Accessibility links

Кайнар хәбәр

"Times": Beslan fäciğäse waqıtında Çeçen köräşçeläre citäkçeläreneñ tuğannarı qulğa alındı


Beslan faciğäse dönya cämağätçelegeneñ diqqät üzägennän töşmi. Äle bu xaqta kiläçäktä dä küp süz bulır. Russiä citäkçeläre, şul sanda prezident Putin dä, Beslan fäciğäse belän Çeçnä suğışı araısında bäyläneş yuq dip azsızıqlap belderslär dä, moña ışanu qıyın. Russiä xakimiätläre kürgän çaralar da monı quätliy. Beslanda mäktäp basıp alınıp ta, meñnän artıq keşe totıq itep alınğannan soñ uq, Çeçen köräşçeläre citäkçeläreneñ 50 çaması tuğan-tumaçası vaqıtlıça qulğa alındılar. Bu xaqta Britan gazetası Timesta bügen basılıp çıqqan maqäläneñ eçtälege.

Times gazetasınıñ yazuınça, uzğan atnada Tönyaq Osetiada totıq alu vaqiğäse barğanda, Çeçnädä iminlek köçläre Çeçen köräşçeläre citäkçeläreneñ 50 çaması tuğan-tumaçaın, şul sanda xatın-qız häm balalarnı qulğa alıp xärbi bazada totqannar. Aslan Masxadovnıñ qaenişi Şirvani Semievneñ belderüenä qarağanda, Çomğa irtän bronetransportlar öyen uratıp alıp , anı häm üzeneñ häm eneseneñ barlıq ğailä ağzaların, şul sanda xatın-qız häm balaların yök maşinasına utırtıp alıp kitkännär. Anı Xanqaladağı xärbi bazada ike kön totqan bulğannar. Qulğa alınğannar arasında Şamil Basayevneñ dä tuğannarı bulğan. Semievneñ ulı monnan ike yıl elek şulay uq qulğa alınğan bulğan häm ul vaqıttan birle ul ezsez yuğanğan. Semievneñ süzlärençä, irlärneñ häm ir balalarnıñ qulların artqa bäyläp tezländergännör häm alardan köräşçelärneñ citäkçeläre qayda dip sorağannar. Semiev alarğa bolay dip cavap birgän. Ul qaydadır taularda , urmannarda , ä min monda üzänlektä. Niçek inde ul barlıq kontrol noqtaların ütep miña kilä alsın inde. İke könnän soñ alarnı irekkä çığarğannar häm ber polkvnik, qulğa alu yalğışlıq belän buldı dip beldegän. Semiev häm ğailäsen xärbi boralaq belän öylären'' qaytarğannar. FSB süzçese general-mayor İlya Şabalkin, fetnä citäkçeläreneñ qayber tuğan-tumaçalarınıñ qulğa alınğan buluın iqrar itte , läkin, bu alarnı Beslan qorbannarınıñ tuğan tumaçalarınnan saqlau öçen eşlände dip belderde. Aslan Masxadovnıñ Londonda yäşävçe süzçese Axmed Zakayev räsmi añlatma döreslekne çağıldırmıy , Russiä iminlek köçläre monıñ belän Çeçen ğısyançıları citäkçelärenä, bez tuğannarığıznıñ qayda buluın beläbez häm alardan üç alalabız digän işarä cibärergä telädelär bulsa kiräk dip belderde. Maqäläneñ Çeçen köräşçeläre citäkçeläre tuğannarınıñ Beslan fäciğäse vaqtında vaqıtlıça qulğa alınularına qarağan öleşendä qısqaça şundıy mäğlümät birelgän.

Färit İdelle, Praga.
XS
SM
MD
LG