Accessibility links

җомга, 9 декабрь 2016, Казан вакыты 18:29

Rawil Buxaraev Qazan jurnalistları belän oçraştı


Comğa könne Qazanda ber qızıqlı oçraşu uzdı. Tatmedia agentlığınıñ brifinglar zalında bilgele yazuçı, şağir, jurnalist Rawil Buxaraev jurnalistlar belän oçraştı. Rawil Buxaraev Qazanda tuıp üssä dä, xäzerge köndä Londonda yäşi, BBC radiosında eşli. Tatarstandağı kollegaları belän dä ul nigezdä şuşı kompaniä, anıñ eşçänlege xaqında söyläşte, BBCnıñ eş prinsipları, maqsatları belän tanıştırdı. Şulay uq ul üzeneñ niçek itep Londonğa barıp çığuın, xäzer eşli torğan radioğa nindi räweştä kilep kerüe xaqında söyläde. Anı tıñlarğa comğa könne Tatmediağa keşe ällä ni küp kilmäsä dä, söyläşü bik qızıqlı häm canlı ütte. Rawil Buxaraevqa üze eşlägän kompaniä turında ğına tügel, başqa dönyaküläm mäglümät çaraları turında beleşmälär birergä, alarnıñ eşçänlege xaqında söylärgä turı kilde.

Sorawlar da küp birelde. Tatarstan yäşläre gäcite jurnalistı Flera Nizamova, mäsälän, BBC radiosı belän Svoboda/Azatlıq radiosınıñ ayırması belän qızıqsındı. Rawil Buxaraev süzlärenä qarağanda, BBSnıñ da eş prinsipları Azatlıq radiosınıqınnan ällä ni ayırılmıy. Ä menä Rusiä mäğlümät çaraları, anıñ fikerençä, mäğlümät birgändä yış qına anı artıq xisle itep citkerälär. Ğomumän, söyläşü menä şulay törle mäğlümät çaraların çağıştıru, analizlaw räweşendä bardı. Aralaşu waqıtında süz sentäber başındağı Beslan şähärendäge waqiğalar xaqında da bardı. Rawil Buxaraev BBC teleradiokompaniäseneñ älege faciğäne yaqtırtuı turında da äytte.

Xäyer, Rawil äfände tuğan yağına bu oçraşu öçen genä qaytmağan. Qazanda küptän tügel genä şağirneñ Kazanskie snega dip isemlängän şiğerlär cıyıntığı da dönya kürgän. Şulay uq, anıñ plannarında Qazannıñ meñyıllığına äzerlek qısalarında Söyembikä baletın quyu da bar. Şuşı ideyä belän ul kompozitor Şamil Şärifullinğa möräcäğät itkän. Başqalanıñ yubileyına büläkne respublikanıñ al’pinistları da eşlärgä bulğannar. 2005 yılda alar Tyan’-Şan’ tawlarınıñ ber böyeklegenä Qazannıñ meñyıllığı digän isem quşaçaq. Monıñ öçen Kiläse cäydä 12 tatarstanlı Tyan’-Şan’nıñ 5 meñ metr böyeklektäge isemsez ber tawına menäçäk. Älege tawlar urnaşqan Qırğızstan belän şuşı isemne birü xaqında söyläşülär inde ütkärelgän ikän.

Gölnaz İlgizär

XS
SM
MD
LG