Accessibility links

якшәмбе, 4 декабрь 2016, Казан вакыты 21:33

Başqortstan tatarları wäkilläre bu şimbädä Qazanğa bara


Tatarstanda Başqortstan tatarları könnären ütkärüne oyıştıru qomitetı äğzaları comğa könne üzläreneñ çirattağı utırışın ütkärde. Aldan xäbär itelüençä, oyıştıru qomitetı wäkilläre 11 sentäbr könne Qazanğa kitä. Şul könne ük alar, Tatarstannıñ räsmi şäxesläre belän oçraşıp, Qazanda ütäçäk bäyräm xaqında fiker alışaçaq. Oyıştıru qomitetı utırışında äytelüençä, Başqortstan tatarlarınıñ Tatarstandağı könnären üktäber azağında ütkärü öçen barlıq mömkinleklär dä bar. Moña xäzer barı tik Tatarstan yağınıñ ğına fatıyxası kiräk. Şimbä könne ütäçäk söyläşülärdä Başqortstan wäkilläre Qazandağı zur çaranıñ täğayın könnäre nihäyät bilgeläner dip ömetlänä. Elegräk tä xäbär itelüençä, Başqortstan citäkçelege Tatarstanda Başqortstan tatarları könnären ütkärügä kisken qarşılığın beldergän ide. Niçek inde Başqortstan tatarlarınıñ ğına könnäre bulırğa tieş, anı tatarlar öçen ayırım ütkärergä tügel, ä Başqortstan mädäniäte könnäre dip atarğa kiräk häm anda respubliknıñ başqa xalıqları da qatnaşsın digän däğwaların citkerde Başqortstan türäläre. Läkin tatar milli xäräkäte oyışmaları mondıy taläpne qabul itmäde. Älege xäl Qazanda ütäçäk bäyräm tiräsendä dä baytaq añlaşılmawçanlıqlar tudıra başlağan ide. Çönki Başqortstan xaqimiätläre belän yaña ğına mönäsäbätlärne caylıy başlağan Tatarstan citäkçeläre, ike arada yänä ığı – zığı quptarmasqa teli. Şul säbäple alar Başqortstan tatar milli oyışmalarınıñ Qazanda ütäçäk bäyräm buyınça täqdimnärenä ozaq qına cawap birmi dä kilde şikelle. Bu wäzğiättä Tatarstannıñ räsmi dairäläre, yañadan da ike tuğandaş respublik arasında mönäsäbätlärne bozmas öçen, Qazandağı bäyrämgä kilergä Başqortstannıñ qayber citäkçelärenä dä räsmi çaqıru cibärergä mömkin. Tatar milli oyışmaları wäkilläre moña qarşı tügel, älbättä, ämma alar Başqortstan citäkçeläre dä Qazanğa barsa, bu könnär tağın da şoma ğına ütär häm anda Başqortstan tatarları problemnarı xaqında yänä ber süz dä quzğatılmas dip kenä borçıla. Ä bit Başqortstan tatarlarınıñ Tatarstandağı bäyrämen oyıştıru da näq menä Başqortstandağı tatar xalqınıñ könüzäk problemnarın urtağa salıp tikşerüne maqsat itep quya. Qazanda Başqortstan tatarları könnären oyıştıru qomitetı räise Ramil Bignov bu şimbädä Tatarstannıñ räsmi dairäläre belän söyläşülärdä bäyrämne oyıştıruğa qağılışlı küpçelek mäsälälärgä açıqlıq kertep betügä ömetlänüen belderde. Ni öçen disäñ, xäzer Qazandağı bäyrämgä ber aydan artığraq qına waqıt qalıp bara. – Tatarstan citäkçelege bezneñ täqdimnärne qabul itär häm Başqortstan tatarları könnäre eşlekle şartlarda ütär, – dide Ramil Bignov. – Başqortstan xaqimiätläre belän mönäsäbätlärne bozmaw öçen genä respubliktağı 1 millionnan artıq tatarnıñ problemnarına haman da küz yomu döres bulmas ide.

XS
SM
MD
LG