Accessibility links

Кайнар хәбәр

Tatarstandağı mäktäplär texnik yaqtan 100% imin tügel


2003 yılnıñ aprel’endä Maxaçqala şähärendä işetmäwçe balalar yortı yanıp, 28 bala ülgän ide. Şuşınnan soñ, Rusiä buylap uqu yortlarınıñ, şifaxanälärneñ yanğınğa qarşı toru, texnik yaqtan iminlegen tikşerü bardı. Bu eş Tatarstanda da alıp barıldı. 13 sentäberdä Energetik küzätçelek däwlät idäräse jurnalistlar belen oçraşıp, tikşerü näticäläre belän tanıştırdı. Mäktäp, balalar baqçaları häm şifaxanälär texnik yaqtan 100% imin tügel. Bügenge matbuğat oçraşuında şul xaqta belderelde. Tikşerüçelär 2 meñläp sotsial ähämiätkä iä bulğan oyışmanı tikşerep çıqqan. Küpçelegendä tege yäki bu yaqtan citeşleklär tabılğan. Energetik küzätü idäräse başlığı urınbasarı Lyudmila Lavrentyeva beldergänçä, Qazandağı qayber mäktäplärdä, uçilişçe, internat häm Veterinar Akademiädä elektr energiä çıbıqları, utqa totaşu urınnarınıñ tieşsez cirdä urnaşuı, elektr cihazlarnıñ tözek bulmawı qurqınıç tudıra. Arça, Älmät, Alekseyevskiy häm başqa rayon, awıl mäktäplärendäge xäl dä iminlek turında qayğırırğa mäcbür itä.

Şul uq küzätü oyışması wäkilläre beldergänçä, texnik iminlek yağınnan citeşsezleklär Qazandağı iñ ere respublika klinik şifaxanäläreneñ binalarında da tabılğan. Başqala häm respublika balalar xastaxanälärendä erele-waqlı citeşsezleklär bar.

Mäğärif ministrlığı wäkile dä, üz çiratında, añlatmalar birep kitte. Ul tikşerüçelär ğäyepläwlären kire qaqmadı, läkin mäktäplärneñ finans xäle awır, yaxşı belgeçlärne cälep itep elektr cihazların qarap torırğa, alarnı tözek xäldä totarğa mäktäplärneñ aqçaları yuq dide. Ber distä mäktäp avariä xälendäge binalarda eşläp tora, şuña elektr çıbıqlarınıñ xäle citäkçelärneñ iğtibar üzägendä tügel. Citeşsezräklär tabılsa da, sotsial ähämiätkä iä bulğan oyışmalar eşlären däwam itä. Alarnıñ iminlege öçen energetik küzätçelek häm mäğärif ministrlığı cawaplıqnı büleşergä kileşte. Ä menä elektr utı suğıp bäxetsezlekkä oçrağan keşelär öçen kem cawap birer, bilgesez. Mäsälän, 1 sentäber könne Qazanda 2 malay transformator torğan urınğa ütep kerep, alarnı anda elektr utı suğıp, qatı tän cäräxätlären alğan. Qazan finans akademiäneñ tulay torağında ber student qız, utqa totaşu urının remontlarğa teläp, elektr utı suğudan ülgän. Tösle metall äyberlären saldırırğa teläp, respublikanıñ 2 rayonında 15-16 yäşlek malaylar elektr utı köçennän ülgän.

Belgeçlär äytüençä, sotsial oyışmalarnıñ texnik yaqtan iminlegen küzätüçe maxsus xezmätlärdän tış, keşelärgä üzlärenä dä uyaw bulırğa kiräk. Bu oçraqta şaqtıy bäxetsezleklärne buldırmıy qalırğa mömkin bulır ide.

Bikä Timerova.
XS
SM
MD
LG