Accessibility links

җомга, 9 декабрь 2016, Казан вакыты 08:42

Tatarstan mäktäplärenä qurqınıç yanamıymı?


Rusiäneñ Tönyaq Osetiädäge faciğäle xällär Tatarstanda da berkemne dä bitaraf qaldırmadı. Totıq itep alınğan balalar, terrorçılar turında mäğlümät çaralarında ğına tügel, ä avtobus, tramvaylarda da, tuqtalışlarda da söyläşälär. Eçke eşlär ministrlığı wäkilläre isä respublikada Vixr’-antiterror operatsiäseneñ yaña öleşe başlanıp kitüe, Tatarstanda östämä qurqınıçsızlıq çaraları kürelü turında xäbär itä, tatarstanlılarnıñ üzlären dä uyaw bulırğa çaqıra. Ä Tönyaq Osetiäneñ Beslan şähärendäge faciğä uñayınnan Qazan mäktäplärendä nindi dä bulsa östämä saqlıq çaraları kürelgänme soñ? Bu xaqta beler öçen bez başqalanıñ törle rayonnarında urnaşqan berniçä mäktäpkä şaltıratıp beleştek.

Soñğı könnärdäge Tönyaq Osetiädäge waqiğalar xaqında bez dä işettek. Barısı öçen dä bik qayğırıp torabız. Qazan mäktäplärendä qurqınıçsızlıq çaraları Vixr’-Antiterror operatsiäläre ütä başlağannan birle kürelä inde. Bezneñ podvallar yabıq, mäktäpkä çit keşelär kerä almıy. Alla saqlasın, andıy xällär bulmasın inde bezdä.

Xäzer bezneñ mäktäplärdä militsiä xezmätkärläre dejur itä. Şulay uq uqıtuçılar, uquçılarğa uqular ütkärelde, añlatmalar birelde. Qazanda andıy faciğäne buldırmabız dip uylıym inde min, läkin kem belä inde, bolay ğına äytep bulmıy şul

Bezdä östämä qurqınıçsızlıq çaraları kürelde. Xäzer mäktäptä ata-analar tarafınnan da patrul’lär oyıştırıldı, alar uqıtuçılar belän bergälektä här könne uquçılarnı irtän klasslarğa qädär iltep quyalar, qarşı alalar. Mäktäpkä çit keşe kerä almıy. Militsiä xezmätkärläre dä täwlek buyın diärlek dejur toralar

Şulay itep, Qazan mäktäplärendä 1 sentäberdä Beslan mäktäben terrorçılar basıp alğannan soñ, ällä ni zur qurqınıçsızlıq çaraları kürelmägän. Qayber mäktäp citäkçeläre äytkänçä, listovkalar taratılğan da, ata-analar, uqıtuçılar arasında añlatu eşlär alıp barılğan. Läkin bu çaralar ğına terrorçılarğa kirtä bula alamı soñ? Mäktäpkä çit keşelärne kertmi torğan vaxterlar da, ğadi ata-ana yäki jurnalistqa qarşı bik nıq torsa da, cinayätçelärgä qarşı kilä almas. Qazan mäktäplärendä militsiä xezmätkärläre dä dejur tora. Bu çara äle Osetiädäge faciğäle xällärgä qädär ük kertelgän ide inde. Läkin elek militsionerlar qoralsız bulsa, xäzer alarnı qorallandırırğa bulğannar. Xäyer, mäktäp tiräsendä tärtip saqlawçı 1-2 militsiä xezmätkäre genä ber törkem qorallanğan cinayätçelärne tuqtatıp qala almayaçaq, dip sanıy respublika Eçke eşlär ministrlığınıñ İctimaği qurqınıçsızlıq militsiäse citäkçese Rafil Noğmanov. Anıñ fikerençä, terror aktların buldırmaw östendä kriminal militsiä häm däwlät qurqınıçsızlığı orğannarı eşlärgä tieş. Mondıy eş alıp barılmağanda isä, bezneñ belän söyläşkän mäktäp citäkçeläre kebek Allahı täğälägä genä ömetlänergä qala.

Gölnaz İlgizär

XS
SM
MD
LG