Accessibility links

дүшәмбе, 5 декабрь 2016, Казан вакыты 17:43

Putin niätläre Rusiäneñ sovet çorına qaytuın añlata ala


Rusiädä isä cämäğätçelekneñ iğtibar üzägendä haman da prezident Putin täqdim itkän xakimiat üzgäreşläre tora, xörmätle tıñlawçılar. Töbäklär belän idarä itüne üzgärtü niäte qarşılıqlı fikerlär uyatsa da, däwlät qulındağı mäğlümat çaraları, berençe çiratta televidenie, barı tik räsmi qaraşnı, yäğni Putin täqdimnären üterep maqtawğa ğına urın birä. Ämma Rusiäneñ üzendä dä, annan çittä dä Mäskäw Kremleneñ üz xakimiaten nığıtu tırışlıqların kisken tänqitläwçelär, monıñ il yazmışı öçen ayanıçlı bula aluı belän kisätüçelär citärlek. Bügen bez şularğa tuqtalıp kitäbez.

Rusiä töbäkläre citäkçelären, milli respublikamı ul, ällä ğadi ölkäme, Mäskäwgä nığraq bäyläw täqdime xakimiat tiräsendäge dairälärdä kiñ yaqlaw taptı, monısı ällä ni ğäcäpsenü uyatmıy da. Gubernatorlarnı awızlıqlaw niäte Rusiädä Mäskäw Kremlenä Vladimir Putin kilü belän tarala başlağan ide. Beslandağı faciğädän faydalanıp federal'' xakimiat şul niäten nihayät ğämälgä quyarğa buldı - häm monıñ yaqtı kiläçäk öçen çınnan da şulay kiräklegen isbatlaw eşen gubernatorlarnıñ üzenä yökläde. Düşämbedä xökümät utırışınnan soñ xäbärçelär yanına Putin täqdimnären añlatu häm maqtaw öçen Mäskäw xäkime Yuri Lujkov häm Tatarstan prezidentı Miñtimer Şäymiev çığarıldı. Gubernatorlar, başqa şundıy xakimiat keşeläreneñ prezident niäten därräw yaqlawı däwlät qulındağı mäğlümat çaralarında, berençe çiratta televideniädä xäzer bertuqtamıy bara. Ämma Rusiäneñ üzendä dä, annan çittä dä Putin täqdimnärenä şöbhä belän qaraw, alarnı tänqitläw, monıñ ilne yañadan sovet zalimiate çorına qaytara aluı belän kisätülär dä yış işetelä. Vladimir Putinneñ töbäk citäkçelären üze täqdim itep saylatu häm Duma saylawların partiä isemlekläre buylap qına ütkärü teläge turında mäğlüm demokrat, Duma deputatı Vladimir Rıjkov bolay dip belderä.

Audio, Vladimir Rıjkov

"Min 89 qurçaq citäkçeneñ ilne niçek nığıta aluın añlamıym, min şulay uq saylawçılar mänfäğäten qayğırtmağan parlamentnıñ ilne niçek itep nığıtuın añlamıym. Minemçä, prezident täqdim itkän närsä ilne nığıtmıy, kiresençä, tarqata ğına. Alay ğına da tügel, bu terrorğa qarşı köräşkä dä yardäm itmiäçäk. Terrorğa qarşı suğışqa saylanğan häm xalıq tarafınnan yaqlanğan abruylı töbäk citäkçeläre genä yardäm itä ala" dip belderä Duma deputatı Vladimir Rıjkov. Ul Rusiädäge täräqqiatneñ qurqınıç yuldan baruına da basım yasıy.

Audio, Vladimir Rıjkov

"Bez kire sovet çorına, iñ yaman sovet çorına qayttıq, il neft aqçasına yäşi, xakimiat yalğan wä propaganda belän şöğellänä, il üze demokratik bulmağan, avtoritar alımnar belän idarä itelä" dip bäyäli Rusiädäge xäzerge xällärne Vladimir Rıjkov. Putin täqdimnäreneñ ildäge demokratik täräqqiatne tuqtata alu ixtimalına cit il wäkilläre dä iğtibarnı cälep itä. Quşma Ştatlar üz borçuların xätta däwlär sekretare däräcäsendä belderergä buldı. Colin Powell bu uñaydan bolay dide.

Audio, Colin Powell

"Terrorçılar ezennän barğanda härkem tieşle çamanı onıtmasqa, demokratik reformalar yulınnan taypılğan yünäleşne almaw çaraların kürergä tieş dip uylıym" di amerikan däwlät sekretare. Häm Putinneñ soñğı täqdimnären bäyäläp ul, ...

Audio, Colin Powell

"Asılda bu, soñğı yıllarda Rusiädä alıp barılğan demokratik reformalardan çigenü bulıp tora, häm bez bu xaqta Rusiä yağı belän fiker alışırğa telibez" dip belderä. Bu Quşma Ştatlarnıñ däwlät sekretare Colin Powell ide. Anıñ şuşı süzlärenä Rusiä tışqı eşlär ministrı Sergey Lavrov Astanädä, reformalar ütkärü Rusiäneñ eçke eşe bulıp tora, Powell, añlawımça, terrorğa qarşı köräştä Rusiä belän teläktäşlegen belderep, şul köräştä qırıs çaralar häm demokratik qimmätlär arasında çamanı saqlawnıñ ähämiatenä basım yasadı dide. Sergey Lavrov.

Audio, Sergey Lavrov

Rusiä ministrınıñ Powellğa qırıs cawap qaytaruı, Mäskäwneñ üzen tänqitläwgä bik sizger buluın, monı awır kiçerüen kürsätä.

Kärim Kamal
XS
SM
MD
LG