Accessibility links

Кайнар хәбәр

Robert Miñnullin: Tatarstan öçen Vladimir Putin täqdimnäre kötelmägän xäl bulmadı


Tatarstannıñ räsmi dairäläreneñ Vladimir Putinnıñ 13 sentäberdä xökümät utırışında äytkän täqdimnärenä mönäsäbätlären belep, alardan respublikanıñ kiläçäge xaqında añlatmalar alar öçen bez Tatarstannıñ Yustitsiä ministrı Midxät Qormanovqa möräcäğät itek. Ul, älege Rusiä prezidentınıñ täqdime, anıñ süzläre genä bar, qanunnar qabul itelmiçä närsä dä bulsa äytü qıyınraq, dide. Rusiä qanunı äzer bulğaç, respublikanıñ Däwlät Şurası kiräkle qanunnarnı yaña yılğa qädär qabul itep, üzgärtep beterergä mömkin. Qormanov fikerençä, Tatarstannıñ Konstitutsiäse, Prezident saylawları häm cirle üzidarä turındağı qanunnar üzgärtelergä tieş. Bu eşkä Rusiä qanunnarı töbäklärgä 2-3 ay birä. Şuña kürä, yaña räweştä cirle citäkçelärne saylaw inde kiläse yılğa uq mömkin bulaçaq.

Bez Midxät Qormanovtan, şulay uq, Rusiä Konstitutsiäse üzgärterlärme, dip soradıq. Ul bezgä menä nindi cawap birde.

Rusiä Konstitutsiäse üzgärmi, ul bik üzençälekle äyber. Yel’tsin 10 yıl prezident buldı – barısı da Konstitutsiä buyınça bardı. Xäzer prezidentlıqqa Putin kilde – tağın barısı da Konstitutsiä buyınça, dip äytelä. Rusiä konstitutsiäse – ul universal’ qanun, aña törleçä añlatmalar birep bula

Tatarstan Däwlät Şurası deputatı Robert Miñnullin isä, Vladimir Putin täqdim itkän üzgäreşlär respublika öçen kötelmägän xäl bulmadı, dip sanıy.

Berençedän, Rusiä xökümätendä bulğan reformalardan soñ Tatarstanda bernindi üzgäreşlär dä bulmadı. Dimäk, bezdä närsäder köttelär. İkençedän, Putin çığışa waqıtında Mintimer Şäymievnı kürsättelär. Anıñ yöze ber dä borçılğan kebek tügel ide. Küräseñ, ul närsäder sizengän yäki belgän. Minemçä, berençe etapta milli respublikalarda äle bezgä bik timäslär

Robert Miñnullin, Vladimir Putinnıñ millät eşläre belän şöğellänüçe ministrlıqnı torğızu täqdimen uñay bäyäläde. Älege ministrlıq närsä belän şöğelläner, älegä bilgesez, läkin bezneñ küpmillätle ildä bu bik kiräkle eş, dide ul.



Gölnaz İlgizär

XS
SM
MD
LG