Accessibility links

якшәмбе, 11 декабрь 2016, Казан вакыты 13:08

Tönyaq Osetiädäge xäl Tatarstanda da bula alamı?


Räsmi bulmağan mäğlümlät çaralarında « Tönyaq Osetiädäge xällär niçek mömkin buldı? Kiläçäktä niçek yäşärgä häm terrordan niçek saqlanırğa?» digän sorawlar quyıla. «Exo Moskvı» radiosınıñ kiçke analitik tapşırularında bu sorawlarğa östäp, Rusiä eçendäge möselman respublikalarına da iğtibar yünältelde. Mäsälän, radio xäbärçe Yevgenia Albats, «Tatarstan häm Başqortstanda da islam dinen totalar, nigä terrorçılarlar ğädättä Kavkaz yäki Çeçnyädän bula?», digän soraw quydı. Älege tapşıruda qatnaşuçılar, bu sorawğa, säyäsi yaqtan qarap cawap birergä tırıştı, ul yaqtağı näseldän näselgä kilgän üç alu ğädäten dä iskä töşerde. Ämma, çınnan da Tatarstanda häm Başqortstanda da Tönyaq Osetiädäge xälneñ kilep çığuı mömkinme? Bu sorawnı uramdağı keşelärgä birdek. Keçkenä genä soraştıru Qazanıñ Çexov bazarında ütte. «Azatlıq» radiosı xäbärçesenä oçrağan keşelärneñ küpçelege urıs millätennän häm ölkän yäştä buldı. Alar Rusiäneñ räsmi mäğlümat çaraların bu könnärdä birelep qarağan häm balalar öçen bik borçılğan.

Cawap birüçelär arasında, Tatarstanda terror ğämäleneñ bulu yäki bulmaw mömkinlegen törle millät häm din keşeläreneñ üz ara dustanä yäşäwläre belän bäyläde. «Azatlıq» radiosı xäbärçesenä oçrağan keşelär arasında älege waqiğalarğa dinnär qarşılığı küzlektän qarawçılar da buldı. Xökümät qarşındağı Din eşläre şurası räise häm ğalim Rinat Nabiev isä, bezgä uramda oçrağan keşelär belän, kileşmäs ide. Ul bolay dide: «Bezneñ xalıq 90nçı yıllarda bulğan kierenkelekne qanlı qarşılıqqa barıp citkermäde, xäzer dä möselmannar häm xristiannar, törle millät keşeläre arasında qarşılıq kilep çıqmas, dip farazlıy alam».

4 sentäber kiçendä Tatarstandağı milli-mädäni oyışmalar berlege üzeneñ belderüen tarattı. Anda äytelgänçä, «qayğıdan yöräklär sıqrasa da, ayırım xalıqlarğa qarata dälillisez ğäyepläwlär taşlawçılar bulmas», dip ömetlänä milli oyışmalar berläşmäse. Rusiä tatarlarınıñ milli-mädäni avtonomiäse dä belderü belän çıqtı. Anda «tatarlar terrorğa qarşı toruçılarğa teläteşlek kürsätä» dielä. Tatarstan parlamentı qarşındağı Yäşlär ictimaği palatası häm Qazan däwlät Universitetınıñ studentları da terror ğämällären ğäyepläp çıqtı. «Aq bars» xokkey komandası, «Rubin» futbolçıları häm «Dinamo» voleybolçıları Tönyaq Osetiä xalqınıñ tirän qayğısın urtaqlaşa. Sportçılar, yärdäm yözennän uyınnan kergän aqçanı, Beslanda zıyan kürüçelär fondına küçerergä qarar qılğan.

Bikä Timerova.

XS
SM
MD
LG