Accessibility links

чәршәмбе, 7 декабрь 2016, Казан вакыты 17:33

Cakartada bulğan şartlaw sürätendä, Australiä xökümäte iminlek çaraların arttırırğa niätlänä


2001-nçe yılnıñ 11-nçe sintäbr waqiğäläre öçyıllığı da yaña terror ğämälläre ixtimalı belän bilgelänä, xörmätle tıñlawçılar. Australiä xökümäte, atnakiç İndoneziä başqalasındağı ilçelege yanında bomba şartlawınnan soñ üzeneñ çittäge bar diplomatik wäkillekläre iminlegen arttıraçağın belderä.

Cakartadağı şartlaw 9 keşeneñ ülemenä häm 180-läp keşeneñ törle cäräxätlär aluına kitergän ide. Yaña iminlek çaraları kertü turında beldergändä Australiä premyer-ministrı John Howard ta näq menä 11-nçe sintäbr waqiğälären iskä aldı.

Audio, John Howard

"Bügen sintäbrneñ 11-e, New York häm Washingtonda bulğan terror höcümnäreneñ öçyıllığı", di Australiä xökümäteneñ başlığı, häm şul xällärdän soñ bar dönyanıñ üzgärüenä, iminlek mäs''äläsenä yañaça qarıy başlawğa işarä itep, "monı xätta bez, tınıçlıq söyuçe Australiädä dä tanırğa mäcbürbez" dip belderä. İldäge hawa alannarında häm bigräk tä İndoneziägä yul totqan oçqıçlarda iminlek çaraları inde qırıslatıldı, ämma Australiä xökümäte xäzer bigräk tä üzeneñ çit illärdäge ilçelekläre öçen borçıla. Mäğlüm ki, bu il terrorğa qarşı köräş iğlan itkän Quşma Ştatlarnıñ dönyadağı iñ yaqın berektäşlärennän berse häm Australiä citäkçeläre, näq şul säbäple terrorçılar kiläçäktä dä üz höcümnären däwam itärgä tırışaçaq dip isäpli. Premyer Howard, terrorğa qarşı köräş bik ozaqqa suzıla ala dip kisätä.

Audio, John Howard

Kilep tuğan wäzğiattä närsä eşläp bula digän sorawğa John Howard, waqıtında häm aldanraq eş itärgä, ilçeleklärne nığıtırğa, törle töbäklärdäge dustanä dairälär belän eşlärgä dip cawap qaytara häm "terrorğa qarşı köräş ozaqqa suzılğan, qanlı ber köräş bulaçaq, ägär dä kem dä bulsa başqaça uylıy ikän, ul üz-üzen aldıy" dip belderä. İndoneziä başqalasında isä ul arada ilneñ politsiäse başlığı Dai Bäxtiär, ildä yaña höcümnärne buldırmaw bik awır eş bulaçaq dip kisätte.

Audio, Dai Bäxtiär

"İndoneziä politsiäse Australiä, Quşma Ştatlar, Britaniä kebek däwlätlärneñ ilçeleklären saqlaw tırışlıqların arttırdı, läkin terrorçılar xäzerge tösle eş itä başlasa, alarnıñ höcümnären aldan kisätü bik awır bulaçaq" di İndoneziä politsiäse başlığı. Anıñ xezmätkärläre, iminlek çaraların arttıru belän bergä atnakiç Cakartada bulğan şartlaw artında kemnär toruın da tikşerüen däwam itä. Bu uñaydan ike şikle adämneñ sürätläre bäyän itelde, alar radikal'' islamçılarnıñ "Cemaa İslamiä" törkemenä kerä dip farazlana.

Kärim Kamal
XS
SM
MD
LG