Accessibility links

пәнҗешәмбе, 8 декабрь 2016, Казан вакыты 07:15

İjawdağı tatar häm udmurt gimnaziäläre yaña binağa küçergä xıyallana


Udmurtiä başqalası İjaw şähärendäge tatar gimnaziäsen kiñäytep tözü turında uquçılar da, uqıtuçılar da, ata—analarnıñ da xıyallanıp yörüläre xaqında «Azatlıqqa» xäbär itkän idem. Bu mäs'älä respublika, şähär citäkçeläre aldında da ber genä tapqır kütärelmäde. Bu atnada gimnaziä xälenä qağılışlı problemalar tağın qalqıp çıqtı. Ütkän uqu yılında tatar gimnaziäseneñ statusın yaqlağanda komissiä berniçä täqdim yasağan ide. Alarnıñ ber öleşe uqıtu—tärbiä eşenä qağılsa, şulay uq gimnaziäneñ uqıtu mäydanı az buluı da assızıqlandı. Şuşı uq täqdimnär ütkän yılda oktäber başında gimnaziädä uzdırılğan mägägrif ministıyrlığınıñ küçmä kollegiä utırışında da raslandı. Quyılğan problemalarnı gimnaziä urnaşqan İjaw şähäreneñ Lenin rayonı administratsiäse häm şähär mäğärif bülekläre xäl itärgä tieş bulsa, ber yıl waqıt uzğan, ämmä alarnıñ berse dä ğämälgä aşırılmağan. Ul täqdimnärneñ iñ möhime — gimnaziäneñ uqıtu mäydanın kiñäytü. Ä bu mäs'älädä bügengä xätle bernindi dä açıqlıq yuq. Yanqormanıñ tözeleş proyektı da, anı başqarıp çığu öçen finanslar bülep birü dä ütälmägän. Şuşı könnärdä gimnaziädäge problemalarnı xäl itü buyınça qabul itelgän qararlarnıñ ütäleşen respublika Xakimiäte qarşındağı uqu yortların attestatsiäläü komitetı utırışı tikşeräçäk. İnde cawaplı keşelär niçek cawap birerlär, tağın nindi qararlar qabul iteler, waqıt kürsäter. Bu atnada Udmurtiä başqalasında berdänber udmurt gimnaziäseneñ dä kiläçäge turında waqiğalar buldı. Gimnaziä älegä qadär şähär üzägendäge yaraqlaştırılğan binada tuplanğan bulsa, yaña uqu yılınnan udmurt gimnaziäseneñ dä uqıtu mäydanın kiñäytü niäte belän alarnı şähär çitendäge mäktäpkä küçerdelär. Monıñ belän ata—analar kileşmiçä, respublika Xakimiäte qarşında uram cıyınnarı oyıştırdılar. Däwlät Sovetı Räise İğor Semenov yanında, mägärif ministıyrlıygında da oçraşular bulıp ütte. Näticädä, balalarnı älegä elekkege binalarında qaldırdılar. Ämmä mäğärif ministrı Andrey Kuznetsov teletapşıruda — balalar ber tel belän genä çiklänergä tieş tügel digän fikerne belderde. Dimäk, yaña ministr gimnaziäneñ uqıtu protsessı belän tanış tügel, alarnıñ udmurtmı, tatarmı gimnaziäläre alar, anda uqıtu nigezdä federal' programma buyınça alıp barılğanın, häm östämä tuğan tel uqıtıluın belmi küräseñ. İjaw şähäreneñ 10—nçı mäktäbe binasın tözep, anda üzençälekle uqıtu häm tärbiäläw sistemasın buldırğan, mäktäptä çirek ğasırğa yaqın direktor bulıp xezmät itkän, layıqlı yalğa çıqqaç ta anda sotsial' pedagog wazifasın başqarğan Rawil Minneäxmät ulı Ğubayıwnıñ isemen mäñgeläşterü yözennän pänceşämbedä anda memorial' taqta açu tantanası bulıp ütte. Bu uñaydan miting oyıştırıldı. Anda uquçılar, uqıtuçılar, Rawil Minneäxmät ulınıñ dusları, tuğannarı, ictimaği xäräkät wäkilläre cıyılğan ide. Balalar da, çığış yasağan här keşe dä mäktäp direktorınıñ xezmätenä yuğarı bäye birdelär, anıñ belän bergä eşlägän yıllarnı iskä aldılar. 10—nçı mäktäpneñ bügenge direktorı, Rawil Ğubayıwnıñ eşen däwam itüçe Yılena Razvalinova mitingta Rawil Ğubayıwnıñ isemen mäñgeläşterü buyınça mäktäptä küp kenä çaralar qaralğanın da citkerde. Maxsus xisap açıp, Rawil Gubaev fondı buldırırğa, anıñ turında mäğlumatlar cıyıp, başta mäktäp muzeenda ekspozitsiä, ike yıldan Rawil Gubaev muzee açarğa, aña bağışlap sport yarışların uzdırırğa häm başqa çaralar turında qarar qabul itelde.

Xämidä Ğayfullina, Udmurtiä

XS
SM
MD
LG