Accessibility links

чәршәмбе, 7 декабрь 2016, Казан вакыты 21:29

Tatnet: 2004 yılda tağın 1306 awıl mäktäbe internetqa totaştırılaçaq


1 sentäber, Rusiä buylap, belem köne bularaq bilgeläp ütelä. Şuşı könnärdä, Qazanda, mäğlümäti häm kommunikativ texnologiälelär bağışlanğan konferensiä bulıp ütte. Tatarstan Elemtä ministrlığı, mäğlümäti texnologiälärne üsterü yünäleşendäge uñışları belän tanıştırdı. Konferensiädä, älege ölkädä eşläwçe şirkätlär dä qatnaştı. Belgänegezçä, «İntel» şirkäte belän xezmättäşlek itärgä cıyınu turında räsmi kileşügä qul quyıldı. Bu oçraqta süz yıllar buyına suzılğan söyläşülär häm cihazlarnı quyu turında barsa, «Tattelecom» şirkäte, inde xäzer uq, mäktäplärgä cihazlar quyu, internetqa totaştıru belän şöğellänä. Älege şirkät Mäğärif ministrlığı ütkärgän bäygene otıp, respublika mäktäplären global çeltärgä totaştıru xoquqın yawlap aldı. Bu xaqta «Tattelecom» şirkäteneñ citäkçe urınbasarı Azizov İlgiz söyläde. İlgiz äfände beldergänçä, 1nçe sentäberdä 130 mäktäptä kompyuterlar internetqa totaştırılğan ide. Alarnıñ kübese awıllarda urnaşqan. Bu yıl betkänçe, barlığı 1306 mäktäptä şulay uq tieşle cihazlar quyılırğa tieş. Ä ğomumän «Tattelecom» 2000 mäktäpne global çeltärgä totaştırırğa wäğdä itä. Dimäk bu eş 2005 yılda da däwam iteläçäk. İntranet kebek cirle çeltär dä yaqın arada, awıl xakimiätlärenä eşläwçelärgä bik ğadi äyber kebek kürenä başlar. İlgiz Azizov beldergänçä, inde xäzer uq barlıq rayonnarnıñ rayon idäräläre üz ara eçke çeltärgä totaştırılğan. Kürşe rayon xakimiätläre bik tiz arada ber bersenä dokumentlarnı cibärä ala, Qazan belän elemtägä kerä ala. Bu respublikanıñ informatizatsiä programmasın qısalarında eşlänä. Rayon idärälären ber elektron çeltärgä totaştıru elege programmanıñ ber öleşe bulıp tora. Kiläçäktä tağın video-konferensiälär oyıştıru, ğlobal çeltärgä totaştıru, kiñäşlämälärdän translyatsiä alıp baru kebek teläk, täqdimnär äytelä. «Tattelecom» şirkäte wäkile beldergänçä, däwlät programmasınıñ ber öleşe inde eşlänsä dä, anı niçek däwam itterü turında açıq cawap birep bulmıy. Bu xaqta zakaz birüçe xakimiätlär häm bu eşne başqaruçı elemtä şirkätläre arasında söyläşülär bara. Här xäldä, xäzer şunı äytep bula, iñ yıraq awıllarda da, mäktäplärdä, rayon idärälärendä internet bar häm bulaçaq.



Bikä Timerova.

XS
SM
MD
LG