Başqortstan tatar milli oyışmaları berlege Tatarstanda ütäçäk Başqortstan tatarları könnärenä äzerlek alıp barunı däwam itä. Şuşı bäyrämne ütkärüne oyıştıru qomitetınıñ qayber äğzaları 3 sentäbr könne üzläreneñ çirattağı utırışın ütkärde. Anda kiläse atnanıñ sişämbese – 7 sentäbrdä Ufada ütäçäk utırışta tikşerelergä tieşle mäsälälär qaraldı. Älege utırışta äytelüençä, 7 sentäbrdä cıyılaçaq kiñäytelgän utırışqa rayonnardan häm şähärlärdän dä baytaq qına keşe kilergä tieş. Alar urınnarda Tatarstanda ütäçäk Başqortstan tatarları könnärenä barırğa saylap alınğan keşelärneñ isemleklären tapşıraçaq.
Qazanda Başqortstan tatarları könnären ütkärügä ay yarımlap qına waqıt qalıp bara. Bu könnär üktäber ayınıñ yegermelärendä ütär dip küzallana. Aldağı atna sişämbesendä bu bäyrämneñ täğayın qaysı könnärdä ütäçägenä dä tulı açıqlıq kerer dip kötelä. Başqortstan tatarlarınıñ Qazandağı könnärenä 250 çaması keşe baraçağı tağın ber qat äytelde. Alar arasında törle hönär iäläre bar. Älbättä, alarnıñ kübese Başqortstan tatar cämägätçelegenä kiñ bilgele zıyalı şäxeslär – tatar milli oyışmalar citäkçeläre häm aqtiv äğzaları, şulay uq uqıtuçılar, yazuçılar, ğälimnär, rässamnar, kürenekle sänğät ostaları häm başqa icat ähelläre.
Utırışta Qazandağı könnärdä Tatarstan däwlät eşlekleläreneñ, tatar cämägätçelek oyışmaları wäkilläreneñ, ğälimnäreneñ häm başqa ataqlı şäxesläreneñ dä qatnaşaçağı äytelde. BR Tatar ictimağıy üzäge räise Ayrat Ğiniätullin äytüençä, Tatarstan cämägätçelege belän oçraşularda Başqortstan tatarlarınıñ könüzäk problemnarı turında citdi söyläşülär ütkärü qarala.
Başqortstan Tatar milli oyışmaları berlege räise urınbasarı Mäcit Xucin kiläse atnadağı utırışta Başqortstanda tatar mäktäplärendä mäcbüri räweştä başqort telen kertä başlawğa bäyle mäsäläne dä qararğa täqdim itte. Anıñ bu fikeren başqalar da xuplıy. Älege qatlawlı mäsälä buyınça Başqortstan Mäğärif ministrlığına xat yazarğa kileştelär. Çönki älegä ber qanunda da başqort telen mäcbüriläp uqıtu turında telgä alınmağan. Şuña kürä Başqortstan Mäğärif ministrlığı türäläre üzläreneñ yarım yäşeren kürsätmäsenä räsmi räweştä añlatma birergä tieş dip äytelde. Ägär andıy añlatma alınmasa, Başqortstan Tatar ictimağıy üzäge räise Ayrat Ğiniätullin bu eşne mäxkämägä birergä kiräklegen belderde.
Utırışta Başqortstan rayonnarında tatar milli – mädäni moxtariälären tözü barışı turında da fiker alıştılar. Bu eş alda bilgelängän tärtiptä bara. Näq şuşı utırış bulğan könne respublikta xalqınıñ iñ zur küpçelegen tatarlar täşkil itkän Boray rayonında tatar milli – mädäni moxtariäten tözü buyınça oyıştıru cıyılışı ütüye äytelde. Şundıy uq cıyılış 4 sentäbr könne Täteşle rayonında da ütäçäk. Şulay itep tizdän Boray belän Täteşle rayonnarında da tatar milli – mädäni moxtariätläreneñ räisläre häm idarä äğzaları saylanaçaq
Kiläse atnanıñ 8 sentäbrendä Ufada Başqortstan Tatar kongressı Başqarma qomitetınıñ da cäyge qäniqullardan soñğı täwge utırışı ütäçäk. Anda da kön tärtibendä iñ berençe çiratta Tatarstanda Başqortstan tatarları könnären ütkärü mäsäläse toraçaq. Şulay uq bu yıl azağına qädär qalğan waqıtta oyıştırılaçaq başqa çaralarnıñ planı qaralır dip kötelä.
