aşığıç räweştä Mäskäwgä qaytqan prezident Putin Beslan şähärenä ilneñ eçke eşlär ministrı Räşit Nurğalievne häm Federal'' iminlek xezmäte başlığı Nikolay Patruşevne cibärde. Totıqlar xälen çişü eşenä anda älegä qädär Tönyaq Osetiä prezidentı Aleksandr Dzasoxov citäkçelek itä ide. Ul arada, höcüm itüçelär üzlärenä qarşı höcüm yasalıp anda alardan berärse üterelsä, cawap itep berniçä distä, Tönyaq Osetiä eçke eşlär ministrı Kazbek Dzantiev süzlärenä qarağanda, 50 totıqnı ataçağın belderde digän xäbär kilde. Zur höcüm başlanğan oçraqta alar bar mäktäp binasın şartlatu belän yanıy. Totıqlarnı alar sportzalda tota dip farazlana. Köne buyı höcümçelär belän elemtä urnaştıru tırışlıqları yasalsa da, alar moña bik telämi genä bara. Aralaşu täräzädän taşlanğan yazmalar aşa ğına alıp barıla. Qayber mäğlümat çaraları, taläplär arasında Tönyaq Osetiä wä İnguşetiä prezidentları belän oçraşu, Mäskäwdän mäğlüm tabib Leonid Roşal''ne çaqıru, Rusiä törmälärendä totılğan çäçän wä inguş suğışçıların azat itü, Çeçnädän federal'' ğäskärlärne çığaru kebekläre bar dip xäbär itä.

Kärim Kamal
XS
SM
MD
LG