Accessibility links

Tatar jurfağında studentlıqqa bağışlaw ğädäte


Qazan universitetında uquçı studentlar arasında barı tik jurnalistika fakul'tetınıñ tatar bülegendä uquçılar ğına yıl sayın közge tabiğät qoçağına cıyılıp, çın talip isemen alalar ikän. Älege traditsiä studentlarnı berläşterergä yärdäm itä. Häm bu kürkäm ğädät bügenge köndä dä däwam itä.
Çärşämbe könne bulaçaq tatar jurnalistların töyägän elektriçka Kamenka urmanına yul tottı. Bulaçaq jurnalistlar belän tulğan közge urman keçkenä Sabantuyğa äwerelde. Tabiğät qoçağında östäl, säxnä, qızıqlı tatar cır-iyülläre mondıy çarada berençe tapqır qatnaşuçı barı tik berençe kurs studentları öçen genä beraz çiten toyılğandır. Ölkänräk kurslarnıñ çığışlarınnan çın talant, ut çäçräp tora ide. Ut çäçrätep biüçe, matur itep cırlawçı ölkän kurs studentları gäzit, televidenie, radio aşa tanış ta, baqsañ alar da student qına ikän äle!
Älege säyäxät berençe kurstağılarnı bik dulqınlandırdı. İnde öç atna buyı däreskä yöresälär dä, çınlıqta alar barı tik şuşı traditsiäne ütäwdän soñ ğına tatar jurnalistikası studentlarına äwerelälär. Traditsiäneñ töp öleşe berençelärgä bik üzençälekle su eçerüdän ğibärät. Student tormışı niqädär açı, tozlı häm tatlı buluın beraz añlatır öçen ölkän kurstağılar törle tämlätkeçlär quşıp bu sunı äzerli häm berençelärgä eçertä. Şuşı sunıñ tämen tatıp qarawçı berençe kurslar çın student buldı. Menä şulay itep bulaçaq tatar jurnalistları şürälelär, quyı ağaçlar arasında, tabiğät qoçağında studentlıqqa bağışlandı.
Al'bina Zäynulla, Qazan.
XS
SM
MD
LG