Xalıqara Atom Energiäse İdaräse başlığı Äl-Baraday İran häm Könyaq Korea turında

BMOnıñ Xalıqara Atom Energiäse İdaräse başlığı Möxämmät äl-Baraday İrannıñ atom programmasın tikşerüne tämamlaw köne bilgelänmägän dip belderde. İran üzeneñ atom programmasın tikşerüneñ noyäber ayında tämamlanuın teli. Bügen Xalıqara Atom Energiäse İdaräse Vienada İrannıñ atom programması turında söyläşüne başladı. Bu söyläşüdä İran wäkillären citäkläwçe Xösäin Musavian Tähran uran bayıtudan tıyılu turındağı bıltırğı wäğdäsen qısqa waqıtlı, uzara ışanıç buldıru çarası dip isäpli dide. Elegräk Fransiä, Britaniä häm Germaniä räsmiläre İrannı mondıy programmalarnı çiklänmägän waqıtqa tuqtatırğa çaqırğan ide. Waşington İrannı yäşeren räweştä atom qoralı yasarğa tırışuda ğäyepli. İran monı kire qağa.

El-Baraday Könyaq Koreanıñ qayber elekke atom tikşerenüläre turında Xalıqara Atom Energiäse İdaräsenä xäbär itmäwe tirän borçılu uyata dide. Ul Seulnıñ uran häm plutoniy bayıtu turında xisap birmäwe Atom Texnologiäsen Taratmaw turındağı kileşügä qarşı kilä dide. İdarä başlığı Könyaq Korea räsmilären İdarä belän xezmättäşlekne däwam itärgä häm idarägä ütkärelgän tikşerenülär turında tulı mäğlümätkä iä bulu mömkinlege birergä çaqırdı. Küptän tügel Könyaq Korea ber törkem belgeçlärneñ xökümättän yäşeren räweştä atom tikşerenüläre alıp baruın faş itte. Bügen Xalıqara Atom Energiäse İdaräsendäge Könyaq Korea wäkile Ço Çañ Beom Seul İdarä räsmiläre belän tulısınça xezmättäşlek itä dide.