Accessibility links

сишәмбе, 6 декабрь 2016, Казан вакыты 13:14

Bulanaşta Milli Media-Xolding bülege açıldı


Küptän tügel Sverdlov ölkäseneñ Bulanaş şaxterlar poselogında Yekaterinburg şähärendä eşläp kilüçe Milli Media-Xoldingnıñ bülege açıldı. Açılu tantanası poseloknıñ balalar belän mäktäptän tış eşläw üzägendä uzdırıldı. Elegräk bu üzäk “Milli üzäk” digän isem yörtkän. Biredä ölkä külämendä berençelärdän bulıp açılğan tatar yäkşämbe mäktäbe eşläp kilgän. Bu yıl ul mäktäp açıluğa 15 yıl tulası ide, ämma, qızğanıçqa qarşı, soñğı ike yıl eçendä ul mäktäp eşläwdän tuqtağan. Üzäkneñ bügenge citäkçese Valentina Pavlovna Savelyeva monı uqırğa teläwçe balalarnıñ azlığı belän añlata. Äytik, ütkän uqu yılı başında nibarı 5 bala tatar telen öyränergä teläk beldergän. Üzäk citäkçeläre biş bala öçen uqıtuçı totunı kiräksenmägännär. Şuña qaramastan, elekkege balalar baqçası binasında urnaşqan üzäk tatar milli aktivistların bik teläp qabul itä. Ütkän yıl däwamında biredä “Yäşlek” isemle biyu ansamble häm “Tañ yoldızı” isemle cır ansamble oyıştırıldı. Şulay uq aş-su tügäräge, qul eşläre tügärägendä dä tatar milli çalımnarı bar. Şuña kürä dä, Milli Media-Xolding citäkçeläre bülekne şuşı üzäk qarşında oyıştırırğa qarar ittelär. Alar Bulanaş bülegenä büläk itep “Yaña ğasır” teleradiokompaniäse tapşıruların qararğa yaraqlaştırılğan sputnik teleantenna häm televizor alıp kildelär. Açıluğa bağışlanğan tantanağa kilüçe qunaqlarnı tatar ansamblenä yörüçelär işek aldınnan uq cır-biyu belän qarşı aldılar.

Tantanağa Milli Media-Xoldingnı ğämälgä quyuçı Yekaterinburg qunaqlarınnan tış, cirle xakimiät wäkilläre, tatar eşmäkärläre dä çaqırılğan ide. Zur zalğa xalıq bik küp bulıp cıyıldı. Bulanaş tatarlarınıñ milli tormışın quzğatu turındağı äñgämä bik canlı ütte. Süz tatar yäkşämbe mäktäbe eşen yañartu, üzäkkä tatar balaların tartu, tatar milli tormışın canlandıru turında bardı. Şunda uq sputnik antennanı urnaştırıp, TNV tapşıruların qarap aldılar. Tatarstan tapşıruların qaraw mömkinçelege biregä yäşlärne häm balalarnı tartır digän ömet belän çığış yasawçılar küp buldı.

İñ möhime – cirle tatar eşmäkärläre häm xakimiät wäkilläre bu eşneñ bik kiräk ikänlegen añlap, şuña basım yasadılar. Äytergä kiräk, küp kenä yäş citäkçelär öçen milli mäs'älälär biredä bötenläy berençe märtäbä kütärelä. Artemovskiy rayon xakimiäte başlığı urınbasarı Sergey Taborinsev bu mäs'älä belän berençe märtäbä oçraşuın äytep, milli mädäniätne üsterü xalıq ixtıäclarına turı kiler dip belderde. Cıyılğan qunaqlar aldında Qazaqstan respublikasınıñ atqazanğan mädäniät eşleklese Boris Şagaliev citäkçelegendä oyıştırılğan ansambl' çığış yasadı. Bigräk tä Borisnıñ xatını – Läylä Qunanbayıva çığışı cıyıluçılarnıñ küñelenä xuş kilde. Qulına ber yäş tä ike aylıq qızın kütärep, itägenä sarılğan dürt yäşlek ulınıñ başınnan sıypıy-sıypıy rus romansın suzğan Läyläneñ küzlärennän yäş tägäräp töşä. Xalıq tın da almıy tıñlağanda gel şulay dulqınlana ul. Çit cirdäge tatar xalqı üz itep qarşı alsa da, cirle orğannar üz itmägän Läyläne. İre Rusiä grajdanı, ämma qazaq qızı bügengä qädär grajdanlıq ala almıy. İke sabıyı da änise kebek Qazaqstan grajdannarı bulıp yäşärgä mäcbür. Bernindi xoquqsız, çirlägändä xastaxanägä dä barırğa mömkinçelek bulmıyça, ber ätilärenä qarap yäşäp yatalar. Şağalievlar ğailäse 4 keşedän tora. İke yäş bala belän qaçaqlar statusına iä bulğan ğailägä biregä kilep urnaşu ber dä ciñel bulmağan. Kilep urnaşqan torır urınnarı eşlägän cirlärennän 30 çaqrım yıraqlıqtağı awılda, bik iske, cimerelep barğan yortta. Boris Şagaliev eşkä velosiped belän yöri. Aylıq xezmät xaqı öç meñ yarım sum tiräse. Cirle xakimiät Bulanaştan fatir tabıp birergä wäğdä birgän-birüen, ämma mäs'älä axırına qädär çişelep betä almıy äle. Eş älege dä bayağı grajdanlıyqqa kilep terälä. Bügenge oçraşu waqıtında da tatarlar biregä kilüçe däräcäle eştä eşläwçe qunaqlarnı Şağalievlar ğailäse problemaları buyınça yärdäm itülären sorap möräcäğät ittelär. Bulanaş tatarları belän oçraşu kilgän qunaqlarda da, biredäge tatarlarda da bik uñay tä'sir qaldırdı.

-“Sez bezne bigräk olıladığız, - dieştelär apalar, - räxmät sezgä. Balalar belän, kürşelär belän biregä gel kilep yörerbez”. Milli Media-Xoldingnıñ Bulanaş bülege citäkçese itep bertawıştan xalıq aldında zur abruyğa iä bulğan, poselok xastaxanäseneñ baş tabibı bulıp eşläwçe Damir Rifqät ulı Ğarifullinnı sayladılar.

Fäwiä Safiullina, Yekaterinburg

XS
SM
MD
LG