Accessibility links

якшәмбе, 4 декабрь 2016, Казан вакыты 15:27

Bislan xalqı qanlı comğa qorbannarın cirli


Tönyaq Osetiäneñ Bislan şähäre bu atnada bulğan totıqlar faciğäse qorbannarın cirli başladı. Yäkşämbe könne 22 keşe cirlände. Aldağı könnärdä cirlänäçäk 300-dän artıq mäyetkä aşığıç räweştä tabutlar äzerlänä. Soñğı räsmi isäpläwlärgä qarağanda kimendä 330 keşe hälak bulğan, 700-dän artıq keşe yaralanğan. Tağın 260-lap totıq yuğalğannan isemlegendä. Cirle xalıq äytüençä barlığı 500-läp keşe ülgän bulırğa mömkin. Uzğan comğada totıqlar yabılğan, şartlatqıçlar quyılğan mäktäptä şartlaw tawışları işetelgännän soñ rusiä xärbiläre mäktäpne yaw belän aldı. Rusiä xakimiätläre 1-nçe sintäberdä totıq itep alınğan balalarnıñ häm olılarnıñ ülemenä yul quymaw öçen buldıra alğannıñ barısın da eşläwläre turında belderä. Tönyaq Osetiä prezidentı süzçese Lev Dzurgaev yäkşämbe könne xäbärçelärgä qorbannarnıñ kübeseneñ ülemenä mäktäp sportzalındağı bomba şartlaw säbäp bulğan dide. Anda ber meñnän artıq keşe bulğan. Ul şulay uq berençel tikşerülär küp kenä başqa qorbannarnıñ şartlawdan soñ mäktäptän qaçqanda artlarına atu näticäsendä ülüen kürsätä dide. Şimbä könne Rusiä prezidentı Vladimir Putin televidenie aşa Rusiä xalqına möräcäğät itte.

Ämma comğa waqıyğalarına şahit bulğan Beslanda yäşäwçelärneñ kübese totıqlar krisizında xakimiätlärneñ ğämällärenä açu belderä. Qayberläwlär Rusiä räsmilären qabat-qabat xalıqnı aldawda ğäyepläde. Valya isemle xatınnıñ 2 balası bu faciğädän qotılıp qalğan. Ul älege waqıyğalar Rusiä xakimiätlärenä ömet az buluın kürsätä di. Valyanıñ kürşese Tsiala Putin çığışın tıñlağannan soñ alğa taba ışanırğamı-yuqmı ikänen belmim di.

Mäskäwdä qayber jurnalistlar Belsan waqıyğaları turındağı räsmi xäbärlärgä şik belderä başladı. Şik astına quyılğan xäbärlärneñ berse totıq aluçılar arasında 9 ğäräp häm ber afrikalı bulğan digän süzlär. Bu xäbärne soñraq Tönyaq Osetiä eçke eşlär idaräse süzçese dä rasladı. Ämma ul totıq aluçılarnıñ qayse il watandaşları buluı äle dä äytelmi. Qanlı waqıyğalardan soñğı ike kön eçendä jurnalistlar isän qalğan totıqlar belän söyläşte, ämma alarnıñ berse dä totıq aluçılar arasında ğäräplär yäki afrikalını kürüe turında berni dä äytmäde.

Bügen Yewropa Komissiäse başlığı Romano Prodi Niderland tışqı eşlär ministrınıñ Russiä xakimiätlärennän Beslandağı ğämälläre, ni öçen 300dän artıq keşeneñ ülüe turında añlatma birü sorawın yaqlawın belderde. Prodi Niderland tışqı eşlär ministrınıñ bu sorawı bik tä nigezle häm duslarça mönäsäbätlärgä iä illär arasında ğädäti küreneş dide. Rusiä tışqı eşlär ministrlığı Niderland ministrınıñ sorawın bik yämsez dip bäyäläwçe belderü belän çıqqan ide.

Naif Aqmal, Praga.
XS
SM
MD
LG