Accessibility links

Кайнар хәбәр

Yekaterinburgta matäm mitingı ütte


7 sentäber könne Yekaterinburgta bötendönya xalqın teträndergän Beslan waqiğalarınnan soñ matäm mitingı bulıp uzdı. Salqın cil, sibäläp torğan waq közge yañğırğa qaramastan, şähärneñ üzäk mäydanına meñlägän xalıq cıyıldı. Mäydanda “Rusiä terrorğa qarşı”, “Bala üterüçelärgä xalıq qarğışı töşsen”, “Banditlarnıñ milläte dä, imanı da yuq” digän eçtälekle lozunglar, plakatlar kürergä bula ide. Mitingta çığış yasağan çağında, Sverdlov ölkä gubernatorı Eduard Rossel' terrornı çittäge zur köçlär tarafınnan Rusiägä qarşı iğlan itelgän, däwlätne eçtän tarqatıp, Rusiä baylıqlarına qul suzunı maqsat itep quyğan suğış dip atadı. Ul Ural xalqın berdäm bulırğa, uyulıqqa çaqırdı.

Rusiä däwläten eçtän tarqatırğa, beterergä maqsat itep quyğan terroristlarnıñ qılğan ğämälläre bernindi qısalarğa sıymaslıq. Soñğı ber atna eçendä genä dä Rusiä cirendä dürt terakt yasaldı. Yekaterinburg şähäre xakimiäte başlığı Arqadi Çernetskiy üzeneñ çığışında xalıqara köçlärneñ Rusiädäge terrorğa mönäsäbäte Rusiägä kem dus, kem doşman ikänen açıq kürsätä, dide. Qayber illärdä terroristlar ike keşe ütersä, ul terakt, ä Rusiädä yözlägän keşe häläk bulsa, ul xakimiät ğayıbe dilär, dip belderde ul. Terroristlar üz ğämälläre öçen qatği cäza alırğa tieşlär, dide ul.

Terakt qorbanı itep 1nçe sentäber könne matur çäçkä buketları kütärep belem bäyrämenä cıyılğan gönahsız sabıylarnı, alarnıñ äti-änilären, uqıtuçılarnı saylağan banditlarğa xalıq näfrät yawdırdı. Mitingta çığış yasawçılar arasında küp balaları analar da bar ide.

Milli oyışmalar isemennän Ural däwlät universitetı uqıtuçısı, Yekaterinburgtağı osetin mädäni oyışması wäkile Liana xanım Ğağlayte çığış yasadı. Osetin xalqı bu awır faciğäle könnärdä üze belän bergä qayğı kiçergän ilgä olı räxmät belderä, dide ul.

Xalıqnıñ dini xislärendä uynap, millätara doşmanlıq quzğatırğa mataşuçı terroristlarnıñ uyları barıp çıqmas. Küpmillätle Ural xalqı ber bulıp urtaq doşman – terrorğa qarşı kütärelde. Miting barışında şundıy fikerlär küp yañğıradı.

Fäwiä Safiullina, Yekaterinburg
XS
SM
MD
LG