Accessibility links

Кайнар хәбәр

Tatarstan belän Bolğarstan Fännär Akademiäläre xezmättäşlek başlıy


Säläm duslar, inde Azatlıqnıñ yäkşämbe utırmasına räxim itegez. Bügen anı min Ali Ğilmi alıp baram häm sezne ber küper turında, söyläşügä çaqıram, ul da busa, xalıqlar arasındağı küper turında...

Elekke utırmalarnıñ bersendä, Sälät xäräkäteneñ Bilärdä ütkän festivale turında söylägändä, ber törkem Sälät balalarınıñ häm ğalimnäreneñ Bolğarstanğa baruı turında äytkän idem. Alar anda "Slavyan küpere – balalar diplomatiäse" dip atalğan xalıqara proyekt qısalarında, Qara diñgez buyındağı Nesebr şähärendä ütkärelgän çarağa çaqırılğan ide. Tatarstan Fänär akademiäseneñ möxbir äğzaları Cäwdät Söläymanov häm Fayaz Xucin citäklägän törkem küptän tüğel şul säfärdän qaytıp töşte. Häm min Fayaz äfände belän bu säfärneñ näticäläre turında säyläşep aldım. Fayaz äfändene küplär Qazannıñ 1000 yıllığın isbatlawğa öleş kertkän ğalim bularaq belä. Ämmä moñarçı ul ozaq yıllar buyına Böyek Bolğar qalası Bilärdä qazınular alıp barğan. Fayaz äfände äytüençä, Vİİ ğasırğa qädär ber xalıq bulıp yäşägän, İdel häm Dunay Bolğarları arasında yaña xezmättäşlek urnaştıru zur ähämiätkä iä. Näticädä, slavyan küpere digän çarağa çaqırılğan Tatarstan delegatsiäse, Bolğarstanğa barıp, yaña ber küper qorıp qaytqan, ul da bulsa İdel bolğarları warisları, tatarlar belän Dunay bolğarları arasında. Tatarsan delegatsiäse dip zurlap äytüem şuña, bu säfärgä beryulı berniçä oyışma öleşen kertkän. Çaqıru Tatarstan xökümätenä kilgän, oyıştıru eşlären Yäşlär ministrlığı kütärgän, räsmi söyläşülär ütkärügä fatixanı Fännär akademiäse birgän, başqaruçılar isä Sälät xäräkäte. Xäyer, bu turıda sez Fayaz äfände belän bulğan äñgämädän işetersez.

(Fayaz Xucin belän äñgämä)

Tatarstan Fänär akademiäseneñ möxbir äğzası Fayaz Xucin belän äñgämä tıñladığız. Anıñ belän kileşmi bulmıy, şuşı nizaqlı dönyada xalıqlar arasında duslıq cepläre, yaña küperlär qoru - kiräkle şäyder. Tönyaq Osetiädäge şomlı waqiğalar bu atnada bar dönyanı tetränderde. "Ul arada tatarlar başqa xalıqlar belän xezmättäşlek yulları ezli" digän qupşı süzlär äytäse kilmi. Şulay da, sälkeşlärneñ aqrınlap xalıqara säxnägä çığa baruwın, üzenä kürä ber waqiğa dip atarğa buladır. Sälkeşlär başqaruında bez cır quyıp, bügengä min sezneñ belän xuşlaşam, xörmätle tıñlawçılar. Azatlıqnıñ yäkşämbe utırmasına kiläse atnada da kerep çığarğa onıtmağız. Şulay uq bezneñ internet säxifäse barın da omıtmağız. Azatlıq radiosın tıñlap qına tügel, uqıp ta bula! Adresnı isegezgä töşeräm, www.azatliq.org. Äytkändäy, xäzer Azatlıq xäbärlärenä yazılu möminlege bar. Bezneñ köndälek xäbärlärne, küzätülärne, kön sayın elektron xat räweşendä alırğa teläsägez, säxifägä kerep adresığıznı yazıp qaldırız. Äyter süzegez, fiker-täqdimnäregez bulsa, räxim itegez, monı da säxifädä eşläp bula. İsän-saw bulığız.

-Ali Gilmi
XS
SM
MD
LG